Ou lentegrite i rezwir leker Zeova

“Vin saz, mon garson e rezwir mon leker, pour ki mon a kapab reponn sa enn ki pe provok mwan.”—PROV. 27:11.

1, 2. (a) Ki lakizasyon Satan, liv Zob i koz lo la? (b) Kwa ki montre ki Satan ti kontinyen provok Zeova, menm apre lepok Zob?

ZEOVA ti permet Satan teste Zob, son serviter fidel. Akoz sa, Zob ti perdi son bann zannimo, son zanfan ek son lasante. Me kan Satan ti kestyonn lentegrite Zob, i ti napa zis Zob antet. Satan ti dir: “Lapo pour lapo e tou sa ki en zonm i annan i pou donnen pour son lavi.” Sa lakizasyon ti soulev en kestyon enportan ki ti enplik lezot e non pa zis Zob tousel e sa in kontinyen en bon pe letan apre lanmor Zob.—Zob 2:4.

² Apepre 600-z-an pli tar apre leprev Zob, Salomon ti ganny enspire pour ekrir: “Vin saz, mon garson e rezwir mon leker, pour ki mon a kapab reponn sa enn ki pe provok mwan.” (Prov. 27:11) I kler ki sa letan Satan ti ankor pe provok Zeova. Deplis, dan en vizyon ki zapot Zan ti gannyen, i ti vwar Satan pe akiz bann serviter Bondye apre ki i ti’n ganny pouse dan lesyel, en pe letan apre ki Rwayonm Bondye ti ganny etablir an 1914. Wi, menm ozordi, la kot nou vreman dan bann dernyen zour sa move lemonn, Satan i ankor pe kestyonn lentegrite bann serviter Bondye!—Rev. 12:10.

3. Ki leson enportan nou kapab aprann dan liv Zob?

³ Aprezan egzamin trwa leson enportan nou kapab aprann dan liv Zob. Premyerman, leprev Zob i idantifye sa vre lennmi limanite e sa enn ki vreman responsab pour opoz pep Bondye. Sa lennmi i Satan oubyen Dyab. Dezyenmman, nenport leprev nou kapab rankontre, si nou annan en bon relasyon avek Bondye sa pou ed nou gard nou lentegrite. Trwazyenmman, kan nou pas atraver bann leprev e nou ganny teste dan diferan fason, Bondye i siport nou, zis parey i ti fer pour Zob. Denozour, Zeova i fer sa atraver son Parol, son lorganizasyon ek son lespri sen.

Gard sa vre lennmi antet

4. Lekel ki responsab pour kondisyon sa lemonn ozordi?

⁴ Bokou dimoun pa krwar ki Satan i egziste. Alor, menm si zot kapab vreman enkyet akoz kondisyon sa lemonn, zot pa vreman konnen ki Satan oubyen Dyab ki vreman lakoz sa bann problenm. I vre, imen osi i annan son rol pour zwe dan en kantite soufrans ki limanite i fer fas avek. Nou premye paran, Adan ek Ev ti swazir pour vin endepandan avek zot Kreater. Depi sa letan, bann zenerasyon ki’n swiv in vreman azir san okenn lasazes. Anfet, Dyab ki ti anbet Ev pour rebele kont Bondye. Li menm ki’n devlop sa lemonn anba son kontrol kot imen i enparfe e zot mor. Lefet ki Satan i “bondye . . . sa syek,” bann imen an zeneral i demontre menm karakteristik ki i annan parey lorgey, kankan, zalouzi, vorasite, riz ek rebelyon. (2 Kor. 4:4; 1 Tim. 2:14; 3:6; lir Zak 3:14, 15.) Sa bann kalite karakteristik in anmenn konfli politik e relizye, laenn, koripsyon ek dezord ki kontribye en kantite pour soufrans limanite.

5. Ki nou anvi fer avek sa konnesans presye ki nou annan?

⁵ Pa nou konman bann serviter Zeova nou annan konnesans ki vreman presye! Wi, nou konpran lekel ki merit ganny blanmen pour kondisyon sa lemonn ki pe deteryore. Alor, pa sa i motiv nou pour partisip dan predikasyon pour ki nou kapab enform lezot dimoun konsernan lidantite sa vre lennmi? Eski pa nou vreman kontan pour siport nou vre Bondye Zeova e eksplik lezot dimoun ki mannyer i pou met en lafen avek Satan ek bann maler ki limanite i fer fas avek?

