Annou les nou ganny enfliyanse par lespri Bondye, pa lespri lemonn
“Nou pa’n ganny Lespri dapre lemonn, me nou’n ganny Lespri ki sorti kot Bondye, pour ki nou konpran tou bann don ki Bondye in donn nou.”—1 KOR. 2:12.
1, 2. (a) Dan ki sans bann vre Kretyen i dan en batay? (b) Ki kestyon nou pou egzaminen?
BANN vre Kretyen i dan en batay! Nou lennmi i pwisan, rize e i abitye lager. I annan en zarm ki mars sitan byen ki fer ki i’n reisi kontrol lamazorite imen. Me nou napa okenn rezon pour krwar ki nou san defans oubyen ki nou pa pou zanmen reisi. (Iza. 41:10) I annan en defans enfayib ki nou kapab servi pour reziste nenport latak.
2 Nou batay i pa enn ki literal me i enn ki spirityel. Nou lennmi i Satan e zarm prensipal ki i servi i “Lespri dapre lemonn.” (1 Kor. 2:12) Nou pli bon defans kont son bann latak i lespri sen Bondye. Pour sirviv sa batay e reste for spirityelman, nou bezwen demann Bondye son lespri sen e demontre fri lespri dan nou lavi. (Gal. 5:22, 23) Me, kwa sa lespri lemonn e ki mannyer i’n annan sitan en gran lenfliyans lo bokou dimoun? Ki mannyer nou pou konnen si nou pe ganny enfliyanse par lespri lemonn? Ki nou kapab aprann atraver Zezi konsernan les nou ganny enfliyanse par lespri Bondye e reziste lespri lemonn?
Akoz lespri lemonn i partou?
3. Ki si sa lespri lemonn?
3 Lespri lemonn i sorti kot Satan, “sef sa lemonn” e i opoz lespri sen Bondye. (Zan 12:31; 14:30; 1 Zan 5:19) I sa pli gran lafors ki motiv sa lemonn e i pous dimoun pour fer aksyon. Sa lafors ki pe enfliyans bann imen an zeneral i an konfli avek lavolonte Bondye ek son plan.
4, 5. Ki mannyer sa lespri ki Satan i promote i partou?
4 Ki mannyer sa lespri ki Satan i promote i partou? Premyerman, Satan ti anbet Ev dan zarden Edenn. I ti fer Ev krwar ki si i vin endepandan avek Bondye son lavi ti pou amelyore. (Zen. 3:13) Pa i en gran manter! (Zan 8:44) Apre sa, i ti servi sa madanm pour tant Adan pour kas son fidelite avek Zeova. Akoz swa ki Adan ti fer, limanite ti ganny vann dan pese e alor erit sa tandans pour ganny enfliyanse par sa lespri dezobeisans Satan.—Lir Efezyen 2:1-3.
5 Satan ti osi enfliyans en kantite lanz ki ti vin bann demon. (Rev. 12:3, 4) Sa traizon kont Bondye ti arive en pe letan avan Deliz dan letan Noe. Sa bann lanz ti krwar ki i ti pou pli meyer pour zot abandonn zot pozisyon dan lesyel e satisfer zot bann dezir imoral lo later. (Zid 6) Aprezan Satan pe “tronp lemonn antye” avek led sa bann demon ki nepli kapab pran lekor imen. (Rev. 12:9) Malerezman, lamazorite imen pa realize ki sa bann demon i annan lenfliyans lo zot.—2 Kor. 4:4.
Eski ou pe ganny enfliyanse avek lespri sa lemonn?
6. Ki sa sel fason ki lespri lemonn i kapab enfliyans nou?
6 Bokou dimoun pa rekonnet lenfliyans Satan me bann vre Kretyen i konn byen son bann taktik. (2 Kor. 2:11) Anfet, lespri sa lemonn pa kapab enfliyans nou si nou pa les li. Annou egzamin kat kestyon ki pou ed nou konnen si nou pe ganny enfliyanse par lespri Bondye oubyen lespri sa lemonn.
