“Lekel sa lesklav fidel e pridan?”
“Lekel sa [“lesklav fidel e pridan,” NW] ki son met in plas ansarz tou lezot serviter pour donn zot zot manze kan i ler?”—MAT. 24:45.
ESKI OU KAPAB REPONN?
Lekel sa lesklav fidel e pridan?
Lekel bann serviter e kan ki Zezi ti met sa lesklav fidel ansarz zot?
Kan ki Kris pou met sa lesklav fidel ansarz tou son byen e ki i pou enkli?
1, 2. Atraver lekel Zezi pe nouri nou ozordi e akoz i vreman enportan ki nou konnen lekel li?
“FRER, mon vreman pa kapab kont sa kantite fwa ki zot in fer mwan ganny bann lartik ki annan sa ki mon bezwen, zis ler mon pli bezwen li.” Koumsa ki en ser ti eksprim son lapresyasyon dan en let ki i ti ekrir bann frer ki travay kot nou biro prensipal. Eski ou santi parey li? Laplipar nou, wi. Eski sa i devret sirprann nou? Pa vreman.
2 Sa nouritir spirityel ki nou gannyen zis a ler i en laprev ki Zezi, Sef kongregasyon, pe gard son promes pour nouri nou. Atraver lekel i pe fer sa? Kan i ti pe koz lo siny son prezans, Zezi ti dir ki i ti pou servi “sa lesklav fidel e pridan” pour donn bann serviter “manze kan i ler.”a (Lir Matye 24:45-47.b) Sanmenm sa lesklav ki Zezi i servi pour nouri son bann vre disip dan sa letan lafen. I vreman enportan ki nou konnen lekel sa lesklav fidel. Nou lasante spirityel ek nou relasyon avek Bondye i depan lo sa mwayen ki Zezi i servi.—Mat. 4:4; Zan 17:3.
3. Ki nou piblikasyon ti dir dan lepase konsernan sa legzanp lo sa lesklav fidel?
3 Alor, ki mannyer nou devret konpran legzanp Zezi konsernan sa lesklav fidel? Nou bann piblikasyon ti dir sa dan lepase: Zour Lapannkot lannen 33 N.L., Zezi ti met sa lesklav ansarz son bann serviter. Sa lesklav i reprezant tou Kretyen swazir lo later konman en group nenport ki lepok depi lannen 33 N.L. Bann serviter ti pe refer avek sa bann menm Kretyen swazir, me endividyelman. An 1919, Zezi ti met lesklav fidel ansarz “tou son byen,” andotmo tou sa ki relye avek lentere Rwayonm lo later. Me, apre en letid pli o profon, lapriyer ek meditasyon, nou’n bezwen aziste lafason ki nou ti konpran parol Zezi konsernan sa lesklav fidel e pridan. (Prov. 4:18) Annou egzamin sa legzanp e vwar ki mannyer i enplik nou, ki swa nou annan lespwar pour viv dan lesyel oubyen lo later.
KAN KI SA LEGZANP I GANNY REALIZE?
4-6. Akoz nou kapab konklir ki legzanp Zezi konsernan sa lesklav fidel ti konmans ganny realize apre 1914?
4 Konteks sa legzanp lo sa lesklav fidel e pridan i montre ki i pa ti konmans ganny realize lannen 33 N.L., plito, pandan sa letan lafen. Annou vwar ki mannyer Labib i ed nou tonm lo sa konklizyon.
5 Sa legzanp lo sa lesklav fidel i form parti profesi Zezi konsernan sa “siny ki pou endik [son] [“prezans ek konklizyon sa sistenm,” NW].” (Mat. 24:3) Premye parti sa profesi dan Matye 24:4-22, i annan de lakonplisman. Premye ti depi lannen 33 N.L. ziska 70 N.L., e dezyenm pou annan en pli gran lakonplisman dan nou letan. Eski sa i vedir ki parol Zezi konsernan sa lesklav fidel e pridan i annan de lakonplisman? Non.
