Lekel Abraam?

NAPA bokou zonm ki’n annan otan lefe lo bann larelizyon dan lemonn. Abraama i en personnaz ki bann Zwif, Mizilman ek Kretyen i respekte e i ganny dekrir konman en personnaz enportan dan Lekritir e en gran legzanp lafwa. Labib i refer avek li konman “papa tou sa ki kwar” ouswa ki annan lafwa. ​—Romen 4:11.

Akoz dimoun i annan gran respe pour Abraam? En keksoz nou kapab dir se ki Abraam i sa sel dimoun ki Labib i direkteman apel zanmi Bondye, e pa zis en fwa, sa lekspresyon i aparet trwa fwa. ​—2 Kronik 20:7, not anba lo paz; Izai 41:8; Zak 2:23.

Me, Abraam ti en dimoun ordiner parey nou menm. Parey nou menm, i ti bezwen lite pour fer fas avek difikilte e i ti reisi dan son zefor. Eski ou ti pou kontan konnen ki mannyer i ti fer sa? Annou egzamin sa ki Labib i dir lo sa zonm remarkab.

Son lorizin

Abraam ti ne lannen 2018 A.N.L., e i ti grandi dan lavil Our. (Zenez 11:27-31) Our ti en gran lavil byen prospere. Ladorasyon zidol ti popiler laba. Tre probab, papa Abraam ki ti apel Tera ti osi parmi sa bann ki ti ador diferan zidol. (Zozye 24:2) Me, Abraam li i ti swazir pour ador zis Zeovab tousel olye sa bann zidol ki ti reprezant lezot bondye.

Kwa ki ti pous Abraam pour fer sa desizyon? Be, i ti viv dan menm lepok ki garson Noe ki ti apel Sem, akoz i ti ne 150 an avan ki Sem ti mor. Si i ti’n frekant sa zonm sa laz, ki lefe sa ti’n kapab annan lo li? Abraam ti’n kapab konn santiman Sem konman en sirvivan Deliz. Petet, i ti’n osi aprann konsernan lenportans pour ador Zeova, sa Bondye ki ti’n sov lavi Sem ek son fanmir pandan sa gran Deliz.

Ki swa i ti konn sa ki i ti konnen atraver Sem ouswa par lezot mwayen, Abraam ti kontan sa ki i ti aprann lo sa vre Bondye. Kan Zeova, “sa enn ki egzamin leker” ti obzerv Abraam, i ti vwar en bon keksoz dan sa zonm e i ti ed Abraam pour vin en pli bon zonm ankor. ​—Proverb 17:3; 2 Kronik 16:9.

Son lavi

Abraam ti viv pour en kantite letan e i ti annan en lavi eksitan, enn kot i ti annan bann defi, me son lavi ti annan en vre sans. Annou egzamin zis detrwa keksoz ki i ti pas atraver.

▪ Letan ki Abraam ti reste Our, Bondye ti demann li pour kit son pei natal e al dan en pei ki I ti pou montre li. Menm si Abraam ek Sara pa ti konn tou detay konsernan kote zot ti pe ale e akoz Bondye ti’n demann zot pour kit zot pei, zot ti obeir. Abraam ek Sara ti finalman reste anba latant dan pei Kanaan e zot ti viv konman bann vwayazer tou zot lavi. ​—Akt 7:2, 3; Ebre 11:8, 9, 13.

▪ Abraam ek Sara ti napa zanfan kan Zeova ti promet ki desandans Abraam ti pou vin en gran nasyon. Zeova ti osi azoute ki tou bann fanmir lo later ti pou ganny beni atraver Abraam. (Zenez 11:30; 12:1-3) Pli tar, Zeova ti konfirm sa promes. I ti dir Abraam ki son desandans ti pou vin bokou parey zetwal dan lesyel. ​—Zenez 15:5, 6.

▪ Kan Abraam ti annan 99 an e Sara ti pros 90 an, Zeova ti promet zot ki zot ti pou ganny en garson. Dapre pwennvi en imen, sa ti kapab paret enposib, me i pa ti pran bokou letan pour Abraam ek Sara konpran ki “napa nanryen ki tro ekstraordiner pour Zeova.” (Zenez 18:14) Enn an pli tar, a laz 100-t-an, Abraam ti vin papa en garson ki i ti apel Izaak. (Zenez 17:21; 21:1-5) Bondye ti spesifikman promet ki atraver Izaak limanite ti pou ganny bann gran benediksyon.

▪ En pe letan pli tar, Zeova ti demann Abraam pour fer en keksoz en pe drol. I ti demann Abraam pour sakrifye Izaak, son garson byenneme, menm si sa zenn onm pa ti ankor marye e annan zanfan. Menm si lanmor son garson ti pou’n sagrin li, Abraam ti pare pour obeir e ofer son garson konman en sakrifis. Abraam ti totalman krwar ki Bondye ti annan sa pouvwar pour resisit son garson si neseser pour realiz Son promes. (Ebre 11:19) Letan Abraam ti pe al ofer son garson, lanmenm ler Bondye ti entervenir e sov lavi Izaak. I ti felisit Abraam pour son lobeisans remarkab. Apre sa, Zeova ti repet sa promes ki i ti’n fer avek Abraam. ​—Zenez 22:1-18.

▪ Abraam ti mor a laz 175 an. Labib i dir ki i ti “mor en bon laz, vye e satisfe.” (Zenez 25:7, 8) Dan sa fason, Abraam ti eksperyans lakonplisman en lot promes ki Bondye ti’n fer avek li konmkwa i ti pou viv pour en kantite letan avan i mor anpe. ​—Zenez 15:15.

Sa ki i’n kit deryer

Abraam i plis ki zis en personnaz ki renonmen dan bokou larelizyon ouswa en personnaz istorik ki’n viv byen byen lontan. Ziska dan nou letan, i en bon legzanp pour nou tou imite. (Ebre 11:8-10, 17-19) Annou egzamin kat bon kalite ki Abraam ti demontre. I ti renonmen pour son lafwa, alor, annou konmans par sa kalite remarkab.

[Not anba lo paz]

[Bwat lo paz 4]

En personnaz enportan dan Labib

Lavi plizyer zonm fidel parey Abel, Enok ek Noe i ganny koz lo la dan sa premye dis sapit dan liv Zenez. Me, dan sa 15 lezot sapit ki swiv i koz lo lavi zis en sel zonm e sa se Abraam.

An plis ki sa, Labib i servi serten lekspresyon vreman enportan pour premye fwa an rapor avek Abraam. Par egzanp, dan biografi Abraam nou trouv . . .

▪ premye fwa ki Bondye i ganny dekrir konman en Boukliye ouswa Protekter pour son serviter. ​—Zenez 15:1; vwar osi Deterononm 33:29; Psonm 115:9; Proverb 30:5.

▪ premye fwa ki met lafwa dan Bondye i ganny mansyonnen. ​—Zenez 15:6.

▪ premye landrwa ki sa mo profet i ganny servi. ​—Zenez 20:7.

▪ premye fwa ki lanmour en paran i ganny mansyonnen. ​—Zenez 22:2.