Met ou konfyans dan Zeova la ki lafen pe aprose

“Met ou konfyans dan Zeova tou letan.”​—IZA. 26:4.

1. Ki diferans i annan ant bann serviter Zeova ek dimoun dan lemonn?

NOU pe viv dan en lemonn kot plizyer milyon dimoun pa konnen dan kwa oubyen lekel ki zot pou met zot konfyans. Petet akoz zot in deza ganny blese oubyen zot in tro ganny dezapwente. Pa sa i tou le kontrer avek bann serviter Zeova? Akoz zot ganny gide par lasazes ki sorti dan lesyel, zot konnen ki i pa saz pour met zot konfyans dan sa lemonn oubyen bann “dimoun enportan.” (Ps. 146:3) Me o kontrer, zot met zot lavi ek zot fitir dan lanmen Zeova akoz zot konnen ki i kontan zot e ki toultan i akonplir son Parol.​—Rom. 3:4; 8:38, 39.

2. Ki Zozye ti dir lo Zeova?

² Dan letan lontan, Zozye ti konfirmen ki Bondye i diny konfyans. Ver lafen son lavi, i ti dir avek bann Izraelit: “Zot konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot.”​—Zoz. 23:14.

3. Ki non Bondye i revele lo li?

³ Zeova i akonplir son bann promes, pa zis akoz i kontan son bann serviter me i fer li espesyalman akoz son non. (Egz. 3:14; 1 Sam. 12:22) Dan lentrodiksyon The Emphasized Bible, Joseph Rotherham i dir konsernan non Bondye: “[I] vin sa promes pli agreab. Sa kapasite divin pour adapte avek okenn sirkonstans, okenn difikilte, okenn nesesite ki kapab arive . . . [I] en promes, . . .  en revelasyon, en memoryal, en serman. Bondye pou touzour fidel anver sa Non. Son Non pa pou zanmen fer li onte.”

4. (a) Ki Izai 26:4 i ankouraz nou pour fer? (b) Ki nou pou egzaminen dan sa lartik?

⁴ Demann ou lekor: ‘Eski mon konn Zeova ase byen pour annan konfyans total dan li? Eski mon get lavenir avek konfyans akoz mon konnen ki Bondye i annan tou keksoz anba son kontrol?’ Izai 26:4 i dir: “Met ou konfyans dan Zeova tou letan, parski Ya Zeova i sa Ros pour en letan endefini.” I vre, Bondye pa pe entervenir dan lavi bann dimoun dan en fason mirakile parey i ti fer dan letan lontan. Neanmwen, konman “sa Ros pour en letan endefini,” nou kapab met konfyans dan li “tou letan.” Ki mannyer nou Bondye ki diny konfyans i ed son bann adorater fidel ozordi? Annou egzamin trwa fason: I donn nou lafors kan nou rod son led pour reziste tantasyon, i siport nou kan nou fer fas avek bann dimoun ki pa enterese avek nou mesaz oubyen ki opoz nou direkteman e i ankouraz nou kan nou annan bokou lenkyetid. Anmezir ki nou egzamin sa ban laspe, reflesir lo konman ou kapab ranforsi ou konfyans dan Zeova.

Kan ou ganny tante pour fer sa ki mal

5. Kwa ki pou vreman montre ki nou annan konfyans dan Bondye?

⁵ I ase fasil pour met konfyans dan Zeova kan i konsern son promes lo Paradi oubyen rezireksyon akoz sa i bann keksoz ki nou vreman anvi. Me pour met konfyans dan li kot i konsern son bann standar moral i en keksoz totalman diferan. Akoz nou bezwen annan lasirans total dan nou leker ki fer dapre son fason ek standar i byen e ki nou pou ganny sa pli gran boner. Lerwa Salomon ti ekrir sa konsey: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.” (Prov. 3:5, 6) Remarke ki i fer referans avek “semen” ek “santye.” Wi, nou lavi antye i devret demontre ki nou annan konfyans dan Bondye, pa zis sa lespwar ki nou annan konman Kretyen. Ki mannyer nou kapab demontre sa kalite konfyans kan nou ganny tante?