6, 7. (a) Lekel ki responsab pour persekisyon ki bann vre adorater i gannyen? (b) Ki mannyer nou kapab imit legzanp Eliou dan letan lontan?

⁶ Satan pa zis responsab sagrinasyon dan sa lemonn, i osi responsab lopozisyon ki pep Bondye i gannyen. I determinen pour teste nou. Zezi ti dir zapot Pyer: “Simon, Simon, satan in demann pouvwar lo ou, pour li kapab sakouy ou, parey en fermye i sakouy dible.” (Lik 22:31) Pareyman, sakenn ant nou ki swiv dan lepa Zezi, dan en fason ou en lot nou pou eksperyans bann leprev. Pyer ti konpar Dyab avek “en lyon ki kriye, pe rode ki i pou devore.” Zapot Pol ti dir: “Tou sa ki oule viv en lavi fidel dan Kris Zezi pou ganny persekite.”—1 Pyer 5:8; 2 Tim. 3:12.

⁷ Ki mannyer nou kapab montre ki nou pe gard nou vre lennmi antet kan en trazedi i ariv lo en frer oubyen ser dan kongregasyon? Olye elwanny nou avek sa frer ki’n ganny afekte, nou azir parey Eliou ki ti koz avek Zob konman en vre zanmi. Nou siport nou frer dan son lalit kont lennmi nou tou, Satan. (Prov. 3:27; 1 Tesa. 5:25) Nou bi se pour ed nou bann frer ek ser Kretyen gard zot lentegrite, nenport kwa i kapab arive me nou pou rezwir leker Zeova.

8. Akoz Satan pa ti reisi anpes Zob onor Zeova?

⁸ Premye keksoz ki Satan ti fer Zob perdi ti son bann zannimo. Sa bann zannimo ti annan gran valer, petet i ti sours son reveni. Zob ti osi servi zot dan ladorasyon. Apre ki Zob ti’n sanktifye son bann zanfan, “i ti leve byen boner granmaten e ofer sakrifis brile dapre lakantite zot ki ti annan akoz Zob ti dir ‘petet mon bann garson in fer pese e modi Bondye dan zot leker.’ Koumsa menm Zob ti fer toultan.” (Zob 1:4, 5) Alor, Zob ti ofer zannimo konman sakrifis regilyerman. Enn fwa ki son bann leprev ti konmanse, i ti nepli posib pour li fer sa. Zob ti napa “bann keksoz valer” pour li onor Zeova avek. (Prov. 3:9) Me i ti kapab e i ti onor Zeova avek son labous!

Devlop en relasyon pros avek Zeova

9. Kwa ki annan plis valer dan nou lavi?

⁹ Ki swa nou ris ouswa pov, zenn oubyen vye, an bonn sante ouswa malad, nou kapab devlop en bon relasyon avek Zeova. Nenport leprev nou fer fas avek, en relasyon pros avek Bondye pou permet nou gard nou lentegrite e fer leker Zeova rezwir. Menm serten dimoun ki ti napa bokou konnesans lo laverite in pran en pozisyon ferm e gard zot lentegrite.

10, 11. (a) Ki mannyer enn nou ser ti reazir anver tes konsernan son lentegrite? (b) Ki larepons pwisan sa ser ti donn Satan?

