Apresye ou plas dan kongregasyon

“Bondye in plas sak parti lekor, dan fason ki li i oule.”—1 KOR. 12:18.

1, 2. (a) Kwa ki montre ki sak dimoun i kapab annan en plas ki i apresye dan kongregasyon? (b) Ki kestyon ki pour ganny egzaminen dan sa lartik?

DEPI dan letan ansyen Izrael, kongregasyon i laranzman ki Zeova in fer pour donn manze spirityel ek gidans, son pep. Par egzanp, apre ki bann Izraelit ti’n anvair lavil Ai, Zozye ti “lir aotvwa tou bann parol dan lalwa, benediksyon ek malediksyon, dapre tou sa ki ti’n ganny ekrir dan liv lalwa . . . devan tou kongregasyon Izrael.”—Zoz. 8:34, 35.

² Dan premye syek N.L., zapot Pol ti dir avek Timote ki ti ansyen, ki kongregasyon Kretyen ti “lafanmir Bondye” e osi “pilye ek sipor laverite.” (1 Tim. 3:15) “Lafanmir” Bondye ozordi i lasosyasyon bann frer ek ser Kretyen dan lemonn antye. Dan douzyenm sapit son premye let enspire pour bann Korentyen, Pol ti konpar kongregasyon avek en lekor imen. I dir ki menm si sak parti i annan diferan fonksyon, zot tou zot itil. Zapot Pol i ekrir: “Bondye in plas sak parti lekor, dan fason ki li i oule.” I menm fer resorti ‘ki bann parti ki nou mazinen i annan mwens lenportans dan lekor, nou donn zot plis latansyon.’ (1 Kor. 12:18, 23) Alor rol en dimoun ki drwat dan kongregasyon Bondye i pa pli meyer ouswa pli pir ki rol en lot Kretyen fidel. I senpleman diferan. Alor, ki mannyer nou kapab trouv nou plas dan laranzman Bondye e konsider li konman en keksoz ki annan gran valer oubyen ki nou apresye? Kwa ki kapab annan en lefe lo nou plas dan kongregasyon? Ki nou kapab fer ‘pour ki tou dimoun i war nou progre?’—1 Tim. 4:15.

Ki mannyer nou kapab apresye nou plas?

3. Ki fason nou kapab trouv nou plas dan kongregasyon e montre ki i annan valer pour nou?

³ En fason pour trouv nou plas dan kongregasyon e montre ki i annan valer pour nou, i ler nou donn tou nou sipor “sa serviter [oubyen lesklav] fidel e pridan” ensi ki son reprezantan Konsey Direkter. (Lir Matye 24:44-47.) Nou bezwen egzamin nou reaksyon anver gidans ki nou gannyen sorti kot sa lesklav. Par egzanp pandan bann lannen ki’n pase, nou’n ganny bann konsey byen kler lo labiyman ek pennyen, divertisman e fason pour servi byen Internet. Eski nou’n swiv byen sa bann bon konsey afen ki nou protez nou spirityalite? Eski nou’n pran o serye sa konsey pour etablir en letid regilye kot nou ador Zeova an fanmir? Eski nou’n met de kote en swar pour fer sa? Si nou selibater, eski nou pe fer letan pour etidye Labib personnelman? Zeova pou beni nou endividyelman e konman en fanmir si nou swiv sa gidans ki sorti kot sa lesklav.

4. Kwa ki nou devret pran an konsiderasyon ler nou pe fer bann swa personnel?

⁴ Serten i kapab mazinen ki i depan lo sak endividi pour pran son prop desizyon dan domenn divertisman, labiyman ek pennyen. Me en Kretyen ki’n batize e ki apresye son plas dan kongregasyon, pa devret fer bann desizyon baze zis lo son swa personnel. I bezwen sirtou pran an konsiderasyon pwennvi Zeova ki trouve dan son Parol Labib. Son mesaz i devret parey ‘en lalanp pour nou lipye, e en lalimyer pour nou semen.’ (Ps. 119:105) I osi montre ki nou saz si nou pran an konsiderasyon lefe ki nou bann swa personnel i annan lo nou minister ek lezot dimoun, swa dan kongregasyon oubyen an deor.—Lir 2 Korentyen 6:3, 4.