6. Ki mannyer nou kapab pli determinen pour rezet bann move panse?

⁶ Pour pa fer sa ki mal i konmans dan lespri. (Lir Romen 8:5; Efezyen 2:3.) Ki mannyer alor, ou kapab pli determinen pour rezet bann move panse? Konsider sa senk fason: 1. Rod led Bondye atraver lapriyer. (Mat. 6:9, 13) 2. Medit lo bann legzanp dan Labib kot bann dimoun pa ti ekout Zeova ek bann ki ti ekout li. Apre remarke ki mannyer keksoz ti fini pour zot.a (1 Kor. 10:8-11) 3. Reflesir lo ditor ki pese pou fer ou ek bann ki kontan ou, mantalman e emosyonnelman. 4. Mazinen ki mannyer Bondye i dwatet santi kan enn son bann serviter i fer en pese grav. (Lir Psonm 78:40, 41.) 5. Mazin sa lazwa ki lo leker Zeova kan i vwar enn son bann adorater fidel rezet sa ki mal e fer sa ki byen ki swa an piblik ouswa an prive. (Ps. 15:1, 2; Prov. 27:11) Ou osi ou kapab demontre ki ou annan konfyans dan Zeova.

Kan ou fer fas avek bann ki pa enterese avek nou mesaz oubyen lopozisyon

7. Ki difikilte Zeremi ti rankontre e ki mannyer i ti santi li parfwa?

⁷ I annan plizyer nou bann frer ek ser ki pe pres dan bann teritwar kot landirans i en defi en pe pli spesyal. Profet Zeremi ti pres dan en lanvironnman en pe parey. I ti dan rwayonm Zida pandan son bann dernyen zour ki ti ranpli avek boulversman. Son lafwa ti ganny teste toulezour akoz i ti pe obeir Bondye par anons son mesaz zizman. I ti annan en letan kot menm son sekreter fidel, Barouk ti konplent akoz i ti’n fatige. (Zer. 45:2, 3) Eski Zeremi ti les li ganny dekouraze? Parfwa i ti santi li deprimen. I ti dir: “Modi zour mon nesans!” I ti osi demande: “Akoz mon’n sorti dan vant zis pour vwar travay dir ek sagrinasyon e ki mon lavi i fini dan laont?”​—Zer. 20:14, 15, 18.

8, 9. Dapre Zeremi 17:7, 8 ek Psonm 1:1-3, ki nou merit kontinyen fer pour raport bann bon fri?

⁸ Pourtan Zeremi pa ti les tonbe. I ti kontinyen met son konfyans dan Zeova. A lafen, sa profet fidel ti vwar lakonplisman parol Zeova ki ganny rikorde dan Zeremi 17:7, 8: “Beni sa zonm kosto ki met son konfyans dan Zeova e ki Zeova in vin son lasirans. I pou sirman vin parey en pye dibwa ki’n ganny plante o bor delo, ki anvoy son bann rasin lanmenm la kot sa delo i pase e i pa pou ganny afekte avek lasaler me son bann fey pou sirman byen ver. Kan pou annan lasesres i pa pou enkyet, i pa pou ni menm aret prodwir fri.”

⁹ Parey en pye fri ki annan bann fey byen ver ki’n “ganny plante o bor delo” oubyen dan en plantasyon ki annan en bon sistenm irigasyon, Zeremi pa ti zanmen “aret prodwir fri.” I ti refize pour ganny enfliyanse par sa bann moker ki ti tou otour li. O kontrer, i ti reste atase avek Sours sa “delo” ki donn lavi e i ti pran aker tou sa ki Zeova ti dir li. (Lir Psonm 1:1-3; Zer. 20:9) Pa Zeremi i en bon legzanp pour nou, espesyalman pour bann ki pe servi Bondye dan en teritwar ki difisil! Si ou dan en sityasyon parey, kontinyen depan antyerman lo Zeova ki pou donn ou landirans anmezir ki ou ‘loue son non par ou labous.’​—Ebr. 13:15.

10. Ki benediksyon nou’n gannyen e ki kestyon nou devret demann nou lekor?

¹⁰ Zeova in donn nou en zoli paradi spirityel pour ed nou avek bann difikilte ki nou eksperyanse dan lavi pandan sa bann dernyen zour. Par egzanp, i’n fourni nou avek son Parol konplet Labib ki pe ganny tradwir dan en fason egzakt dan plis langaz. I’n met dan nou dispozisyon bann manze spirityel dan sa bon moman atraver lesklav fidel e pridan. I’n donn nou osi lanmitye sa kantite frer ek ser ki siport nou kot lasal ek bann lasanble. Eski ou servi byen sa bann provizyon? Tou bann ki fer sa “pou kriye avek lazwa akoz zot annan lakontantman dan zot leker.” Me bann ki pa profit o maksimonm sa provizyon “pou kriye akoz douler dan zot leker e zot pou irle senpleman akoz depresyon.”​—Iza. 65:13, 14.