¹⁰ Egzamin legzanp Ser Valentina Garnovskaya, enn parmi plizyer Temwen Larisi, ki parey Zob sa zonm fidel, i ti gard son lentegrite malgre bann leprev difisil. An 1945, kan i ti annan apepre 20-t-an, en frer ti rann temwannyaz avek li. De fwa ankor sa frer ti retournen pour koz lo Labib me apre sa Valentina pa ti vwar li ankor. Kantmenm sa, Valentina ti konmans pres avek son bann vwazen. Konman rezilta, i ti ganny arete e sarze wit an dan en kan. An 1953 i ti ganny large e deswit i ti kontiny son travay predikasyon. Ankor enn fwa i ti ganny arete e anprizonnen, safwasi pour di-z-an. Apre ki i ti’n pas serten lannen dan en kan, i ti ganny anvoye dan en lot. Dan sa kan ti annan serten ser ki ti annan en Labib. En zour en ser ti montre Valentina en Labib. Pa sa ti en moman eksitan! Zis mazinen, apard sa enn, sel lot Labib ki Valentina ti’n vwar ti sa enn dan lanmen sa frer ki ti pres avek li an 1945!

¹¹ An 1967, Valentina ti ganny large e finalman i ti senboliz son dedikasyon avek Zeova par batenm dan delo. Avek devouman i ti servi son liberte pour partisip dan minister ziska 1969. I ti ganny arete sa lannen e sa voyaz i ti ganny en santans trwa-z-an prizon. Kantmenm sa, Valentina ti kontinyen prese. Avan ki i ti mor an 2001, i ti’n ed 44 dimoun pour aprann laverite. I ti’n pas 21 an dan bann prizon ek kan. I ti’n pare pour kit deryer tou keksoz enkli son liberte, pour li gard son lentegrite. Ver lafen son lavi, Valentina ti dir: “Mon pa’n zanmen annan mon prop landrwa reste. Tou sa ki mon ti annan ti dan en sel valiz, me mon ti ere e kontan ki mon ti pe servi Zeova.” Pa Valentina ti donn en larepons pwisan Satan, sa enn ki ti dir ki imen pa pou reste fidel avek Bondye kan zot rankontre bann leprev! (Zob 1:9-11) Nou kapab asire ki i ti rezwir leker Zeova e ki i pe esper avek enpasyans sa letan kot i pou redonn Valentina lavi atraver rezireksyon ensi ki lezot ki’n mor fidelman.—Zob 14:15.

12. Ki rol lanmour i zwe dan nou relasyon avek Zeova?

¹² Nou lanmitye avek Zeova i baze lo nou lanmour pour li. Nou admir bann kalite Bondye e fer tou sa ki nou kapab pour viv an armoni avek son plan. Tou lekontrer avek sa ki Dyab i dir, nou volonterman donn Zeova nou lanmour san okenn kondisyon. Sa lanmour senser i donn nou lafors pour gard nou lentegrite kan nou ganny teste. Lo son kote, Zeova pou “vey semen bann ki fidel avek li.”—Prov. 2:8; Ps. 97:10.

13. Ki mannyer Zeova i vwar sa ki nou fer pour li?

¹³ Lanmour i motiv nou pour onor non Zeova menm si nou santi ki nou pa kapab fer bokou. I vwar nou bon lentansyon e i pa ziz nou si nou pa kapab fer tou sa ki i ti a kontan nou fer. Sa ki konte se pa zis sa ki nou fer me akoz nou fer li. Menm si Zob ti dan latristes e ti’n andir en kantite, i ti koz avek bann ki ti akiz li lo son lanmour pour bann kalite Zeova. (Lir Zob 10:12; 28:28.) Dan dernyen sapit liv Zob, Zeova i eksprim son lakoler avek Elifaz, Bildad ek Tsofar akoz zot pa ti koz laverite. O menm moman, Zeova ti montre ki Zob ti annan son laprouvasyon akoz i ti refer avek li kat fwa konman “mon serviter” e par demann li pour priy pour sa bann ki’n fer sa ki mal. (Zob 42:7-9) I ti pou byen si nou osi nou azir dan menm fason pour ki nou ganny laprouvasyon Zeova.

