LO KOUVERTIR | KI MANNYER POUR KONTAN TRAVAY DIR

Ki mannyer pour kontan travay dir

“Tou zonm i devret manze, bwar e vwar rezilta tou son travay dir. Sa i en kado sorti kot Bondye.” (Eklezyast 3:13) Si Bondye ti oule nou kontan nou travay, eski pa i fer sans ki i ti pou’n montre nou ki mannyer pour trouv sa kalite lazwa? (Izai 48:17) Granmersi i’n fer sa atraver son Parol Labib. Annou egzamin bann konsey ki Labib i donnen pour trouv satisfaksyon dan travay.

DEVLOP EN PWENNVI POZITIF KONSERNAN TRAVAY

Ki swa ou servi plis ou lespri, plis ou lanmen oubyen tou le de, rekonnet ki “tou travay dir i anmenn byenfe.” (Proverb 14:23) Ki kalite byenfe? En byenfe, se ki travay dir i ed nou pran swen avek nou bann bezwen materyel. I vre ki Bondye i promet ki i pou pran swen avek tou bann ki ador li senserman. (Matye 6:31, 32) Me I osi ekspekte ki nou pran o serye nou responsabilite pour esey ganny nou lavi dan en fason onnet.​—2 Tesalonisyen 3:10.

Alor, nou kapab konsider nou travay konman en mwayen pour siport nou lekor ek nou fanmir. Travay i en fason onorab pour viv dapre nou bann responsabilite. Joshua ki annan 25 an i dir, “Pran swen avek ou lekor i en lakonplisman e i anmenn satisfaksyon. Si ou kapab peye pour ganny sa ki ou bezwen, alor ou travay in atenn son bi.”

Deplis, travay dir i fer nou annan plis respe pour nou lekor. An tou leka travay dir i zisteman sa, i dir! Ler nou disiplin nou lekor pour gard nou travay, menm si i paret annwiyan oubyen difisil, nou kapab ganny sa satisfaksyon pour konnen ki nou’n gard en standar o nivo. Sa i en laviktwar kont sa tandans pour rod sa semen pli fasil. (Proverb 26:14) Dan sa fason, travay i kapab anmenn en gran satisfaksyon. Aaron ki ti ganny mansyonnen pli boner i dir, “Mon kontan ki mannyer mon santi apre en gran lazournen travay. Mon kapab fatige e menm si mon travay i pa ganny rekonnet par lezot, mon konnen ki mwan mon’n akonpli en keksoz.”

KONSANTRE LO OU TRAVAY

Labib i koz klerman lo sa zonm ki “kalipa dan son travay” e sa madanm ki “pran plezir pour travay avek son lanmen.” (Proverb 22:29; 31:13) Byensir, en dimoun pa vin kalipa otomatikman e napa bokou parmi nou ki kontan fer keksoz ki nou pa bon ladan. Petet sa i rezon akoz ki bokou dimoun pa kontan zot travay, akoz zot zis pa pe fer ase zefor pour vin kalipa.

An realite, en dimoun i kapab aprann pour kontan nenport ki kalite travay si i annan sa bon pwennvi, setadir i konsantre lo ki mannyer pour aprann fer sa travay dan sa meyer fason. William ki annan 24 an i dir, “Kan ou fer ou travay avek lanmour e ou vwar bann rezilta, i anmenn en kantite satisfaksyon. Ou pa pou zanmen ganny sa santiman si ou zis fer en louvraz anler anler oubyen fer mwens ki ou kapab.”

KONSANTRE LO KI MANNYER OU TRAVAY I BENEFISYE LEZOT

Evit sa tandans pour mazin zis lo kantite larzan ki ou pe gannyen. O kontrer, demann ou lekor sa bann kestyon: ‘Akoz sa travay i neseser? Ki ti pou arive si mon pa ti fer sa travay byen oubyen si mon pa ti fer li ditou? Ki mannyer mon travay i kapab benefisye lezot?’

Sa dernyen kestyon i enportan pour mazin lo la, akoz travay i pli gou ler nou vwar ki mannyer i benefisye lezot dimoun. Zezi li menm ti dir: “I annan plis lazwa pour donnen ki pour resevwar.” (Akt 20:35) Apard bann ki benefisye direkteman avek nou servis, tel parey bann kliyan ek travayer, i annan lezot ki benefisye avek nou travay dir. Sa i enkli nou bann manm fanmir e lezot ki dan bezwen.

Manm nou fanmir. Kan en sef fanmir i travay dir pour pran swen avek manm son fanmir, i benefisye zot dan omwen de fason. Premyerman, i fer sir ki zot ganny tou sa ki zot bezwen fizikman, tel parey manze, lenz ek en landrwa reste. Alor i desarz son responsabilite ki Bondye in donn li pour “port swen son prop parante.” (1 Timote 5:8) Dezyenmman, en dimoun ki travay dir pour anmenn manze kot son lakour i en bon legzanp pour montre lenportans travay dir. Shane ki ti ganny mansyonnen dan lartik presedan i dir, “Mon papa i en bon legzanp en dimoun ki kontan travay. I en zonm onnet ki’n travay dir son lavi antye konman en sarpantye. Atraver son legzanp, mon’n aprann lenportans pour travay avek mon lanmen e konstrir bann keksoz ki pou itil pour lezot dimoun.”