Kan ou fer fas avek lenkyetid

11, 12. An rapor avek bann problenm dan sa lemonn, ki bon desizyon nou merit pran?

¹¹ Parey i’n ganny predir, imen pe ganny inonde avek problenm. (Mat. 24:6-8; Rev. 12:12) Parey kan en gro linondasyon i arive, laplipar dimoun pou tay dan en landrwa ki pli o par egzanp mont lo twa en batiman oubyen nenport keksoz ki pli o ki kot zot ete. Pareyman pli problenm i entansifye, plizyer milyon dimoun i rod refiz dan bann lorganizasyon ki paret an sekirite parey bann lorganizasyon politik, komersyal e relizye osi byen ki lasyans ek teknolozi. Me ni enn sa bann lorganizasyon pa anmenn vre sekirite. (Zer. 17:5, 6) Bann serviter Zeova de lot kote, i annan en vre landrwa refiz, zot annan “sa Ros pour en letan endefini.” (Iza. 26:4) Sa psalmis ti dir: “[Zeova] i mon ros e mon delivrans, en oter kot mon an sekirite.” (Lir Psonm 62:6-9.) Ki mannyer nou kapab fer sa Ros vin nou refiz?

¹² Nou reste atase avek Zeova kan nou swiv son Parol ki souvan diferan avek lasazes imen. (Ps. 73:23, 24) Par egzanp, bann dimoun ki ganny enfliyanse par lasazes imen i kapab dir: ‘Profite, ou annan zis en sel lavi.’ ’Rod en bon karyer.’ ‘Fer en ta larzan.’ ’Aste isi, aste laba.’ ‘Vwayaze, vizit lemonn.’ Lasazes Bondye i annakor avek sa konsey: ‘Bann ki pe profite dan lemonn, fer konmsi zot pa ganny okenn profi, parski lemonn konman i ete, pa pou dir lontan.’ (1 Kor. 7:31) Pareyman, Zezi i konsey nou pour met lentere Rwayonm premye e akimil “larises dan lesyel” kot i pou definitivman an sekirite.​—Mat. 6:19, 20.

13. Ki nou devret demann nou lekor ler nou lir 1 Zan 2:15-17?

¹³ Eski ou latitid anver “sa lemonn” ek “sa bann keksoz ki dan lemonn” i montre ki ou annan konfyans total dan Bondye? (1 Zan 2:15-17) Eski bann larises spirityel ek privilez dan servis Rwayonm i pli atiran e pli enportan pour ou ki sa ki sa lemonn i annan pour ofer? (Fili. 3:8) Eski ou fer bokou zefor pour kontinyen viv en lavi senp? (Mat. 6:22) Byensir, Bondye i anvi ki ou montre ou responsab e pridan sirtou si ou annan en fanmir pour pran swen avek. (1 Tim. 5:8) Me i ekspekte son bann serviter pour met tou zot konfyans dan li, me non pa dan sa lemonn Satan ki pe koule.​—Ebr. 13:5.

14-16. Par gard en lavi senp ek lentere Rwayonm premye, ki byenfe serten dimoun in gannyen?

¹⁴ Annou konsider legzanp Richard ek Ruth, paran trwa zanfan. Richard i dir: “Mon leker ti pe dir mwan ki mon ti kapab fer plis pour Zeova. Mon ti annan en lavi konfortab me mon ti santi ki mon ti pe zis donn Bondye sa ki mon ti annan an plis. Apre ki nou ti’n priy lo sa size e analiz nou sityasyon finans, nou de Ruth nou ti dakor ki mon demann mon soupervayzer pour travay zis kat zour dan en semenn menm si pei ti pe pas atraver en kriz ekonomik. Mon demann ti ganny aprouve e mon ti konmans travay dapre mon nouvo laranzman dan lespas en mwan.” Ki mannyer Richard i santi li aprezan?

¹⁵ I dir: “Mon lapey in diminyen par ven poursan konpare avek oparavan, me aprezan mon annan senkant zour an plis dan en lannen pour pas avek mon fanmir e edik mon bann zanfan. Mon kapab fer de fwa plis dan predikasyon, lakantite letid Labib ki mon annan in triple e mon annan plis letan pour desarz bann responsabilite dan kongregasyon. Vi ki mon annan plis letan pour pas avek bann zanfan, Ruth i kapab fer pionye asistan detanzaot. Mon determinen pour kontinyen avek sa laranzman tan ki i posib.”

