“Sanmenm sa ki ti ou lavolonte”

1. Akoz Zezi ‘ti ranpli avek lazwa’? (Vwar portre anler.)

ESEY mazinen ki mannyer i ti ete pour vwar ‘lespri sen ranpli Zezi avek lazwa.’ Petet i ti annan en gran sourir lo son figir e ou ti remark leksitasyon dan son lizye. Me ki’n arive pour fer Zezi santi koumsa? I ti’n fek anvoy 70a son bann disip pour al pres sa bon nouvel Rwayonm. I ti enpasyan pour konnen ki mannyer zot ti pou desarz zot responsabilite. I ti annan en kantite lennmi ki pa ti anvi ki sa bon nouvel i ganny prese, sa ti enkli bann profeser lalwa ek bann Farizyen ki ti entelizan e byen edike. Zot ti enfliyans en kantite dimoun pour vwar Zezi konman zis en senp sarpantye e son bann disip konman “bann zonm senp san gran ledikasyon.” (Akt 4:13; Mark 6:3) Me kantmenm sa, ler bann disip ti retournen sorti prese zot ti dan en gran lazwa. Malgre lopozisyon ki zot ti’n gannyen, menm lopozisyon avek bann demon, zot ti kontinyen prese! Ki mannyer zot ti kapab gard zot lazwa ek kouraz?​—Lir Lik 10:1, 17-21.

2. (a) Dan ki sans bann disip Zezi ti parey zanfan? (b) Kwa ki ti ed bann disip Zezi pour konpran bann laverite profon sorti dan Labib?

² Zezi ti dir avek Zeova: “Mon remersi ou Papa, Senyer lesyel ek later, akoz ou’n kasyet avek bann dimoun malen e entelizan tou sa bann keksoz, me ou’n revel li avek bann zanfan. Wi, Papa sanmenm sa ki ti ou lavolonte.” (Mat. 11:25, 26) Byensir, Zezi pa ti pe esey dir ki son bann disip ti bann zanfan dan en sans literal. O kontrer, i ti pe dir ki zot parey bann zanfan akoz zot pare pour aprann, konpare avek bann profeser lalwa ek Farizyen byen edike ki ti krwar ki zot saz. Alor, zot ti aprann ki mannyer pour demontre limite dan plas vin orgeye. (Mat. 18:1-4) Ki mannyer limilite ti ed zot? Zeova ti servi son lespri sen pour ed zot konpran bann laverite profon sorti dan Labib, tandis ki bann dimoun entelizan ki ti mepriz zot, zot ti’n ganny avegle par Satan ek zot prop lorgey.

3. Ki nou pou diskite dan sa lartik?

³ Sanmenm sa Zezi ti sitan zwaye! I ti kontan pour vwar lafason ki Zeova ti revel bann laverite profon sorti dan Labib avek tou sort kalite dimoun san pran kont zot ledikasyon. I ti kontan ki sa fason ansennyen ti dapre lavolonte son Papa. Eski Zeova in sanze e ki mannyer i montre ki sa fason ansennyen i ankor son lavolonte? Anmezir ki nou diskit larepons sa kestyon, nou kapab trouv lazwa, zis parey Zezi.

NOU PE FER LAVERITE PROFON DISPONIB POUR TOU DIMOUN

4. Dan ki fason edisyon Latour Veyer senplifye i en zoli kado?

⁴ Pli resaman, pep Bondye in amelyor zot fason ansennyen par fer li pli senp e kler. Annou vwar trwa legzanp lo ki mannyer zot in fer sa. Premyerman, i annan edisyon Latour Veyer senplifye.b Sa i en kado ki’n ed bokou dimoun ki annan difikilte pour lir oubyen ki pa tro konpran sa langaz. Bann sef fanmir in remarke ki aprezan zot zanfan i pli konpran bann lartik dan sa magazin ki sa mwayen prensipal ki nou ganny nou nouritir spirityel. Konsey Direkter in ganny bokou let remersiman pour sa magazin. En ser ti ekrir ki i ti ezite partisipe pandan Latour Veyer. I dir ki i ti vreman kanmi me pa konmela. I ekrir: “Aprezan ki mon servi edisyon Latour Veyer senplifye mon partisip plis ki enn fwa e mon nepli per. Mon remersi Zeova e zot.”