6 Par konmans avek sa parol dan Matye 24:29, Zezi ti pe premyerman koz lo bann levennman ki ti pou arive dan nou letan. (Lir Matye 24:29, 30, 42, 44.) Kan i ti pe koz lo sa ki pou arive pandan gran ladetres, Zezi ti dir ki bann dimoun ti pou ‘war Fis-de-Lonm vini lo nyaz dan lesyel.’ Apre, avek bann ki ti pou viv pandan letan lafen, Zezi ti sipliy zot pour reste eveye ‘akoz zot pa konnen ki zour zot Senyer pou arive’ e ki i ti ‘pou vini ler ki zot pa pe ekspekte li.’c Dan sa konteks, setadir, kan Zezi ti pe koz lo bann levennman ki ti pou arive pandan bann dernyen zour, i ti osi koz lo sa legzanp konsernan sa lesklav fidel. Alor, nou kapab tonm lo sa konklizyon ki son parol konsernan sa lesklav fidel ti konmans ganny realize zis apre ki bann dernyen zour ti konmanse an 1914. I fer sans pour tonm lo sa konklizyon. Akoz?
7. Ki kestyon enportan ti ganny souleve anmezir sezon rekolt ti konmanse e akoz?
7 Pour en moman, zis reflesir lo sa kestyon: “Lekel sa lesklav fidel e pridan?” Dan premye syek, i pa ti pou fer sans pour demann sa kestyon. Parey nou ti vwar dan lartik avan, bann zapot ti pe fer mirak e menm transmet bann don mirakile e sa ti en laprev sipor Bondye. (Akt 5:12) Alor, akoz en dimoun ti pou bezwen demande lekel ki Kris ti’n apwente pour donn gidans? Me, an 1914 sityasyon ti vreman diferan. Sa lannen, sezon rekolt ti konmanse. Alor, letan ti’n arive pour separ move zerb avek dible. (Mat. 13:36-43) Anmezir sezon rekolt ti konmanse, en kestyon enportan ti ganny souleve: Lefet ki en kantite swadizan Kretyen ti dir ki zot vre disip Kris, ki mannyer bann Kretyen swazir, sa dible senbolik ti pou ganny idantifye? Legzanp sa lesklav fidel i donn en larepons. Bann disip fidel Kris ti pou sa bann ki ti pou ganny byen nouri spirityelman.
LEKEL SA LESKLAV FIDEL E PRIDAN?
8. Akoz i fer sans pour dir ki bann Kretyen swazir i sa lesklav fidel?
8 Se bann Kretyen swazir lo later ki sa lesklav fidel. Zot ganny apele “en group pret rwayal” e zot annan sa responsabilite pour “proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (1 Pyer 2:9) I fer sans alor ki bann manm sa “group pret rwayal” i direkteman ede pour ansenny zot bann konpanyon Kretyen laverite.—Mal. 2:7; Rev. 12:17.
9. Eski tou Kretyen swazir i form parti lesklav fidel? Eksplike.
9 Eski tou Kretyen swazir lo later i form parti sa lesklav fidel? Non. Larealite se ki pa tou Kretyen swazir ki annan sa rol pour donn nouritir spirityel lezot Kretyen dan lemonn. Parmi sa dible senbolik, i annan bann frer swazir ki asistan ministeryel ouswa ansyen dan zot kongregasyon. Zot ansenny portanport, dan zot kongregasyon, e zot fidelman siport gidans sorti kot biro prensipal. Me se pa zot ki fourni nouritir spirityel avek tou nou bann frer ek ser dan lemonn. An plis ki sa, bann ser osi i bann Kretyen swazir, e zot, zot pa ti pou zanmen mazinen ki se zot ki devret ansennyen dan kongregasyon.—1 Kor. 11:3; 14:34.
10. Lekel sa lesklav fidel e pridan?
10 Alor, lekel sa lesklav fidel e pridan? Anliny avek menm metod ki Zezi ti servi pour nouri en kantite atraver en ptigin, sa lesklav i form en pti group frer swazir ki direkteman enplike pour prepar e fourni nouritir spirityel pandan prezans Kris. Diran bann dernyen zour, bann frer swazir ki form lesklav fidel in travay ansanm kot biro prensipal. Dan bann dernyen dizenn lannen ki’n pase, sa lesklav in ganny idantifye konman Konsey Direkter Temwen Zeova. Me, remarke ki sa dan son legzanp Zezi i koz lo en sel “lesklav,” sa i montre ki en group Kretyen swazir i ganny konsidere konman en sel lesklav. Dan sa fason, tou manm Konsey Direkter i fer bann desizyon ansanm.
