Pour bann ki kontan Zeova, ‘napa lobstak ki fer tonbe’
“Bann ki kontan ou lalwa i ganny lape annabondans, e pour zot, napa okenn lobstak ki fer zot tonbe.”—PS. 119:165.
KI OU POU REPONN?
Dan ki sans bann Kretyen i dan en lakours e ki pri zot pou gannyen?
Ki ros ki kapab fer en Kretyen tonbe?
Dan ki sans napa en lobstak ki fer tonbe pour bann ki kontan lalwa Zeova?
1. Ki mannyer latitid en atlet i montre nou lenportans determinasyon pour pa kit dan semen?
DEPI laz adolesan, Mary Decker ti renonmen konman enn bann pli gran atlet dan lemonn. Li ki ti annan gran sans pour ranport meday lor dan final 3,000 met Summer Olympics 1984. Me, son lipye pa ti zanmen ariv kot laliny finisyon. I ti may dan lipye en lot atlet e i ti tonm aplat ater. Dan douler e avek larm, dimoun ti bezwen vini pour retir li lo track. Me, Mary pa ti pou zis aret tou. Dan mwens ki enn an, i ti rekonmans taye e an 1985, i ti kas rikord mondyal pour bann madanm ki tay long zistans.
2. Dan ki sans bann vre Kretyen i dan en lakours e ki nou devret konsantre lo la?
2 Konman Kretyen, nou dan en lakours, en paryaz taye senbolik. Nou devret pe tay avek bi pour ranport sa lakours. Nou pa dan en sprint, kot nou bezwen tay vit pour ranport laviktwar. Nou pa ni pe zis tay en kou e tanzantan nou aret en pti kou. Plito, nou lakours i kapab ganny konpare avek en maraton kot landirans i neseser pour ranport laviktwar. Zapot Pol ti servi konparezon en atlet dan en lakours dan son let pour bann Kretyen Korent, en lavil ki ti renonmen pour son bann konpetisyon atletik. I ti ekrir: “Zot pa konnen ki dan en lakours tou i taye, me zis enn ki ganny premye pri. Tay dan en fason pour ganny sa pri.”—1 Kor. 9:24.
3. Dan ki sans tou atlet i kapab ranport laviktwar dan sa lakours pour lavi eternel?
3 Labib i dir nou tay dan sa lakours senbolik. (Lir 1 Korentyen 9:25-27.) Pri pour sa lakours se lavi eternel, ki swa dan lesyel pour bann Kretyen swazir ouswa lo later pour larestan partisipan. Kontrerman avek laplipar konpetisyon atletik, tou partisipan ki andire ziska lafen dan sa enn lakours i annan sa loportinite pour ganny sa pri. (Mat. 24:13) Bann partisipan i perdi si selman zot pa reisi tay dapre regilasyon ouswa zot pa pas laliny finisyon. Deplis, sa i sel lakours ki son pri se lavi eternel.
4. Akoz i difisil pour fini sa lakours pour ganny lavi eternel?
4 I pa fasil pour pas laliny finisyon. I demann disiplin e ou bezwen asire ki ou anvi fer pour arive fer li. Zis Zezi Kri ki’n reisi pas laliny finisyon san ki i tonm menm en fwa. Me, Zak, enn son disip ti ekrir ki bann disip Kris i “komet lerer [oubyen tonbe] dan plizyer mannyer.” (Zak 3:2) Pa i vre sa! Nou tou nou bezwen lit avek nou prop lenperfeksyon ek lenperfeksyon lezot. Alor, parler nou kapab tap nou lipye, mank lekilib e perdi vites. Nou menm kapab arive tonbe, me nou leve e kontinyen taye. Serten in sitan mal tonbe ki zot in bezwen led pour leve e kontinyen dan sa lakours pour pas laliny finisyon. Alor, i kapab arive ki pandan en serten letan oubyen menm tanzantan nou arive komet lerer ouswa tonbe.—1 Rwa. 8:46.
SI OU TONBE, RESTE DAN SA LAKOURS
5, 6. (a) Dan ki sans, pour en Kretyen, ‘napa okenn lobstak ki fer tonbe’ e kwa ki kapab ed li releve? (b) Akoz serten pa releve apre ki zot in tonbe?
5 Sa ki nou fer ler nou tonbe i montre ki kalite dimoun nou ete. Serten i tonbe, me zot repantir e kontinyen servi Bondye. Par kont, lezot i swazir pour pa repantir. Get par egzanp, Proverb 24:16 ki dir: “En dimoun drwat i kapab tonm menm set fwa, me definitivman i pou leve, par kont bann move dimoun pou tonbe akoz maler.”