5. Akoz nou devret evite devlop sa leta lespri endepandan?

⁵ “Lespri ki aprezan pe travay dan bann zanfan dezobeisans” i partou parey sa ler ki nou respire. (Efe. 2:2) Sa lespri i kapab fer nou mazinen ki nou pa bezwen gidans sorti kot lorganizasyon Zeova. Byensir nou pa anvi vin parey Dyotref ki pa ti oule ‘aksepte lotorite zapot Zan.’ (3 Zan 9, 10) Nou bezwen veye ki nou pa devlop en leta lespri endepandan. Fotespere nou pa zanmen montre en mank respe ni an parol oubyen an aksyon anver sa mwayen ki Zeova i servi pour kominik avek nou ozordi. (Nom. 16:1-3) O kontrer, nou devret apresye sa privilez pour nou korpere avek sa lesklav. Pa nou devret fer zefor pour demontre lobeisans ek soumisyon anver bann dirizan dan nou kongregasyon?—Lir Ebre 13:7, 17.

6. Akoz nou devret egzamin nou sityasyon personnel?

⁶ En lot fason pour montre ki nou apresye nou plas dan kongregasyon i par byen egzamin nou sityasyon personnel e fer tou sa ki nou kapab pour ‘kontan nou responsabilite’ oubyen minister e anmenn loner pour Zeova. (Rom. 11:13) Serten frer ek ser i kapab fer pionye ordiner. Lezot in antreprann diferan form servis spesyal a plen tan parey misyonner, sirveyan distrik oubyen rezyonal, ouswa servi dan diferan Betel dan lemonn antye. En kantite frer ek ser i ede dan konstriksyon Lasal Rwayonm. Lamazorite pep Zeova pe fer zot mye pour pran swen avek bezwen spirityel zot fanmir e pe partisip plennman dan predikasyon sak semenn. (Lir Kolosyen 3:23, 24.) Nou kapab annan konfyans ki ler nou ofer nou lekor volonterman dan servis Bondye e fer nou mye pour servi li avek tou nou leker, i touzour annan en plas pour nou dan son laranzman.

Bann fakter ki annan en lefe lo rol ki nou annan dan kongregasyon

7. Eksplike ki mannyer nou sityasyon i kapab annan en lefe lo plas ki nou annan dan kongregasyon.

⁷ I enportan pour egzamin byen nou sityasyon akoz, a en serten degre, nou plas dan kongregasyon i depan lo sa ki nou kapab fer oubyen annan posibilite pour fer. Par egzanp, plas ki en frer i annan dan kongregasyon i diferan dan serten laspe avek sa ki pour en ser. Laz, lasante ek lezot fakter i osi kapab annan en lefe lo sa ki nou fer dan servis Zeova. Proverb 20:29 i dir: “Sa ki zoli avek bann zennonm se zot lafors, e labote bann vyeyar se zot seve blan.” Petet bann zenn i kapab fer plis fizikman akoz zot lafors, tandis ki bann frer ek ser aze pour benefisye kongregasyon en kantite akoz zot lasazes ek leksperyans. Nou osi bezwen gard antet ki okenn keksoz ki nou kapab fer dan lorganizasyon Zeova i depan lo labonte ekstraordiner Bondye.—Akt 14:26; Rom. 12:6-8.

8. Ki mannyer nou dezir i annan lefe lo sa ki nou fer dan kongregasyon?

⁸ Legzanp de zenn ser sorti dan menm fanmir i fer resorti en lot fakter ki determinen ki plas nou pou annan dan kongregasyon. Tou le de ti fini lekol. Zot ti dan menm sityasyon. Zot paran ti’n fer zot mye pour ankouraz zot tou le de pour progrese pour antreprann servis pionye ordiner apre ki zot fini lekol. Apre ki zot ti fini lekol, enn ti pran servis pionye tandis ki lot ti konmans travay a plen tan dan lemonn. Kwa ki ti fer zot fer en swa diferan? I ti sa dezir ki zot ti annan. Alafen, sakenn ti fer sa ki i ti anvi fer. Eski pa sa i leka pour laplipar nou? Nou bezwen mazin seryezman lo sa ki nou ti pou kontan fer dan servis Bondye. Eski nou kapab fer plis ki nou pe deza fer, menm si sa i vedir ki nou bezwen fer serten sanzman dan nou lavi?—2 Kor. 9:7.