LEKEL BANN SERVITER?
11, 12. (a) Ki sa de responsabilite sa lesklav fidel e pridan ti gannyen? (b) Kan ki Zezi ti met sa lesklav fidel ansarz bann serviter e lekel i ti swazir?
11 I enteresan pour note ki dan legzanp Zezi, sa lesklav fidel e pridan i ganny apwente pour ansarz de keksoz. Premyerman, i ansarz bann serviter. Dezyenmman, i ansarz tou byen son met. Vi ki sa legzanp i ganny realize dan letan lafen, sa lesklav i ganny tou le de responsabilite apre ki prezans Zezi ti konmanse an 1914 ler i ti vin lerwa.
12 Kan ki Zezi ti met sa lesklav fidel ansarz son bann serviter? Pour reponn sa, nou bezwen retourn an 1914, konmansman sezon rekolt. Parey nou ti vwar pli boner, sa letan en kantite groupman relizye ti pe dir ki zot Kretyen. Dan ki groupman Zezi ti swazir e apwent sa lesklav? Sa kestyon ti ganny reponn apre ki li ek son Papa ti vini e enspekte tanp, ouswa sa laranzman spirityel pour ladorasyon, depi 1914 ziska bann premye mwan 1919.d (Mal. 3:1) Zot ti kontan ki en pti group Etidyan Labib fidel ti pe demontre ki zot leker ti avek Zeova ek son Parol. Byensir, zot ti bezwen ganny pirifye, e pandan sa pti peryod letan pirifikasyon ek tes, zot ti byen reakte. (Mal. 3:2-4) Sa bann Etidyan Labib fidel ti sa vre dible senbolik. An 1919, en letan kot zot ti pe reveye spirityelman, Zezi ti swazir bann frer swazir kalifye parmi zot pour form sa lesklav fidel e met li ansarz son bann serviter.
13. Lekel ki form parti bann serviter e dan ki sans?
13 Alor, lekel sa bann serviter? Zot senpleman sa bann ki ganny nouri. Byen boner pandan bann dernyen zour, tou bann serviter ti bann Kretyen swazir. Pli tar, gran lafoul lezot mouton ti form parti sa bann serviter. Lezot mouton i aprezan form en pli gran mazorite sa “sel troupo” anba dominasyon Kris. (Zan 10:16) Tou le de group i benefisye avek sa nouritir spirityel ki a ler e ki sa lesklav fidel i fourni. Ki pour dir konsernan bann manm Konsey Direkter ozordi ki form sa lesklav fidel e pridan? Sa bann frer osi i bezwen ganny nouri spirityelman. Alor, avek limilite zot rekonnet ki endividyelman zot osi zot bann serviter parey leres vre disip Zezi.
14. (a) Ki responsabilite sa lesklav fidel i annan e ki sa i enplike? (b) Ki lavertisman Zezi ti donn sa lesklav fidel e pridan? (Vwar bwat “Si i pa en bon serviter, . . . ”)
14 Zezi ti donn sa lesklav fidel e pridan en gro responsabilite. Dan letan lontan, en lesklav ouswa administrater diny konfyans ti parey en manedyer lakaz son met. (Lik 12:42) Alor, sa lesklav fidel e pridan i annan en gro responsabilite pour okip bann vre Kretyen. Sa i enplik, responsab bann resours materyel, predikasyon, progranm bann diferan lasanble e prodwir bann piblikasyon baze lo Labib ki ganny servi dan predikasyon e osi pour letid personnel ek letid kongregasyon. Sa bann serviter i depan antyerman lo bann provizyon ki zot gannyen avek sa lesklav.
KAN KI SA LESKLAV I ANSARZ TOU BYEN SON MET?
15, 16. Kan ki Zezi i met sa lesklav ansarz tou son byen?
15 Kan ki Zezi i met sa lesklav ansarz “tou son byen.” Zezi ti dir: “Ere sa [“lesklav,” NW] ki son met i vwar pe fer son devwar ler i arive [literalman, “ler i vini,” not.] An verite mon dir zot, son met pou met li ansarz tou son byen.” (Mat. 24:46, 47) Remarke ki Zezi i donn sa lesklav en dezyenm responsabilite apre ki i arive e trouv sa lesklav pe “fer son devwar,” setadir, i pe fidelman donn nouritir spirityel. Alor, i pou annan en enterval ant sa de responsabilite. Pour konpran ki mannyer e kan ki Zezi i met sa lesklav ansarz tou son byen, nou bezwen konn de keksoz: kan ki i arive e ki i enkli dan son byen.