6 Zeova pa pou zanmen les sa bann ki annan konfyans dan li tonbe akoz en difikilte ouswa lobstak dan zot ladorasyon, ziska en degre ki zot pa pou zanmen kapab releve. Nou asire ki Zeova pou ed nou “leve” pour ki nou kontinyen donn li tou nou devosyon. Eski pa sa i en parol rekonfortan pour tou sa ki kontan Zeova avek tou zot leker? Bann move napa sa menm dezir pour leve. Zot pa rod led lespri sen Zeova ek led son pep ouswa zot refiz led ki zot ganny ofer. De lot kote, pour bann ki ‘kontan lalwa Zeova,’ napa okenn lobstak ki kapab kit zot ater dan en fason permanan dan sa lakours pour lavi.—Lir Psonm 119:165.a
7, 8. Ki mannyer en dimoun i kapab “tonbe” e kantmenm sa annan laprouvasyon Bondye?
7 Serten in arive fer bann pti fot, menm repet li plizyer fwa akoz en kek febles. Me zot ankor ganny konsidere drwat dan lizye Bondye si zot kontinyen “leve,” setadir, zot senserman repantir e fer bokou zefor pour arive reste fidel avek li. Nou kapab trouv sa dan lafason ki Bondye ti reazir anver nasyon Izrael dan letan lontan. (Iza. 41:9, 10) Dan Proverb 24:16 ki nou’n site pli boner, olye met lanfaz lo sa bout negatif, andotmo, lefet ki nou “tonbe,” sa verse i met lanfaz lo sa bout pozitif, setadir lefet ki nou “leve” avek led nou Bondye mizerikord. (Lir Izai 55:7.b) Pour eksprim zot konfyans dan nou, Zeova ek Zezi Kri i zantiman ankouraz nou pour “leve.”—Ps. 86:5; Zan 5:19.
8 Menm si en atlet i pros pour tonbe oubyen arive tonbe dan en maraton, i kapab annan letan pour releve e fini sa lakours si i azir deswit. Dan nou lakours pour ganny lavi eternel, nou pa konn “sa zour e sa ler” kan lafen sa lakours pou arive. (Mat. 24:36) Kantmenm sa, pli nou pa tonbe, nou annan plis sans pour gard en bon vites taye, reste dan sa lakours e reisi fini li. Alor, ki mannyer nou kapab evite tonbe?
LOBSTAK KI RALANTI PROGRE
9. Ki lobstak nou pou koz lo la?
9 Nou prop febles, move dezir, lenzistis avek lezot Kretyen, sityasyon difisil ouswa persekisyon ek lenperfeksyon lezot i senk lobstak ki kapab fer nou tonbe. Annou egzamin zot. Me avan tou, rapel byen ki si nou’n deza tonbe Zeova i vreman pasyan avek nou. I pa deswit konsider nou enfidel.
10, 11. Ki kalite febles David ti bezwen lit avek?
10 Nou prop febles i kapab ganny konpare avek bann ros eparpiye partou dan semen. Si nou egzamin leksperyans Lerwa David ek zapot Pyer, nou kapab trouv de sa kalite febles, mank kontrol ek lafreyer pour zonm.
11 Febles Lerwa David se ki i ti napa kontrol lo son lekor parey nou kapab vwar dan sa ki ti arive avek Bat-Seba. Deplis, apre ki Nabal ti’n ensilte li, David ti pros pour azir san reflesir. Dan tou le de ka, i ti napa ase kontrol lo son lekor, me pourtan i pa ti zanmen aret esey fer plezir Zeova. Avek led lezot, i ti kapab reganny son lekilib spirityel.—1 Sam. 25:5-13, 32, 33; 2 Sam. 12:1-13.
12. Ki mannyer Pyer ti kontinyen dan sa lakours menm si i ti tonbe?
12 Pyer li, i ti annan lafreyer pour zonm, i ti tonbe par ler, me pourtan i ti reste fidel avek Zezi ek Zeova. Par egzanp, i ti piblikman renye son Met, pa zis en fwa, me trwa fwa. (Lik 22:54-62) Plitar, Pyer pa ti reisi azir avek lanmour Kretyen, i ti tret bann krwayan lezot nasyon dan zar konmsi zot ti pli enferyer ki bann Kretyen Zwif sirkonsi. Me, zapot Pol ti konpran klerman ki dan kongregasyon napa plas pour fer distenksyon dapre ran sosyal. Pyer ti annan en move latitid. Toudmenm, avan ki latitid Pyer ti konmans afekte kongregasyon, Pol ti azir deswit pour konsey li direkteman e fas a fas. (Gal. 2:11-14) Eski Pyer ti sitan ofanse ki sa ti fer li abandonn lakours pour lavi? Non. I ti reflesir seryezman lo konsey Pol, aplik li e kontinyen dan sa lakours.