9, 10. Ki nou devret fer si nou napa sa motivasyon pour fer plis dan servis Zeova?

⁹ Me si nou napa sa motivasyon pour fer plis dan servis Zeova e nou annan sa tandans pour fer zis minimonm dan kongregasyon? Dan son let pour bann Filipyen, Pol i dir: “Bondye i travay dan zot, e i donn zot lavolonte e rann zot kapab akonplir tou dapre son bon plan.” Wi, Zeova i kapab travay dan nou e fer nou devlop sa lanvi oubyen dezir.—Fili. 2:13; 4:13.

¹⁰ Alor pa nou devret demann Zeova pour fer nou devlop sa lanvi pour fer son lavolonte? Lerwa David dan ansyen Izrael ti fer sanmenm. I ti priye: “Fer mwan konn ou bann semen, O Zeova; ansenny mwan ou bann santye. Fer mwan mars dan ou laverite e ansenny mwan, parski ou mon Bondye delivrans. Dan ou mon’n espere tou dilon lazournen.” (Ps. 25:4, 5) Pareyman nou kapab priye pour ki Zeova i fer nou annan sa lanvi pour fer sa ki fer li plezir. Kan nou reflesir lo ki mannyer Zeova ek son Garson i santi konsernan nou servis, nou leker i ranpli avek lapresyasyon pour zot. (Mat. 26:6-10; Lik 21:1-4) Sa rekonnesans ki nou annan i kapab motiv nou pour enplor Zeova pour fer nou anvi progrese spirityelman. Profet Izai in donn en legzanp konsernan latitid ki nou devret devlope. Ler i ti tann Zeova demande: “Lekel ki mon pou anvoye, e lekel ki pou ale pour nou?” Sa profet ti reponn: “La mon la! Anvoy mwan.”—Iza. 6:8.

Ki mannyer pour fer progre?

11. (a) Akoz i neseser pour bann frer pran responsabilite dan kongregasyon? (b) Ki mannyer en frer i kapab progrese pour ganny bann privilez dan kongregasyon?

¹¹ Avek sa 289,678 dimoun ki’n batize dan lemonn pandan lannen servis 2008, i kler ki i annan en gran bezwen pour plis frer pour diriz kongregasyon. Ki mannyer en frer i devret reazir an rapor avek sa bezwen? I senp, par fer zefor pour devlop bann kalite ki bann ansyen i devret annan dapre standar Labib. (1 Tim. 3:1-10, 12, 13; Tit 1:5-9) Ki i endike ler en frer i fer zefor pour ranpli bann kondisyon ki ganny trouve dan Labib par fer plis dan predikasyon, fer bokou zefor pour akonplir son bann responsabilite dan kongregasyon, travay dir pour amelyor son bann komanter dan renyon e annan en lentere personnel dan bann frer ek ser? I pe montre ki i apresye son plas dan kongregasyon.

12. Ki mannyer bann zenn i kapab demontre zot devouman pour laverite?

¹² Ki bann zenn frer, sirtou bann ki ankor adolesan i kapab fer pour progrese dan kongregasyon? Zot kapab fer zefor pour devlop “lasazes ek konpreansyon ki . . . Lespri [Bondye] i donnen” par ganny konnesans egzakt lo Lekritir. (Kol. 1:9) Par vin bann etidyan Labib ki serye e byen partisip dan bann renyon kongregasyon, sa pou sertennman ed zot atenn sa lobzektif. Bann zenn onm i osi kapab fer progre par travay dir pour kalifye pour antre par sa “gran laport ki’n ouver pour fer en gran travay” dan diferan form servis a plen tan. (1 Kor. 16:9) Pourswiv en karyer dan servis Zeova i en fason pour viv en lavi vreman satisfezan e en lavi ki anmenn bokou benediksyon.—Lir Eklezyast 12:1.a

13, 14. Dan ki fason bann ser i kapab demontre ki zot apresye zot rol dan kongregasyon?

