Kestyon Lekter

Eski ti annan zis de plak ros dan sa lars lalyans, oubyen ti annan lezot keksoz ankor?

Kan tanp Salomon ti ganny dedye an 1026 A.N.L., “ti napa nanryen dan Lars apard sa de plak ki Moiz ti gannyen lo montanny Oreb, kan Zeova ti fer lalyans avek bann garson Izrael ler zot ti pe sorti Lezip.” (2 Kronik 5:10) Me i pa ti toultan koumsa.

“Dan trwazyenm mwan apre ki bann garson Izrael ti sorti Lezip,” zot ti ariv dan dezer Sinai. (Egzod 19:1, 2) Apre sa, Moiz ti al lo montanny Sinai e i ti ganny sa de plak ros ki ti annan Lalwa lo la. Moiz ti dir: “Apre mon ti desann e met sa de plak dan sa lars ki mon ti’n fer, pour ki zot reste la, zis parey Zeova ti’n demann mwan pour fer.” (Deterononm 10:5) Sa ki Zeova ti’n demann Moiz pour konstri pour met sa de plak Lalwa ladan, ti en lars tanporer, oubyen en bwat. (Deterononm 10:1) Nek ver lafen 1513 A.N.L. ki sa vre lars lalyans ti fini ganny konstri.

Pa bokou letan apre ki zot ti’n ganny delivre Lezip, bann Izraelit ti konplent manze. Alors Zeova ti donn zot lamann. (Egzod 12:17, 18; 16:1-5) Pandan sa letan Moiz ti dir Aaron: “Pran en potis e met de lit lamann ladan e met li devan Zeova konman en keksoz ki ou bann zenerasyon pou prezerve.” Sa resi i kontinyen: “Zis parey Zeova ti ordonn Moiz, Aaron ti met li devan sa [bwat] Temwannyaz [kot tou bann dokiman enportan ti ganny kite] konman en keksoz pour prezerve.” (Egzod 16:33, 34) Menm si Aaron ti’n anmas lamann e met li dan en potis, i ti pou bezwen esper Moiz fini konstri sa Lars e met sa de plak ladan, pour li kapab met zot devan sa bwat Temwannyaz.

Sa vre lars lalyans ti fini ganny konstri ver lafen 1513 A.N.L. Baton Aaron ti ganny mete dan Lars en bon pe letan plitar, apre ki Kora ek lezot ti rebele. Zapot Pol ti koz lo “lars lalyans ki . . . ti annan en vaz an-or ki ti annan lamann [ladan], baton Aaron ki ti’n fleri, ek sa de plak lalyans.”—Ebre 9:4.

Pandan sa 40 an ki bann Izraelit ti pe marse dan dezer, Bondye ti donn zot lamann. Me kan “zot ti konmans manz serten keksoz ki later ti’n prodwir” dan Later Promiz, Zeova ti nepli donn zot lamann pour manze. (Zozye 5:11, 12) I ti annan en rezon akoz baton Aaron ti ganny mete dan lars lalyans. I ti ganny mete konman en siny oubyen levidans ki Bondye i kondann bann zenerasyon ki rebele. Alors, i kapab ki baton Aaron ti reste la ziska ki bann Izraelit ti fini travers dezer. Alors, i fer sans pour dir ki en pe letan apre ki bann Izraelit ti’n fini antre dan Later Promiz e avan dedikasyon tanp Salomon, baton Aaron ek sa potis lamann, ti ganny tire dan sa lars lalyans.