16 Kan ki Zezi i arive? Larepons i ganny trouve dan konteks. Rapel ki bann verse presedan ki koz lo ler Zezi i “vini” ouswa arive, sa mo pe refer avek sa letan ki i pou egzekit zizman a lafen sa move lemonn.e (Mat. 24:30, 42, 44) Alor, Zezi i “vini” ouswa “arive,” ki ganny mansyonnen dan sa legzanp lo lesklav fidel, i pandan gran ladetres.
17. Ki i enkli dan byen Zezi?
17 Ki “tou byen [Zezi]” i enkli? Zezi pa ti pe spesifye ki “tou” sa byen i zis sa ki lo later. Anfet, Zezi i annan en gran lotorite dan lesyel. I ti dir: “Mon’n ganny tou pouvwar dan lesyel ek lo later.” (Mat. 28:18; Efe. 1:20-23) Rwayonm Bondye dan lesyel kot Kris pe dirize konman Lerwa i form parti son byen depi 1914 e bann Kretyen swazir pou ede dirize dan sa Rwayonm.—Rev. 11:15.
18. Akoz Zezi pou kontan pour met sa lesklav ansarz tou son byen?
18 Anliny avek sa ki nou fek vwar, ki konklizyon nou kapab tonm lo la? Kan Zezi i vini pour zize pandan gran ladetres, i pou trouve ki sa lesklav in fidelman donn nouritir spirityel son bann serviter. Apre sa, Zezi pou kontan pour donn sa lesklav son dezyenm responsabilite, e sa se pour ansarz tou son byen. Sa bann ki form sa lesklav fidel pou ganny sa responsabilite kan zot resevwar zot rekonpans dan lesyel konman bann ki pou diriz ansanm avek Kris.
19. Eski sa lesklav fidel i ganny en pli gran rekonpans kontrerman avek lezot Kretyen swazir? Eksplike.
19 Eski sa lesklav fidel i ganny en pli gran rekonpans dan lesyel kontrerman avek lezot Kretyen swazir? Non. En rekonpans ki’n ganny promet avek en pti group dimoun dan en ka i kapab ganny partaze avek lezot. Par egzanp, get sa ki Zezi ti dir son 11 disip sa zour swar avan son lanmor. (Lir Lik 22:28-30.) Zezi ti promet ki sa pti group zonm ti pou ganny en zoli rekonpans pour zot fidelite. Zot ti pou diriz ansanm avek li dan son Rwayonm. Me, plizyer lannen plitar, i ti montre ki tou sa 144,000 pou asiz lo tronn e dirize ansanm avek li. (Rev. 1:1; 3:21) Pareyman, parey i ganny dir dan Matye 24:47, i ti promet ki en pti group zonm, bann frer swazir ti pou form sa lesklav fidel e i ti pou met zot ansarz tou son byen. An realite, tou sa 144,000 pou dirize dan lesyel.—Rev. 20:4, 6.
20. Akoz Zezi ti apwent en lesklav fidel e ki ou determinen pour fer?
20 Atraver lesklav fidel e pridan, Zezi pe swiv menm metod ki i ti servi dan premye syek, i servi en ptigin pour nouri en kantite. Zezi ti apwent sa lesklav fidel pour fer sir ki son bann vre disip, ki swa Kretyen swazir ouswa lezot mouton i ganny ase nouritir spirityel a ler pandan sa bann dernyen zour. Annou reste determinen pour demontre nou lapresyasyon par siport fidelman sa bann frer swazir ki form sa lesklav fidel e pridan.—Ebr. 13:7, 17.
LEZOT NOT: (I devret ganny lir konman not anba paz dapre son paragraf.)