¹⁶ Roy ek Petina, ki annan en fiy ki ankor reste dan lakour, in nobou diminyen lakantite letan ki zot ti travay pour zot kapab fer servis a plen tan. Roy i dir: “Mon travay trwa zour dan en semenn e Petina i travay de zour. Nou ti osi deside pour viv dan en apartman dan plas en lakaz akoz i pli fasil pour pran swen avek. Nou ti fer pionye avan ki nou ti ganny nou fiy ek nou garson e nou pa’n zanmen perdi sa dezir pour fer pionye. Alor, kan nou bann zanfan in grandi, nou ti deside pour retourn dan servis a plen tan. Napa en sonm larzan ki kapab ranplas sa bann benediksyon ki nou’n gannyen.”

Les “lape Bondye” protez ou leker

17. Vi ki nou pa sir lo lavenir, ki mannyer Lekritir in rekonfort ou?

¹⁷ Napa enn parmi nou ki konnen ki pou arive demen akoz “letan ek levennman san ekspekte” i ariv lo nou tou. (Ekle. 9:11) Par kont, vi ki nou pa sir lo lavenir sa pa devret anpes nou annan lape lespri ozordi parey i souvan le ka avek bann ki napa sa sekirite ki ou gannyen kan ou annan en bon relasyon avek Bondye. (Mat. 6:34) Zapot Pol ti ekrir: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri.”​—Fili. 4:6, 7.

18, 19. Ki mannyer Bondye i rekonfort nou? Donn legzanp.

¹⁸ I annan bokou frer ek ser ki’n eksperyans sa lape lespri ki Zeova i donnen kan zot in pas atraver bann moman difisil. En ser ti dir: “En sirizyen ti esey fors mwan a plizyer repriz pour pran disan. Enn bann premye keksoz ki i ti dir mwan sak fwa ki i ti vwar mwan ti: ‘Ou pa ase bet, akoz ou pa pran disan?’ A sa moman e lezot fwa mon ti fer lapriyer avek Zeova an silans e mon ti santi son lape. Mon ti santi mwan for parey en ros. Menm si mon ti fay akoz mon nivo disan ti ba, mon ti kapab eksplike byen kler dapre Labib akoz mon’n pran sa desizyon.”

¹⁹ Parfwa Bondye i kapab donn nou sipor atraver rekonfor sorti kot en frer oubyen ser oubyen atraver manze spirityel kan i ler. Petet ou’n deza tann en frer oubyen ser dir: “Sa lartik i zis sa ki mon ti bezwen. I’n ganny ekrir espesyalman pour mwan!” Wi, dan nenport ki sityasyon nou trouv nou ladan oubyen nenport ki led ki nou bezwen, Zeova pou demontre son lanmour anver nou si nou met konfyans dan li. Apre tou, nou son bann “mouton” e i’n donn nou sa privilez pour port son non.​—Ps. 100:3; Zan 10:16; Akt 15:14, 17.

20. Akoz bann serviter Zeova pou viv an sekirite ler lemonn Satan pou ganny detrir?

²⁰ Pandan “zour firer Zeova” ki pe aprose tre vit, tou sa ki bann dimoun dan lemonn Satan pe met konfyans ladan pou degrengole. Ni lor, ni larzan, ni okenn keksoz valer pa pou fourni okenn sekirite. (Tsef. 1:18; Prov. 11:4) Nou sel refiz pou sa “Ros pour en letan endefini.” (Iza. 26:4) Annou alor demontre ki nou met tou nou konfyans dan Zeova la konmela par mars lo son semen ladrwatir avek lobeisans, par anons son mesaz lo Rwayonm menm si nou fer fas avek bann dimoun ki pa enterese avek nou mesaz oubyen opoz nou e par met tou nou lenkyetid lo li. Anmezir ki nou fer sa, nou pou “reste an sekirite e [nou] pou viv dan trankilite san per maler.”​—Prov. 1:33.

[Not anba lo paz]

Eski ou kapab eksplike?

Ki mannyer nou kapab met konfyans dan Bondye

• kan nou ganny tante pour fer sa ki mal?

• kan nou fer fas avek bann ki pa enterese avek nou mesaz oubyen lopozisyon?

• kan nou fer fas avek lenkyetid?

[Portre lo paz 15]

Nou pou ganny lazwa ler nou reste atase avek bann standar Zeova

[Portre lo paz 17]

“Zeova i sa Ros pour en letan endefini”