Kestyon sorti kot nou lekter . . .

Eski Bondye i annan en konmansman?

▪ Labib i dir ki Bondye ti napa en konmansman. Bondye in touzour egziste. Menm si i difisil pour konpran sa konsep ki Bondye in egziste pour leternite, nou pa kapab rezet sa lide zis akoz nou pa kapab konpran li totalman.

Eski i rezonnab pour ekspekte konpran tou keksoz lo Bondye? Zapot Pol ti dir: “Larises Bondye i vreman gran, son konnesans ek son lasazes i vreman profon. Lekel ki kapab eksplik son bann desizyon? Lekel ki kapab konpran son bann plan?” (Romen 11:33) Nou lespri pa totalman konpran profonder lasazes ek konnesans Bondye, zis parey en zanfan pa kapab konpran tou keksoz lo son paran. Menm si sa parol enspire ki Pol ti ekrir ti avan tou pe koz lo lasazes ek mizerikord Bondye ki inik, i osi montre ki i annan lezot laspe lo Zeova ek son bann travay ki tro profon pour nou konpran. Sa konsep ki Bondye napa en konmansman i aparaman enn parmi sa bann laspe. Par kont, nou kapab annan konfyans total dan sa ki Labib i ansennyen lo Bondye. Get sa ki Zezi Kri ti dir konsernan lekritir sakre: “Ou parol i laverite.”—Zan 17:17.

Dan en lapriyer ki i ti fer avek Zeova, Moiz ti dir: “Ou’n touzour la e ou pou touzour la.” (Psonm 90:2, The Holy Bible, New Century Version) Dan sa verse, Moiz ti pe eksplike ki legzistans Bondye i al dan de direksyon. Enn i ver lavenir. Zeova i “viv eternelman.” (Revelasyon 4:10) Alor, Bondye pou kontinyen egziste eternelman dan lavenir. Sa lot i lepase. Andotmo, Bondye pa’n ganny kree e pa ni’n menm annan en konmansman. Plito, Bondye in toultan egziste dan lepase.

I difisil pour laplipar nou konpran bann lide ki pa konkret. Par kont, parler nou devret aksepte serten konsep ki difisil, zis parey i annan bann nimero ki pozitif e negatif. Ki swa nou pou kont an montan ouswa an desandan, nou pa pou zanmen kapab fini konte. Eski pa nou kapab aplik sa legzanp avek sa kantite letan ki nou Kreater i egziste?

Alor, i normal ki zis nou Kreater tousel ki kapab ganny apele par sa tit inik, “Lerwa eternel.” (1 Timote 1:17) Zis mazinen: Zezi Kri, sa plizyer milye lanz dan lesyel e bann imen lo later, zot tou zot annan en konmansman akoz zot in ganny kree. (Kolosyen 1:15, 16) Me i pa leka pour Bondye. Si nou ensiste pour dir ki Bondye in ganny kree, sa i kapab fer ki i pou annan bann deba zanmen fini konsernan lekel ki’n kree nou Kreater. Zis Zeova tousel ki egziste “depi leternite ziska leternite.” (Psonm 90:2, The New American Bible) Andotmo, Zeova in egziste “avan tou letan.”—Zid 25.

Me gard antet ki i pa zis en senp lenformasyon ki Bondye in toultan egziste. Si nou egzamin byen lapriyer Moiz, nou pou vwar ki lefet ki Bondye i viv pour leternite, sa i en garanti sa zoli promes ki nou pou viv eternelman. De lot kote, menm si nou lavi la konmela i kourt, Bondye i ganny dekrir konman “en vre landrwa reste pour nou, pour zenerasyon apre zenerasyon.” Konman en Papa ki kontan nou, Zeova in touzour la, i la e i pou touzour la pour son pep. Ki sa laverite merveye i rekonfort ou!—Psonm 90:1.