7. Nonm en fason ki Satan i servi pour esey elwanny nou avek Zeova.
7 Kalite divertisman ki mon swazir i dir kwa lo mwan? (Lir Zak 3:14-18.) Satan i esey elwanny nou avek Bondye par fer nou devlop dan nou leker lanmour pour vyolans. Dyab i konnen ki Zeova i ay nenport ki ki kontan vyolans. (Ps. 11:5) Alor, Satan i esey servi bann liv, magazin, film, lanmizik ek bann zwe elektronik pour eksit nou bann move dezir. Serten sa bann zwe elektronik i fer sa enn ki pe zwe devlop bann move dezir seksyel e vin vyolan. Satan pa fatig li si dan nou leker i annan en serten lanmour pour sa ki byen, si zis ase nou annan lanmour pour bann keksoz ki i promote, bann keksoz ki mal.—Ps. 97:10.
8, 9. Ki kestyon konsernan divertisman nou devret demann nou lekor?
8 Me de lot kote, bann ki les lespri sen Bondye enfliyans zot, zot ganny motive par sa lespri pour vin pir, kontan lape e ranpli avek pitye. I byen pour demann nou lekor: ‘Eski kalite divertisman ki mon swazir i ed mwan pour devlop bann bon kalite?’ Lasazes ki sorti dan lesyel i “san lipokrizi.” Bann ki pe ganny enfliyanse par lespri Bondye pa pres avek zot prosen konsernan lape e reste pir e an menm tan pran plezir dan get bann progranm ki montre vyolans ek limoralite kot zot.
9 Zeova i ekspekte en devosyon zis pour li tousel. Par kont, Satan pou kontan si i ganny adore kantmenm zis en fwa parey i ti anvi Zezi i fer. (Lik 4:7, 8) Nou kapab demann nou lekor: ‘Eski kalite divertisman ki mon swazir i fer li posib pour mwan ador zis Bondye tousel? Eski mon swa i fer li pli difisil oubyen pli fasil pour mwan reziste lespri lemonn? Eski mon devret fer serten sanzman laprosenn fwa ki mon swazir en divertisman?’
10, 11. (a) Konsernan bann byen materyel, ki latitid lespri lemonn i promote? (b) Ki latitid Parol Bondye i ed nou devlope?
10 Ki latitid mon annan anver bann keksoz materyel? (Lir Lik 18:24-30.) Lespri lemonn i promot ‘dezir atraver lizye’ par ankouraz vorasite e tay deryer keksoz materyel. (1 Zan 2:16) I’n fer bokou dimoun devlop en determinasyon pour vin ris. (1 Tim. 6:9, 10) Lespri lemonn i kapab fer nou krwar ki si nou akimil en kantite keksoz materyel nou pou toultan an sekirite. (Prov. 18:11) Me si nou pli kontan larzan ki Bondye, sa pou donn Satan laviktwar. Nou devret demann nou lekor: ‘Eski mon lavi i konsantre lo ganny plis keksoz materyel ki anmenn konfor ek plezir?’
11 Par kont Parol Bondye i ankouraz nou pour annan en pwennvi balanse konsernan larzan e pour travay dir pour ganny bann keksoz materyel ki nou ek nou fanmir i bezwen. (1 Tim. 5:8) Tou bann ki les zot ganny enfliyanse par lespri sen Bondye pou kapab vin zenere parey Zeova. Bann dimoun koumsa i ganny rekonnet konman bann ki kontan donnen dan plas pran. Zot pli kontan dimoun ki keksoz e zot kontan partaz sa ki zot annan kan zot kapab fer li. (Prov. 3:27, 28) Zot pa zanmen les lanmour pour larzan pas avan zot servis pour Bondye.
12, 13. Konpare avek lespri lemonn, ki mannyer lespri sen Bondye i kapab ed nou?
12 Eski mon personnalite i reflekte lespri lemonn oubyen lespri sen Bondye? (Lir Kolosyen 3:8-10, 13.) Lespri lemonn i promot bann aktivite natir imen enparfe. (Gal. 5:19-21) I pa kan keksoz pe mars byen ki nou pou konnen lekel ki pe enfliyans nou me plito kan keksoz pe al mal, par egzanp si en frer oubyen ser Kretyen i inyor nou, ofans nou oubyen menm fer pese kont nou. Deplis, kan nou kot nou i pou pli evidan ki lespri ki annan plis lenfliyans lo nou. I pou byen pour egzamin nou lekor par demann sa kestyon: ‘Dan sa dernyen sis mwan, eski mon’n devlop bann kalite ki pli parey pour Kris oubyen mon fason koze ek kondwit in retourn parey avan?’