13. Ki mannyer en febles fizik i kapab en lobstak pour nou?
13 Parler, en febles personnel i kapab akoz en problenm lasante. Sa osi i kapab en lobstak ki fer tonbe. I kapab enterfer avek nou vites spirityel e menm fer nou drive e fatige. Par egzanp, 17 an apre son batenm, en ser Zaponnen ti soufer avek en problenm lasante. I ti telman enkyet pour son lasante ki i ti pe afeblir spirityelman. Avek letan, i ti vin inaktif. De ansyen ti vizit li. I ti telman ganny ankouraze avek zot parol tousan ki i ti rekonmans asiste renyon ankor. I dir, “Mon ti plere akoz sa bann frer ti akey mwan avek bokou lafeksyon.” Nou ser in retourn ankor dan sa lakours.
14, 15. Ki aksyon serye nou bezwen pran ler nou annan bann move dezir? Donn legzanp.
14 Move dezir in fer bokou tonbe. Kan nou ganny tante dan sa fason, nou bezwen pran bann aksyon serye pour arive reste pir mantalman, moralman e spirityelman. Rapel byen ki dan en sans senbolik, Zezi ti konsey nou pour “zet” okenn keksoz ki kapab en lobstak pour nou, menm nou lizye ouswa lanmen. Eski pa sa i devret enplik bann move fason panse ek aksyon imoral ki’n fer bokou abandonn sa lakours?—Lir Matye 5:29, 30.
15 En frer ki ti grandir dan laverite ti ekrir ki pour en bon pe letan, i ti bezwen lalit avek bann dezir omoseksyel. I ti dir: “Mon ti toultan santi mwan gos, ki mon pa ti santi mwan alez okenn par.” A laz 20-t-an, i ti’n vin en pionye ordiner ek en asistan ministeryel dan kongregasyon. Apre sa, i ti fer en gro tonbe, i ti ganny disiplinen e ganny led avek bann ansyen. Lapriyer, letid lo Parol Bondye ek son lanvi pour ed lezot, ti ed li pour releve e repran son vites spirityel. En bann lannen pli tar, i admet: “Parler mon ankor annan sa bann santiman, me mon pa les zot kontrol mwan. Mon’n aprann ki Zeova pa pou les en dimoun ganny tante plis ki i kapab siporte. Alor, mon krwar ki Bondye i konnen mon kapab fer li.” Sa frer i terminen an dizan: “Tou sa bann lalit ki mon’n fer pou ganny rekonpanse dan nouvo lemonn. Se sa ki mon anvi! Me, ziska ki sa i arive, mon pou kontinyen lalit.” I determinen pour reste dan sa lakours.
16, 17. (a) Kwa ki ti ed en frer ki ti santi i ti’n sibir en lenzistis? (b) Lo kwa nou devret konsantre pour ki nou pa tonbe?
16 Lenzistis avek lezot Kretyen i kapab en lobstak ki fer tonbe. Lafrans, en ansyen ki ti perdi son privilez ti krwar ki i ti viktim en lenzistis, alor i ti pran en gran lakoler. Akoz sa, i ti aret asosye avek kongregasyon e vin inaktif. De ansyen ti vizit li e ekout li avek pasyans, san enteronp li anmezir i ti rakont zot son zistwar, parey ki i ti santi. Zot ti ankouraz li pour zet son fardo lo Zeova e montre li ki sa ki pli enportan se pour fer plezir Zeova. I ti aksepte zot konsey e pa bokou letan apre, i ti retourn dan sa lakours. I ti vin aktif dan bann aktivite kongregasyon ankor.
17 Tou Kretyen i devret reste konsantre lo Zezi Kri, sa enn ki’n ganny apwente Sef kongregasyon, pa lo bann imen enparfe. Zezi, ki son lizye i “parey en laflanm dife,” i vwar tou keksoz avek en bon perspektiv e i vwar plis ki sa ki nou kapab vwar. (Rev. 1:13-16) Par egzanp, i konnen ki sa ki paret konman en lenzistis pour nou, i kapab zis en mal enterpretasyon ouswa mal konprenezon lo nou par. Zezi pou okip bezwen kongregasyon dan en fason parfe e dan sa bon moman. Alor, nou pa devret les aksyon ouswa desizyon okenn lezot Kretyen vin en lobstak pour nou lafwa.