¹³ Bann ser osi i kapab demontre ki sa privilez i annan valer pour zot par partisip personnelman dan lakonplisman Psonm 68:11. Sa psonm i dir: “Zeova li menm i dir sa parol; bann madanm ki pe anons sa bon nouvel i en gran larme.” En fason pli remarkab ki bann ser i kapab montre zot rekonesans pour zot plas dan kongregasyon i par partisip dan sa travay fer disip. (Mat. 28:19, 20) Ler zot partisip plennman dan predikasyon e volonterman fer bann sakrifis pour sa travay, bann ser i montre ki zot rol dan lorganizasyon i annan en gran valer pour zot.

¹⁴ Dan let ki i ti ekrir Tit, Pol ti dir: “Dir . . . bann vye madanm ki zot devre konport zot konman dimoun ki pe viv en lavi sen. . . . Zot devre donn bon konsey, pour ki bann zenn madanm i aprann ki mannyer pour kontan zot mari ek zot zanfan, pour ki zot a rezonnab, byen tenir zot, konn byen okip zot lakour, obei zot mari, pour ki personn pa mal koz parol Bondye.” (Tit 2:3-5) Pa bann ser matir i kapab annan en tre bon lenfliyans lo kongregasyon! Par respekte bann frer ki pe diriz kongregasyon e par pran bann desizyon saz dan bann domenn parey labiyman, pennyen ek divertisman, zot donn en bon legzanp lezot e montre ki zot annan en gran respe pour sa plas ki zot annan dan kongregasyon.

15. Ki en ser selibater i kapab fer pour fer fas avek sa sityasyon kot i santi li tousel?

¹⁵ Parler i kapab difisil pour en ser selibater trouv son plas dan kongregasyon. En ser ki ti pas atraver sa leksperyans i dir: “Ler ou en selibater ou kapab parfwa santi ou tousel.” Ler i ti ganny demande ki mannyer i fer fas avek sa sityasyon, i ti dir: “Lapriyer ek letid i ed mwan pour retrouv mon plas ankor. Mon etidye lo konman Zeova i vwar mwan. Apre mon esey ed lezot dan kongregasyon. Sa i ed mwan pour mazin lezot olye mazin zis mwan menm.” Dapre Psonm 32:8, Zeova ti dir avek David: “Mon lizye pou lo ou pour konsey ou.” Wi, Zeova i annan en lentere personnel dan tou son bann serviter, enkli bann ser selibater e i pou ed tou dimoun pour trouv zot plas dan kongregasyon.

Gard ou plas!

16, 17. (a) Akoz aksepte lenvitasyon Zeova pour form parti son lorganizasyon i sa pli bon desizyon ki nou kapab fer? (b) Ki mannyer nou kapab gard nou plas dan lorganizasyon Zeova?

¹⁶ Avek lanmour Zeova in atir sakenn son serviter pour zot annan en relasyon personnel avek li. Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Parmi sa plizyer bilyon dimoun lo later, Zeova in personnelman envit nou pour form parti son kongregasyon ozordi. Aksepte sa lenvitasyon i sa pli bon desizyon ki nou’n deza fer. Sa i’n donn nou lavi en bi ek en sans. Pa nou annan lazwa ek satisfaksyon akoz nou annan en plas dan kongregasyon!

¹⁷ Sa psalmis ti dir: “Zeova, mon kontan reste dan ou lakaz. I ti osi sante: “Mon prop lipye pou lo en landrwa plat; mon pou beni Zeova parmi bann lafoul ki’n rasanble.” (Ps. 26:8, 12) Sa vre Bondye i annan en plas pour sakenn de nou dan son lorganizasyon. Si nou kontinyen swiv bann gidans teokratik e reste okipe dan servis Bondye, nou pou kapab gard nou plas ki presye dan laranzman Zeova.

[Not anba lo paz]

Eski ou rapel?

• Akoz i rezonnab pour dir ki tou Kretyen i annan en plas dan kongregasyon?

• Ki mannyer nou montre ki nou apresye nou plas dan lorganizasyon Bondye?

• Ki fakter ki kapab annan lefe lo nou plas dan kongregasyon?

• Ki mannyer bann Kretyen ki zenn oubyen adilt i demontre ki zot plas dan kongregasyon Bondye i annan valer pour zot?

[Portre lo paz 21]

Ki mannyer bann frer i kapab kontinyen fer progre pour ganny bann privilez dan kongregasyon?

[Portre lo paz 22]

Ki mannyer bann ser i kapab demontre ki zot apresye plas ki zot annan dan kongregasyon?