13 Lespri sen Bondye i kapab ed nou pour ‘abandonn nou vye natir avek son bann move labitid’ e pour met lo nou sa “natir nouvo.” Sa pou ed nou pour demontre plis lanmour ek labonte. Nou pou pli pare pour pardonn kanmarad menm si nou annan en bon rezon pour konplent. Nou pou nepli reakte dan en fason kot nou eksprim nou avek ‘move santiman, iritasyon, lakoler’ anver bann lenzistis. O kontrer, nou pou fer bokou zefor pour ki nou “ranpli avek lafeksyon” ek tandres.—Efe. 4:31, 32.
14. Ki pwennvi bokou dimoun i annan lo Parol Bondye?
14 Eski mon demontre respe e kontan bann standar moral ki dan Labib? (Lir Proverb 3:5, 6.) Lespri lemonn i al kont Parol Bondye. Bann ki ganny enfliyanse par sa lespri i rezet serten parti dan Labib ki zot konsider konman en lenkonvenyans, zot prefer bann tradisyon ek filozofi imen. (2 Tim. 4:3, 4) Serten i konpletman inyor Parol Bondye. Bann dimoun koumsa i dir ki Labib pa enportan e i pa egzakt. Andotmo, zot krwar zot pli konnen. Zot pran alalezer son bann standar pir konsernan adilter, omoseksyalite ek divors. Zot dir ki sa “ki byen i mal e sa ki mal i byen.” (Iza. 5:20) Eski sa lespri lemonn i annan en lefe lo nou? Eski nou depan lo lasazes imen, enkli nou prop lopinyon kan nou fer fas avek problenm? Oubyen, eski nou fer bokou zefor pour aplik bann konsey Labib?
15. Olye depan lo nou prop lasazes, ki nou devret fer?
15 Lespri sen Bondye i ed nou devlop respe pour Labib. Parey sa psalmis, nou vwar parol Bondye konman en lalanp pour nou lipye e en lalimyer pour nou semen. (Ps. 119:105) Dan plas depan lo nou prop lasazes, nou depan lo Parol Bondye avek konfyans pour ed nou konn sa ki byen ek sa ki mal. Nou pa zis aprann respekte Labib me nou osi aprann kontan lalwa Bondye.—Ps. 119:97.
Aprann avek legzanp Zezi
16. Ki nou bezwen fer pour devlop menm leta lespri parey Kris?
16 Pour ki lespri sen Bondye i enfliyans nou, nou bezwen devlop menm leta lespri parey Kris. (1 Kor. 2:16) Pour nou kapab vin “parey Zezi-Kri” setadir annan menm latitid parey li, nou bezwen konn lafason ki i ti panse e azir e imit li. (Rom. 15:5; 1 Pyer 2:21) Annou vwar serten fason ki nou kapab fer sa.
17, 18. (a) Ki nou aprann avek Zezi konsernan lapriyer? (b) Akoz nou devret kontinyen demande?
17 Demann lespri sen Bondye dan lapriyer. Zezi ti demann lespri sen Bondye dan lapriyer pour ed li avan ki i ti fer fas avek bann leprev. (Lik 22:40, 41) Nou osi nou bezwen demann Bondye son lespri sen. Zeova i donn gratwitman e zenerezman son lespri sen tou bann ki demann li avek lafwa. (Lik 11:13) Zezi ti dir: “Demande zot a gannyen, rode zot a trouve, frape e laport i a ouver. Akoz, tou dimoun ki demande i gannyen, sa ki rode i trouve e laport i ouver pour sa ki frape.”—Mat. 7:7, 8.
18 Ler nou demann Zeova son lespri sen ek led, annou pa zis demann enn de fwa me kontinyen priy lo la pour en pe letan. Petet nou pou bezwen fer lapriyer pli long e pli souvan. Parfwa, Zeova i donn nou sans pour demontre ki kantite ki nou konsernen e si nou senserman annan lafwa dan li avan ki i reponn nou lapriyer.a
19. Ki Zezi ti toultan fer e akoz nou merit imit li?
19 Obeir Bondye dan tou keksoz. Zezi ti toultan fer sa ki ti fer son Papa plezir. I annan o mwen en fwa kot sa ki Zezi ti anvi fer dan en sityasyon ti diferan avek sa ki son Papa ti anvi. Malgre sa, i ti dir son Papa avek konfyans: “Pa dapre mon lavolonte, me ou lavolonte.” (Lik 22:42) Demann ou lekor: ‘Eski mon obeir Bondye menm kan i pa sitan fasil?’ I enportan pour obeir Bondye si nou anvi ganny lavi. Nou devret obeir li toultan akoz i nou Kreater, i Sours lavi e sa Enn ki gard nou vivan. (Ps. 95:6, 7) Lobeisans pa kapab ganny ranplase avek okenn keksoz. San lobeisans, nou pa kapab ganny laprouvasyon Bondye.
