Larepons kat kestyon konsernan lafen

ZEZI KRI ti predir ki “lafen pou arive” dan lavenir. I ti dekrir sa letan an dizan: “Sa pou en lepok gran soufrans, pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.”—Matye 24:14, 21.

Parol Zezi konsernan lafen, ensi ki lezot pasaz Labib lo sa size i soulev bann kestyon vreman enportan. Akoz ou pa ouver ou Labib e lir larepons ki i donnen pour sa bann kestyon?

1 Lafen avek kwa?

Labib pa dir ki sa later pou ganny detrir. En psalmis ti ekrir: “[Bondye in] met later dan son landrwa fiks; i pou reste stab pour en letan endefini, oubyen pour touzour.” (Psonm 104:5) Labib pa ni menm dir ki tou keksoz vivan lo later pou ganny detrir par en gro dife. (Izai 45:18) Zezi limenm ti dir ki i pou annan serten dimoun ki pou sirviv sa lafen. (Matye 24:21, 22) Alor dapre Labib, pou annan en lafen avek kwa?

Pou annan en lafen avek gouvernman imen. Bondye ti enspir profet Danyel pour ekrir: “Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.”—Danyel 2:44.

Pou annan en lafen avek lager ek polisyon. Psonm 46:9 i dekrir sa ki Bondye pou fer: “I pe fer arete lager ziska dan bann landrwa pli lwen lo later. I kas lark e kas lans an morso. I bril bann saret dan dife.” Labib i osi dir ki Bondye pou “detri bann ki detri later.”—Revelasyon 11:18.

Pou annan en lafen avek tou krim ek lenzistis. Parol Bondye i donn nou sa promes: “Bann ki drwat pou reste lo later, e bann ki san repros ki pou reste lo la. Bann mesan zot, zot pou ganny retire lo later; e bann tret, zot pou ganny eliminen.”a—Proverb 2:21, 22.

2 Kan ki lafen pou arive?

Zeova in fikse en “ler” kot i pou met en lafen avek mesanste e etabli son Rwayonm. (Mark 13:33) Me Labib i dir klerman ki nou pa kapab kalkil sa dat oubyen ler egzakt ki lafen pou arive. Zezi ti dir: “Me konsernan sa zour e sa ler personn pa konnen kan i pou arive, pa menm bann lanz dan lesyel, ni menm Garson Bondye, me Papa tousel ki konnen.” (Matye 24:36) Par kont, Zezi ek son bann disip ti predir ki mannyer kondisyon lo later pou ete zis avan Bondye i anmenn lafen. Letan ki tou sa bann levennman swivan i ariv an menm tan e dan lemonn antye, sa pou montre ki lafen i pros pour arive.

Pou annan boulversman dan kondisyon sosyal, politik ek lanvironnman a en degre ki pa’n zanmen arive dan listwar imen. Zezi ti reponn kestyon son bann disip konsernan lafen an dizan: “Nasyon pou lager kont nasyon, rwayonm kont rwayonm. Pou annan tranblemandeter en pe partou, e pou annan lafamin. Sa pou zis en peryod parey bann premye douler lanfantman.” (Mark 13:8) Zapot Pol ti ekrir: “Rapel sa byen: dan bann dernyen zour pou annan letan difisil. Parski zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye, zot pou montre en laparans lapiete, me rezet son vre pisans.”—2 Timote 3:1-5.

En kanpanny predikasyon pe ganny fer dan lemonn antye dan diferan langaz. Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.

3 Kwa ki pou arive apre lafen?

Labib pa dir ki tou bon dimoun pou ganny anmennen dan lesyel pour viv en lavi parfetman ere pour touzour. O kontrer, Zezi ti ansennyen ki sa plan ki Bondye ti annan depi o konmansman pour bann imen pou ganny akonplir. I ti dir: “Byennere bann ki dous, akoz zot pou posed later.” (Matye 5:5; 6:9, 10) Bann ki mor avan lafen i arive, Labib i promet ki zot pou ganny resisite a lavenir. (Zob 14:14, 15; Zan 5:28, 29) Kwa ki pou arive apre lafen?

Zezi pou dirize konman Lerwa dan Rwayonm Bondye dan lesyel. Profet Danyel ti ekrir: “Mon ti kontinyen gete dan bann vizyon lannwit, e, la avek nyaz en dimoun parey garson zonm [Zezi ki’n resisite] ti pe vini; e i ti ganny akse avek Ansyen bann Zour [Zeova], e zot ti anmenn li pre devan sa Enn. I [Zezi] ti ganny dominasyon, dinyite ek rwayonm, pour ki bann pep, kominote nasyonal ek bann langaz, zot tou zot devret servi li. Son dominasyon i en dominasyon ki pou dire, ki pa pou fini, e son rwayonm i enn ki pa pou ganny detrir.”—Danyel 7:13, 14; Lik 1:31, 32; Zan 3:13-16.

Bann sitwayen sa Rwayonm pou ganny en lasante parfe, pou an sekirite pour touzour e zot pou viv pour leternite. Profet Izai ti ekrir: “Zot pou konstri lakaz e zot pou reste ladan; wi, zot pou plant pye rezen e zot pou manz son fri. Zot pa pou konstri pour en lot reste, e zot pa pou plante pour en lot manze.” (Izai 65:21-23) Konsernan sa letan, zapot Zan ti ekrir: “La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:3, 4.

4 Ki ou bezwen fer pour sirviv lafen?

Zapot Pyer ti dir ki serten ki pou viv pandan letan lafen ti pou monk sa nide ki Bondye pou entervenir dan zafer bann imen e met en lafen avek tou mesanste lo later. (2 Pyer 3:3, 4) ­Kantmenm sa, Pyer i ankouraz bann ki pe viv dan nou letan pour pran sa bann aksyon swivan.

Aprann atraver bann legzanp dan lepase. Pyer ti ekrir ki Bondye “pa’n eparnye lemonn ansyen, i ti anvoy deliz lo bann move zabitan, me in prezerv lavi wit dimoun ansanm avek Noe, en predikater lazistis.” (2 Pyer 2:5) Konsernan bann moker, Pyer ti dir: “Zot oubliye par ekspre, ki depi byen lontan lesyel ek later in ganny formen par parol Bondye. Later in sorti dan delo, e in ganny formen avek delo, egalman, lemonn ansyen ti ganny detri par delo, sa gran deliz. Me lesyel ek laterb in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.”—2 Pyer 3:5-7.

Viv dapre bann standar moral Bondye. Pyer ti ekrir ki bann ki anvi sirviv sa dernyen zour pou anmenn “en lavi sen e annan respe pour Bondye.” (2 Pyer 3:11) Remarke ki Pyer ti met lanfaz lo anmenn en “lavi sen” e annan “respe pour Bondye.” Alors, i enplik plis ki zis dir nou annan lafwa dan Bondye oubyen esey devlop en relasyon avek li dan dernyen minit.

Ki kalite lavi Bondye i konsider konman akseptab e ki mannyer nou kapab demontre ki nou annan respe pour li? Akoz ou pa konpar sa ki ou deza konnen ek sa ki Labib i dir lo sa size? Temwen Zeova pou byen kontan pour ed ou. Demann zot pour montre ou dan ou prop Labib kote zot ganny sa bann larepons. Par fer sa, ou pou kapab fer fas avek lavenir avek kouraz ek konfidans menm si i annan keksoz otour nou ki fer nou per.

[Not anba lo paz]

[Pwen adisyonnel]

Later pa pou ganny detrir me bann ki detrir li pou trouv zot lafen