Bann ki dan bezwen. Zapot Pol ti konsey bann Kretyen pour “travay pour . . . ganny dekwa pour ed bann pov.” (Efezyen 4:28) Byensir kan nou travay dir pour nouri nou lekor ek nou fanmir, nou pou pli kapab ed bann ki pli mizer ki nou. (Proverb 3:27) Alor travay dir i kapab fer nou trouv sa pli gran lazwa pour donnen.

FER PLIS

Dan son Sermon Lo Montanny Zezi ti dir, ‘Si en dimoun i fors ou mars en kilomet avek li, mars de kilomet.’ (Matye 5:41) Ki mannyer ou kapab met an pratik sa parol dan ou prop travay? Olye fer zis sa ki ou’n ganny demande pour fer, rod bann fason pour fer plis. Etabli bann lobzektif personnel e fors ou lekor pour travay pli byen oubyen pli vit ki ou’n ganny demande. Nou devret fyer pour travay byen dan menm bann pti laspe nou travay.

Ler ou fer plis ki ou sipoze fer, i annan plis posibilite ki ou pou kontan ou travay. Akoz? Parski ou ki kontrol ou bann aksyon. Ou pe fer plis akoz ou anvi fer me pa akoz en dimoun in fors ou. (Filemon 14) Petet sa pou fer nou mazin sa prensip ki’n ganny rikorde dan Proverb 12:24 ki dir, “Lanmen sa bann ki devoue ki pou dirize me lanmen sa bann ki pares pou ganny forse pour travay.” Nou konnen ki napa bokou nou ozordi ki pou ganny met dan lesklavaz oubyen ganny forse pour travay. Par kont, en dimoun ki fer mwens i kapab santi konmsi i dan lesklavaz, setadir i toultan anba kontrol ek lord lezot. Me sa dimoun ki fer en pe plis, zis akoz in swazir pour li fer sa, i santi konmsi i an kontrol son lavi. Li ki ansarz son prop aksyon.

GARD TRAVAY DAN SON PLAS APROPRIYE

Pour travay dir i vreman en keksoz enpresyonan me de lot kote fodre nou osi rapel ki i pa vedir ki travay i sa keksoz pli enportan dan nou lavi. I vre ki Labib i ankouraz nou pour devoue. (Proverb 13:4) Me i pa ankouraz nou pour touy nou lekor avek travay. Eklezyast 4:6 i dir, “Vomye en pti gin repo ki en kantite travay dir e tay deryer divan.” Ki pwen sa verse? En dimoun ki travay tro bokou i riske pa ganny sans pour apresye sa bann byenfe son louvraz si son travay i pran tro bokou son letan ek lenerzi. Anfet, son travay i vin initil zis parey “tay deryer divan.”

Labib i ed nou pour annan en pwennvi balanse lo travay. Kantmenm i dir ki nou devret fer sir ki nou travay dir, i osi donn nou konsey pour “verifye sa ki pli enportan.” (Filipyen 1:10, NW) Kisisa, sa ki pli enportan? I enkli pas letan avek fanmir ek zanmi. Me sa ki pli enportan ankor se bann aktivite spirityel, tel parey lir Parol Bondye e medit lo la.

I tre probab ki bann ki fer sir ki zot lavi i byen ekilibre pour pli kontan zot travay. William ki ti ganny mansyonnen avan i dir, “Enn mon bann ansyen anplwayer ti montre en bon legzanp konsernan en pwennvi balanse lo travay. I ti travay dir e ti annan en bon relasyon avek son bann kliyan akoz son bon kalite travay. Me a lafen lazournen kan i ti’n fini avek son louvraz, i ti konnen ki mannyer pour kit son travay deryer e konsantre lo son fanmir ek ladorasyon. Me les mwan dir ou, ki i ti enn bann dimoun pli ere ki mon konnen!”

[Bwat lo paz 5]

Ki mannyer zot konsider travay dir

“Kan mon fatige a lafen lazournen, mon santi mwan vreman byen pour travay ki mon’n akonpli e mon ganny lazwa. Mon konnen ki mon’n byen travay.”​—Nick.

“Travay dir i sa pli bon fason pour travay. Si ou pe al fer en keksoz ki annan valer, fer li byen.”​—Christian.

“Lekor en imen i annan sa abilite pour fer bann keksoz ekstraordiner. Mon kontan pour montre mon lapresyasyon pour sa kado lavi par servi li pour travay dir e ed lezot dimoun.”​—David.