Eski nou nepli fatig nou avek pese?
PA TRO lontan pase, dimoun ki ti frekant legliz ti souvan tann zot pret pe fer sermon byen for lo sa ki zot apel sa “set pese mortel.” Sa ti move dezir, gourmandiz, lavaris, pares, lakoler, groker ek lorgey. Tre souvan sa pret ti dekrir move konsekans ki pese i anmennen e ankouraz bann ki ti pe ekout li pour repantir. En ekriven i dir: “Aprezan, laplipar bann ki fer lapres denozour i swazir pour pa koz lo bann size ki fer zot lodyans enkonfortab. O kontrer zot konsantre lo size ki fer zot lodyans santi zot byen e satisfe avek sa ki zot pe fer.”
Serten zournalis in obzerv sa menm tandans. La detrwa komanter ki’n ganny ekrir dan serten zournal:
▪ ‘Bann keksoz ki dan lepase ti ganny konsidere konman pese konmela i nepli. Dimoun nepli vwar lenportans pour repantir e ganny pardonnen. Me se plito bann sermon ki reasir dimoun lo konman pour annan konfyans dan zot lekor e kontan zot lekor ki popiler.’—Star Beacon, Ashtabula, Ohio.
▪ “I paret ki dimoun konmela i nepli fatig zot avek pese.”—Newsweek.
▪ “Nou nepli demann nou lekor ‘Ki Bondye i ekspekte avek mwan?’ me o kontrer nou demande ‘Ki Bondye i kapab fer pour mwan?’”—Chicago Sun-Times.
Dan sa sosyete kot i annan diferan ras, plizyer larelizyon ek pwennvi politik, dimoun i vin pli toleran e sa i fer ki zot ezite pour dir si en keksoz i moralman byen oubyen mal. Konmela i mal pour ziz aksyon lezot, sa ki pli gro pese. Zot dir koumsa: ‘Sa ki ou krwar ladan, i kapab bon pour ou, me ou pa devret a tou pri enpoz ou fason panse lo personn. Denozour, dimoun i viv zot lavi dapre diferan kalite prensip. Pa zis ou ki konnen kwa ki byen. Prensip lezot dimoun i osi enportan ki sa ki pour ou.’
Sa kalite rezonnman in anmenn en sanzman dan lafason ki dimoun i servi zot vokabiler. Sa mo “pese” i aprezan rarman ganny servi dan en konteks serye. Pour laplipar dimoun, pese in vin en topik pour fer fars lo la. Nou nepli tann dir de dimoun ki pa ankor marye pe “viv dan pese” me zot “reste ansanm.” Olye dir zot pe fer “adilter” zot “annan galan,” e olye dir zot bann “omoseksyel” zot annan en “lot stil lavi.”
Napa dout alor ki sa ki dimoun i konsider “akseptab” oubyen konman “pese” in sanze. Me akoz zot latitid in sanze? Ki’n arive avek pese? Eski ou pwennvi lo sa size i vreman enportan?