18. Ki mannyer nou kapab siport leprev ek bann sityasyon difisil?
18 De lezot lobstak ki kapab fer nou tonbe se bann sityasyon difisil ouswa persekisyon ek lenperfeksyon lezot dan kongregasyon. Dan son parabol lo senmer lagrenn, Zezi ti dir ki “troub ek persekisyon” avek sa lemonn i kapab fer serten dimoun tonbe. Nenport kote sa persekisyon i sorti, ki swa avek manm fanmir, vwazen ouswa lotorite dan gouvernman, i pou definitivman annan lefe lo en dimoun ki “napa rasin,” andotmo, en dimoun ki pa ase profon spirityelman. (Mat. 13:21) Me, si nou annan sa bon kondisyon leker, lagrenn Rwayonm pou ed nou devlop bann rasin ki al o profon e fer nou annan en lafwa solid. Kan ou fer fas avek leprev, fer bokou zefor pour medite e priy lo bann keksoz ki merit laglwar. (Lir Filipyen 4:6-9.) Avek lafors Zeova, nou pou reisi siport bann leprev, e pa les bann sityasyon difisil vin en lobstak pour fer nou tonbe.
19. Ki mannyer nou kapab anpese ki en lofans i vin en lobstak pour nou?
19 Malerezman, avek letan ki’n pase, serten in les lenperfeksyon lezot fer zot abandonn sa lakours. Bann diferan pwennvi lo bann keksoz ki annan pour fer avek konsyans in vin en lobstak ki’n fer zot tonbe. (1 Kor. 8:12, 13) Si en dimoun i ofans nou, eski nou pou fer en gro problenm akoz sa? Labib i ankouraz bann Kretyen pour aret zize, pour pardonn lezot e pour pa ensiste lo zot drwa. (Lik 6:37) Kan ou rankontre enn sa lobstak ki konman en ros dan ou semen, demann ou lekor: ‘Eski mon pe ziz lezot dapre mon prop preferans? Lefet ki mon konnen mon frer i enparfe, eski mon pou les son lenperfeksyon fer mwan abandonn sa lakours pour lavi?’ Lanmour pour Zeova i kapab ed nou reste determinen pour pa les nanryen ki en lot imen i fer vin en lobstak pour anpes nou pas laliny finisyon.
TAY AVEK LANDIRANS, PA TONBE
20, 21. Ki ou determinen pour fer dan sa lakours pour lavi?
20 Eski ou determinen pour “fini sa lakours”? (2 Tim. 4:7, 8) Savedir, letid personnel i en priyorite. Servi Labib ek nou bann piblikasyon teokratik pour ed ou fer resers, medite, e idantifye bann lobstak ki kapab fer ou tonbe. Sipliy Bondye pour son lespri sen pour ki ou ganny sa lafors spirityel ki ou bezwen. Rapel byen, napa en atlet ki pa pou reisi fini sa lakours pour lavi zis akoz i ti pros pour tonbe ouswa i ti tonbe par ler. I kapab leve e kontiny sa lakours. I menm kapab sot lo sa bann ros, olye les zot vin en lobstak pour li, e i osi kapab aprann bann leson enportan avek bann defi ki teste son lafwa.
21 Labib i dir ki dan sa lakours pour lavi eternel, fodre ki nou partisip ladan, pa zis gete. I pa konmsi ou pe anbark dan en bis ki anmenn bann ki ladan direkteman ver laviktwar. Fodre absoliman nou tay sa lakours pour lavi nou menm. Anmezir nou fer li, “labondans lape” sorti kot Zeova pou parey divan deryer nou ki pous nou dan sa bon direksyon. (Ps. 119:165) Nou kapab annan konfyans ki i pou kontinyen beni nou e ki bann ki fini sa lakours pou ganny bann benediksyon eternel.—Zak 1:12.
[Not anba lo paz]
a Psonm 119:165: “Bann ki kontan ou lalwa i ganny lape annabondans, e pour zot, napa okenn lobstak ki fer zot tonbe.”
b Izai 55:7: “Ki sa zonm move i kit son fason fer e sa zonm ki fer ditor i sanz son fason panse; e ki i retourn kot Zeova, ki pou demontre mizerikord anver li e retourn ver nou Bondye akoz i pou pardonn nou en kantite.”
[Portre lo paz 3]
[Portre lo paz 4]
Si ou tonbe, aksepte led e leve!
[Potre lo paz 7]
Pa les nanryen anpes ou fini sa lakours!