5. Ki serten lavantaz nou gannyen avek New World Translation of the Holy Scriptures ki’n ganny revize?

⁵ Dezyenmman, i annan New World Translation of the Holy Scriptures ki’n ganny revize ki ti sorti le 5 Oktob 2013 pandan renyon annyel.c Aprezan bokou verse i annan mwens mo, me zot sinifikasyon pa’n sanze e i menm pli kler. Par egzanp, Zob 10:1 ti annan 27 mo e aprezan i annan 19 mo e Proverb 8:6 ti annan 20 mo e aprezan i annan 13. Tou le de verse i pli kler dan sa nouvo edisyon. Anfet, en frer swazir ki fidel dan laverite pour plizyer dizenn lannen ti dir: “Mon fek lir liv Zob dan sa nouvo edisyon e i konmsi mon konpran li pour premye fwa!” Bokou dimoun in dir parey.

6. Ki mannyer ou santi konsernan sa leklersisman konsernan Matye 24:45-47?

⁶ Trwazyenmman, i annan bann dernyen azisteman lo nou konprenezon. Par egzanp, annou vwar leklersisman lo nou konprenezon konsernan “lesklav fidel e pridan” ki ti ganny pibliye dan Latour Veyer le 15 Zilyet 2013 ki ti vreman eksitan. (Mat. 24:45-47, NW) I ti ganny eksplike ki lesklav fidel i Konsey Direkter, tandis ki “lezot serviter” i bann ki ganny nouri spirityelman, ki swa zot bann Kretyen swazir oubyen “lezot mouton.” (Zan 10:16, NW) Pa i en plezir pour aprann sa laverite e ansenny li avek lezot! Dan ki lezot fason Zeova in montre ki i son lavolonte ki son bann lansennyman i senp e kler?

EN FASON PLI KLER E SENP POUR EKSPLIK BANN RESI LABIB

7, 8. Nonm serten resi Labib ki reprezant en keksoz ki annan en pli gran sinifikasyon a lavenir.

⁷ Si ou pe servi Zeova pour plizyer dizenn lannen petet ou’n remark en sanzman dan lafason ki nou bann piblikasyon i eksplik bann resi Labib. Dan ki fason? Dan lepase nou bann piblikasyon ti souvan dir ki bann resi Labib i reprezant en keksoz ki pou annan en pli gran sinifikasyon a lavenir. Eski i annan bann bon rezon pour eksplik bann resi Labib koumsa? Wi. Par egzanp, Zezi ti koz lo “siny profet Zonas.” (Lir Matye 12:39, 40.) Zezi ti eksplike ki sa letan ki Zonas ti reste dan vant en pwason ti pe reprezant sa letan ki i ti pou pase dan latonm.

⁸ Dan Labib i annan lezot resi ki annan en pli gran sinifikasyon a lavenir. Zapot Pol in koz lo detrwa. Par egzanp, relasyon Abraam avek Agar ek Sara ti reprezant relasyon Zeova avek nasyon Izrael ek parti lorganizasyon Zeova ki dan lesyel. (Gal. 4:22-26) Pareyman, tabernak, tanp, Zour Propisyasyon, gran pret ek lezot laspe Lalwa Moiz ti “en lonbraz bann bon keksoz ki pe vini.” (Ebr. 9:23-25; 10:1) Nou lafwa i ganny ranforsi ler nou etidye sa bann resi Labib e sa ki zot reprezante. Me eski nou kapab tonm lo sa konklizyon ki sak personnaz, levennman ek keksoz ki ganny dekrir dan Labib i reprezant en dimoun oubyen en keksoz?

9. Ki mannyer resi Labib lo Nabot ti ganny eksplike dan lepase?

⁹ Dan lepase, nou bann piblikasyon ti souvan eksplike ki sak dimoun, levennman ek keksoz dan serten resi i reprezant en dimoun oubyen keksoz. Par egzanp, move Larenn Zezabel ti fer touy Nabot pour ki son msye Aab ti kapab pran son plantasyon rezen. (1 Rwa. 21:1-16) Latour Veyer an 1932 ti eksplike ki Aab ek Zezabel ti reprezant Satan ek son lorganizasyon, ki Nabot ti reprezant Zezi e lanmor Nabot ti reprezant legzekisyon Zezi. Me an 1961, sa liv “Let Your Name Be Sanctified,” ti dir ki Nabot ti reprezant bann Kretyen swazir e Zezabel bann swadizan Kretyen. Sa liv ti osi dir ki lefet ki Zezabel ti persekit Nabot sa ti reprezant persekisyon ki bann Kretyen swazir ti pou fer fas avek dan bann dernyen zour. Pour bokou lannen sa bann leksplikasyon lo sa bann resi Labib in ranforsi lafwa pep Bondye. Akoz alor keksoz in sanze?

