Zot nepli per lafen

TAR dan bann lannen 1970, Gary ek Karen ti konvenki ki lafen sa lemonn ti pros. Alor, zot ti sorti dan sa lavil kot zot ti pe reste pour al viv dan lakanpanny. Zot ti deside pour pa depan lo lasosyete me pour depan konpletman lo zot prop lekor pour ganny tou sa ki zot ti bezwen. Zot ti anvi sirviv sa lafen.

Pour zot ganny bann skil ki zot ti pou bezwen, zot ti aste bann liv, asiste bann kour ek seminar. Zot ti osi koz avek serten dimoun pour ganny konsey lo ki mannyer pour devlop bann skil neseser pour zot sirviv. Zot ti plant en zarden legim ek senkant pti pye fri. Zot ti stok en kantite lagrenn ek zouti. Zot ti aprann plant e prezerv manze. En zanmi ti montre zot ki mannyer pour touy zannimo, pour koup e prezerv zot lavyann. Karen ti aprann idantifye bann plant ek rasin ki ti pous dan lafore ki zot ti pou kapab manze si zot ti nepli annan keksoz pour manze. Gary ti aprann fer karbiran avek mai, fer en stov an metal ki bril dibwa e konstrir en lakaz ki ti annan tou son keksoz ki pa ti bezwen depan lo okenn fasilite an deor.

Karen i dir: “Akoz sa kondisyon terib ki lemonn ti ladan sa letan, mon ti santi ki sivilizasyon ti pou fini tre byento.” Gary i eksplike: “Parey lezot zenn, mon ti zwenn en group aktivis ki ti pe sey met en lafen avek koripsyon, lager Vyetnam ek rasizm. Pour mwan si zot ti kontinyen koumsa i ti paret ki imen ti pou detrir kanmarad.”

Gary i azoute: “En zour swar, mon ti napa nanryen pour fer, alor mon ti pran mon Labib e lir Matye ziska Revelasyon. Pandan sa kat zour ki ti swiv, mon ti re lir li ankor aswar. Son bomaten, lo sa senkyenm zour, mon ti dir avek Karen: ‘Nou pe viv dan bann dernyen zour. Tre byento Bondye pe al netway later. Nou bezwen rod bann ki pou sirviv.’” Gary ek Karen ti konmans rod bann ki ti anvi met pare pour sirviv sa lafen dan plizyer larelizyon.

En pti pe letan apre, en Temwen Zeova ti pas kot zot e zot ti konmans etidye Labib. Karen i rapel byen sa moman. I ti dir: “Mon ti vreman eksite akoz zot ti pe vreman eksplik mwan sa ki Labib i dir. Mon ti pe rod laverite konsernan lafen e finalman mon’n trouve. I ti annan en lespwar asire pour lavenir. Me en pli bon keksoz se ki mon ti konmans devlop en relasyon entim avek mon Papa dan lesyel, Kreater e Bondye liniver.”

Gary i dir: “Aprezan mon lavi i vreman fer sans. Enn fwa ki mon ti konmans etidye Labib, mon pa ti oule arete. Mon ti lir bann profesi Labib, egzamin bann laprev ki prouve ki zot ti pe ganny akonplir, e mon ti konvenki ki Bondye ti pou pran aksyon tre byento. Mon ti mazinen, ‘Dimoun i merit pe prepar pour sa lavi ki Bondye i anvi pour nou, me pa pour en dezas.’” Gary ek Karen ti devlop en pwennvi pozitif lo lavenir. Aprezan, dan plas enkyet konsernan lafen sa lemonn, zot annan konfyans ki Bondye pou ­retir sa bann problenm ki pe fer soufer limanite e i pou ­refer later vin en paradi.

Ki Gary ek Karen pe fer ozordi, 25 an pli tar? Karen i dir: “Mon pe kontinyen ranforsi mon lafwa e ogmant mon lanmour pour Bondye, Zeova, e mon esey ed lezot pour fer parey. Nou de Gary nou siport kanmarad par gard nou fanmir solid e ador Bondye ansanm. Nou sey toultan organiz nou e fer zefor pour gard en lavi senp pour nou kapab konsantre lo lezot e sa ki zot bezwen.

Gary i azoute: “Mon priye regilyerman ki Rwayonm Bondye i vini e ki i anmenn soulazman pour plizyer milyon dimoun. Sak fwa ki mon partaz sa bon nouvel lo Rwayonm Bondye avek lezot, mon priye ki mon kapab partaz sa lespwar ki ganny trouve dan Labib avek omwen en dimoun. Pour plis ki 25 an Zeova in reponn mon lapriyer. Mwan ek Karen, nou krwar ki Zeova pou anmenn en gran sanzman lo later tre byento e nou nepli per lafen.”—Matye 6:9, 10; 2 Pyer 3:11, 12.

[Portre lo paz 9

Aprezan Gary ek Karen i kontan pour ed lezot ganny sa lespwar ki dan mesaz Labib