[Not anba lo paz]
a Matye 24:45-47: “45 Lekel sa [“lesklav fidel e pridan,” NW] ki son met in plas ansarz tou lezot serviter pour donn zot zot manze kan i ler? 46 Ere sa serviter ki son met i war li pe fer son devwar ler i arive! 47 An verite mon dir zot, son met pou met li ansarz tou son byen.”
b Paragraf 2: Pli boner, Zezi ti’n servi en legzanp en pe parey kot i ti refer avek sa “lesklav” konman en “administrater” (NW) e “lezot serviter” konman “en group serviter.” (NW)—Lik 12:42-44.
c Paragraf 6: ‘Larive’ Zezi (Grek, erʹkho·mai) i diferan avek son “prezans” (pa·rou·siʹa). Prezans envizib Kris i konmanse avan ki i vini pour egzekit zizman.
d Paragraf 12: Vwar lartik “Konnen ki mwan mon avek zot toulezour” dan sa piblikasyon lo paz 10-12, paragraf 5-8.
e Paragraf 16: Vwar lartik “Dir nou kan tousala pou arive?” dan sa piblikasyon lo paz 7-8, paragraf 14-18.
[Portre lo paz 20]
[Bwat lo paz 22]
ESKI OU’N KONPRAN?
“Lesklav fidel e pridan”: En pti group frer swazir ki direkteman enplike pour prepar e donn nouritir spirityel pandan prezans Kris. Ozordi, sa bann frer swazir i form Konsey Direkter
Son bann “serviter”: Tou sa ki ganny nouri, ki swa Kretyen swazir ouswa lezot mouton
“Ansarz tou lezot serviter”: An 1919, Zezi ti swazir bann frer swazir kalifye pour vin son lesklav fidel e pridan
“Son met pou met li ansarz tou son byen”: Sa bann ki form sa lesklav pou ganny sa responsabilite ler zot resevwar zot rekonpans dan lesyel. Ansanm avek leres 144,000, zot pou annan lotorite ansanm avek Zezi dan lesyel
[Portre lo paz 22, 23]
Ki swa nou annan lespwar pour viv dan lesyel ouswa lo later, nou tou nou bann serviter e bezwen sa nouritir spirityel a ler
[Bwat lo paz 24]
“SI I PA EN BON SERVITER, . . . ”
Zezi in donn sa lesklav fidel e pridan sa pli gro responsabilite. I ti devret responsab bann serviter e donn zot nouritir spirityel dan son letan apropriye. Zezi ti konnen ki sa bann ki annan plis responsabilite ti pou annan plis kont pour rann. (Lik 12:48) Alor, i ti termin son legzanp konsernan sa lesklav fidel e pridan avek en lavertisman.
Zezi ti averti ki en move lesklav ti pou dir dan li menm ki son met pe tarde e alor i ti pou konmans bat lezot serviter. Zezi ti dir ki kan son met ti pou arive, i ti pou pini sa move lesklav “severman.”—Lir Matye 24:48-51.
Eski Zezi ti pe predir ki i ti pou annan en move lesklav pandan bann dernyen zour? Non. I vre, serten endividi i demontre en latitid parey sa move lesklav ki Zezi i koz lo la. Nou konsider zot konman bann aposta, ki swa zot ti en Kretyen swazir ouswa en manm “gran lafoul.” (Rev. 7:9) Me, sa bann dimoun pa form en move lesklav. Zezi pa ti dir ki i ti pou apwent en move lesklav. Anfet, son parol i en lavertisman pour sa lesklav fidel e pridan.
Remarke ki Zezi ti konmans son lavertisman par dir “si.” En spesyalis Labib i dir ki dan son teks an Grek, sa pasaz i “en sipozisyon.” An tou ka, Zezi ti pe dir: ‘Si sa lesklav fidel e pridan ti arive maltret lezot lesklav dan sa fason, se sa ki son met ti pou fer ler i arive.’ (Vwar osi Lik 12:45.) Par kont, sa lesklav fidel e pridan i ankor pe kontinyen reste eveye e fourni nouritir spirityel.
Bann frer swazir ki servi ansanm konman sa lesklav fidel i rekonnet ki zot pou rann kont avek zot Met pour lafason ki zot pran swen avek son bann serviter. Sa bann Kretyen swazir i annan sa gran dezir pour desarz zot responsabilite fidelman pour ki zot kapab tann zot Met dir zot “ou’n byen fer” ler i finalman arive.
[Portre lo paz 25]
Tou sa 144,000 Kretyen swazir pou annan lotorite dan lesyel ansanm avek Zezi (Vwar paragraf 19)