20. Lavi Zezi ti konsantre lo kwa e ki mannyer nou kapab imit li?
20 Konn byen Labib. Zezi ti sit Lekritir kan i ti reziste bann latak direk ki Satan ti fer lo son lafwa. (Lik 4:1-13) Kan i ti koz avek bann opozan relizye, Zezi ti servi Parol Bondye konman sa lotorite. (Mat. 15:3-6) Son lavi antye ti zis konsantre lo konn e akonplir lalwa Bondye. (Mat. 5:17) Nou osi nou anvi kontinyen nouri nou lespri avek Parol Bondye ki kapab fer nou lafwa vin pli solid. (Fili. 4:8, 9) I kapab en defi pour serten trouv letan pour fer letid fanmir oubyen personnel. Me dan plas trouv letan petet nou pou bezwen fer letan.—Efe. 5:15-17.
21. Ki laranzman nou kapab servi pour ed nou konn Parol Bondye pli byen e met li an pratik?
21 “Lesklav fidel e pridan” in ed nou pour annan plis letan pour fer letid personnel ek letid an fanmir par fer laranzman pour Ladorasyon an Fanmir sak semenn. (Mat. 24:45, NW) Eski ou pe servi sa letan byen? Pour ed nou annan menm leta lespri parey Kris, eski ou kapab enkli dan ou letid en porsyon kot ou egzamin regilyerman sa ki Zezi ti ansennyen lo en size ki ou prefere? Ou kapab servi Watch Tower Publications Index pour trouv bann lenformasyon lo sa size ki ou pe rode. Par egzanp, depi 2008 ziska 2010, Latour Veyer edisyon piblik ti annan en seri 12 lartik ki ti annan pour tit “Sa ki nou aprann avek Zezi.” Petet ou kapab servi sa bann lartik konman en baz pour ou letid. Konmansman 2006, i’n annan sa seksyon “How would you answer” dan Awake! Sa kwiz in ganny fer pour agrandi e aprofondir nou konnesans lo Parol Bondye. Akoz ou pa enkli bann lartik koumsa dan ou Ladorasyon an Fanmir detanzaot?
Nou kapab ranport laviktwar lo lemonn
22, 23. Ki nou bezwen fer pour ranport laviktwar lo lemonn?
22 Pour lespri sen Bondye diriz nou, nou bezwen reziste lespri lemonn me i pa fasil. Nou bezwen lite, sa pou en gro batay. (Zid 3) Me nou kapab sorti venker! Zezi ti dir avek son bann disip: “Dan lemonn zot bezwen soufer. Me pran kouraz, mon’n ranport laviktwar lo lemonn.”—Zan 16:33.
23 Nou osi nou kapab ganny laviktwar lo lemonn si nou reziste lenfliyans son lespri e fer tou sa ki nou kapab pour ganny lespri sen Bondye. Vreman, “si Bondye i pour nou, lekel ki pou kapab kont nou?” (Rom. 8:31) Par ganny lespri sen Bondye e swiv son bann direksyon parey in ganny ekrir dan Labib, nou pou trouv kontantman, lape, lazwa e nou pou annan sa lasirans pour viv pour touzour lo later tre byento.
[Not anba lo paz]
a Pour plis lenformasyon, vwar liv Ki Labib i vreman dir? paz 169-173.
Eski ou rapel?
• Akoz lespri lemonn i partou?
• Ki sa kat kestyon ki nou merit demann nou lekor?
• Ki trwa keksoz ki nou aprann avek Zezi konsernan les nou ganny enfliyanse par lespri sen Bondye?
[Portre lo paz 10]
Ki mannyer serten lanz ti vin bann demon?
[Portre lo paz 12]
Satan i servi lespri lemonn pour kontrol dimoun, me nou kapab sorti anba son lenfliyans