Sa ki nou aprann avek Zezi

Konsernan “lafen”

Lafen kwa?

Bann disip Zezi ti demann li: “Ki siny ki pou endik ou larive ek lafen?” (Matye 24:3) Ler i ti pe reponn sa kestyon, Zezi pa ti dir ki later pou ganny detrir. Avan sa, i ti’n koz konsernan sa move lemonn e i ti servi sa term pour refer avek tou sistenm politik, komersyal, e relizye ki’n ganny etablir par zonm ki pe ganny kontrole par Satan. (Matye 13:39, 40, 49) Alor, i ti pe koz lo sa move lemonn kan i ti dir: “Lafen pou arive.”—Matye 24:14.

Ki mannyer Zezi ti dekrir lafen?

Lafen sa sistenm enzis i en ‘bon nouvel.’ Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Nou ki’n met an italik.) Zezi ti dekrir lafen sa sistenm dan sa fason: “Sa pou en lepok [“gran ladetres,” NW], pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor. Me si sa bann zour pa ti’n diminyen personn pa ti pou sove.”—Matye 24:14, 21, 22.

Lekel ki pou ganny detrir?

Zis sa bann ki pa kontan e pa servi Zeova ek Zezi ki pou ganny detrir. Sa bann dimoun pa obeir Bondye. Zezi ti dir: “Larive Fis-de-Lonm pou parey sa ki ti arive dan letan Noe. Dan sa bann zour avan deliz . . . zot pa ti pran kont nanryen ziska deliz ti vini e balye zot tou.” (Matye 24:36-39) Zezi ti dir ki i annan bokou ki lo sa semen ki anmenn ver destriksyon. Me, i ti donn lasirans ki i annan en “semen . . . difisil ki anmenn dan lavi.”—Matye 7:13, 14.

Kan ki lafen sa sistenm pou arive?

Ler i ti ganny demande konsernan sa siny ki pou endik son prezans ‘ek konklizyon sa sistenm,’ Zezi ti reponn: “Nasyon pou lager kont nasyon, rwayonm kont rwayonm e pou annan lafamin ek tranblemandeter . . . pou annan sitan pese ki lanmour en pli gran kantite dimoun pou diminyen.” (Matye 24:3-12) Alor, tou bann move nouvel dan nou letan i annan en sinifikasyon ankourazan, setadir byento Rwayonm Bondye pou anmenn lape pour bann imen obeisan. Zezi ti dir: “Kan zot war tou sa bann keksoz pe arive, konnen ki Rwayonm Bondye i pros.”—Lik 21:31.

Ki ou devret fer?

Zezi ti dir ki Bondye in “donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Pour annan lafwa dan Bondye ek son Garson, ou bezwen konn zot byen. Se pour sa ki Zezi ti dir: “Lavi eternel . . . savedir ki zot konn ou konman sel vre Bondye, ek Zezi-Kri ki ou’n anvoye.”—Zan 17:2, 3.

Fer atansyon ki lenkyetid ek problenm pa anpes ou aprann ki mannyer pour demontre ou lanmour pour Bondye. Zezi ti dir: “Fer byen atansyon zot menm, pangar zot vizilans i ganny detournen avek . . . traka lavi. Fer atansyon sa zour i sirprann zot parey en pyez. Parski sa bann levennman pou tonm lo tou zabitan later.” Si ou ekout lavertisman Zezi ou pou “ganny lafors pour pas atraver tou sa bann keksoz ki pou arive.”—Lik 21:34-36.

Pour plis lenformasyon, vwar sapit 9, “Eski nou pe viv dan ‘bann dernyen zour’?,” dan liv Ki Labib i vreman dir?a

[Not anba lo paz]