Zeova i siport Son bann serviter fidel

14. Ki mannyer Zeova ti ed Zob koriz son fason panse?

¹⁴ Zob ti gard son lentegrite, menm si i ti enparfe. Parler, anba bann gro presyon i ti annan en move fason get keksoz. Par egzanp, i ti dir Zeova: “Mon kriy ver ou pour ganny led, me ou pa reponn mwan . . . Avek tou lafors ou lanmen ou’n revanze kont mwan.” Deplis Zob ti port tro bokou latansyon pour zistifye son lekor kan i ti dir: “Mon napa tor” e “mon pa’n fer ditor avek mon lanmen e mon lapriyer i pir.” (Zob 10:7; 16:17; 30:20, 21) Kantmenm sa, Zeova ti zantiman ed Zob par demann li en seri kestyon ki ti retir son latansyon lo son lekor. Sa bann kestyon ti permet Zob vwar pli klerman siperyorite Zeova konpare avek zonm. Zob ti aksepte gidans e koriz son lekor.—Lir Zob 40:8; 42:2, 6.

15, 16. Dan ki fason Zeova i donn led son bann serviter ozordi?

¹⁵ Zeova i donn son bann serviter ozordi bann gidans zantiy e ferm. Deplis nou ganny bokou byenfe enportan. Par egzanp, Zezi Kri ti ofer son lekor konman sakrifis e sa in poz en fondasyon pour nou ganny pardonnen nou pese. Lo baz sa sakrifis, nou kapab annan en relasyon pros avek Bondye kantmenm nou enparfe. (Zak 4:8; 1 Zan 2:1) Kan nou rankontre bann leprev, nou osi priye pour ganny sipor ek lafors lespri sen Bondye. An plis ki sa, nou annan Labib antye e si nou lir li e medit lo sa ki annan ladan, nou prepar nou lekor pour bann tes lo nou lafwa. Letid Labib i ed nou konpran sa kestyon konsernan souvrennte iniversel e nou prop lentegrite.

¹⁶ An plis ki sa, nou benefisye en kantite pour form parti sa lasosyasyon frer ek ser dan lemonn antye ki Zeova i donn nouritir spirityel atraver “lesklav fidel e pridan.” (Mat. 24:45-47, NW) Dan tou sa apepre 100,000 kongregasyon Temwen Zeova, renyon i ganny fer dan en fason pour enstrir e donn nou lafors pour fer fas avek bann leprev ki posibleman teste nou lafwa. Sa i kapab ganny demontre atraver legzanp Sheila, en Temwen adolesan ki reste Lalmanny.

17. Donn en legzanp pour montre akoz i saz pour reste pros avek lenstriksyon lorganizasyon Zeova ozordi.

¹⁷ En zour kot lekol ti napa personn pour sirvey laklas Sheila tanporerman. Son bann kanmarad lekol ti deside servi en bord Ouija ki ganny servi pour devinen. Deswit Sheila ti kit laklas e sa ki i ti tande pli tar ti fer li fyer pour sa ki i ti’n fer. Letan ki zot ti pe servi sa bord Ouija, serten zelev ti santi prezans bann demon e panik an tayan. Me kwa ki ti ed Sheila pour kit laklas vitman? Sheila i eksplike: “Pa tro bokou letan avan sa lensidan, dan en renyon kot Lasal Rwayonm nou ti pe diskit lo danze bord Ouija. Alor mon ti konnen ki pour fer. Mon ti anvi fer plezir Zeova, zis parey Labib i dir dan Proverb 27:11.” Gran mersi Sheila ti’n asiste sa renyon e ekout sa size atantivman!

18. Ki ou determinen pour fer?

¹⁸ Annou determinen pour reste atase avek lenstriksyon ki nou gannyen atraver lorganizasyon Bondye. Nou ganny gidans ek sipor ki nou bezwen kan nou asiste renyon regilyerman, lir Labib, etidye bann piblikasyon baze lo Labib, lapriyer e frekant bann Kretyen matir dan kongregasyon. Zeova i anvi nou ranport laviktwar e i annan konfyans ki nou pou kontinyen reste fidel. Pa nou annan en gran privilez pour onor non Zeova, gard nou lentegrite e fer leker Zeova rezwir!

Eski ou rapel?

• Pour ki kalite kondisyon ek leprev Satan i responsab?

• Ki posesyon pli presye nou annan?

• Nou lanmitye avek Bondye i baze lo kwa?

• Ki serten fason Zeova i siport nou ozordi?

[Portre lo paz 15]

Nou kapab ed lezot adorater gard zot lentegrite