10. (a) Dan ki fason sa lesklav fidel i pli pridan ler pe eksplik serten resi Labib? (b) Lo kwa nou bann piblikasyon i met plis lanfaz ozordi?

¹⁰ Diran bann lannen, Zeova in ed “lesklav fidel e pridan” pour vin pli pridan. Dan ki fason? Lefet ki lesklav fidel i pridan, sa i fer ki avan ki zot dir ki en resi Labib pou annan en pli gran sinifikasyon a lavenir zot verifye ki i annan en rezon dapre Labib pour fer li. Deplis, serten leksplikasyon ki ti ganny donnen dan lepase pour eksplike ki en dimoun, en levennman oubyen en keksoz i annan en pli gran sinifikasyon a lavenir ti difisil pour konpran, rapel e aplike. Pli enportan, ler nou met tro bokou lanfaz lo pli gran sinifikasyon bann resi Labib, nou perdi son valer e nou pa arive vwar sa leson pratik ki pe ganny fer resorti. Alor, ozordi nou bann piblikasyon i met lanfaz lo bann leson senp e pratik konsernan nou lafwa, landirans, devosyon anver Bondye ek lezot kalite enportan ki nou kapab aprann atraver bann resi Labib.d

11. (a) Ki mannyer nou konpran sa resi konsernan Nabot aprezan e ki mannyer sa legzanp i itil pour nou? (b) Akoz nou bann piblikasyon konmela i rarman dir ki serten resi Labib i annan en pli gran sinifikasyon a lavenir? (Vwar “Kestyon lekter” dan sa nimero.)

¹¹ Me ki mannyer nou konpran sa resi konsernan Nabot aprezan? Dan en fason ki pli kler e senp. Sa zonm drwat pa ti mor akoz i ti pe reprezant Zezi oubyen bann Kretyen swazir, me akoz i ti gard son lentegrite. I ti obei Lalwa Zeova menm ler i ti fer fas avek labi pouvwar. (Nom. 36:7; 1 Rwa. 21:3) Son legzanp i itil pour nou akoz nenport serviter Zeova i kapab fer fas avek persekisyon par bann dimoun ki o pouvwar. (Lir 2 Timote 3:12.) Tou Kretyen i kapab fasilman konpran, rapel e aplik sa leson ki fortifye zot lafwa.

12. (a) Ki nou pa devret krwar konsernan bann resi Labib? (b) Akoz nou kapab ganny bann leksplikasyon kler lo bann keksoz profon? (Vwar not anba paz.)

¹² Eski nou devret krwar ki bann resi Labib i annan zis bann leson pratik e napa okenn lezot sinifikasyon? Non. Ozordi nou bann piblikasyon i tant pour ansenny nou ki mannyer bann resi Labib i relye avek kanmarad, olye ki dir ki i annan en pli gran sinifikasyon a lavenir. Par egzanp, nou kapab dir ki fidelite Nabot ler i ti pe fer fas avek persekisyon ek son lanmor i fer nou mazin fidelite Zezi ek bann Kretyen swazir. Par kont, sa i osi kapab fer nou mazin fidelite bokou “lezot mouton.” En leksplikasyon koumsa i montre ki Zeova pe ansenny nou dan en fason ki kler e senp.e

EN FASON PLI SENP POUR EKSPLIK BANN PARABOL ZEZI

13. Ki legzanp ki montre ki aprezan nou eksplik serten parabol Zezi dan en fason pli kler e senp?

¹³ Zezi Kri ti sa pli gran Ansenyan ki’n deza viv lo later. I ti kontan servi bann parabol pour ansennyen. (Mat. 13:34) Bann parabol ouswa legzanp i efikas, parski zot eksplik bann nide ki difisil pour konpran dan en fason senp ki fer nou reflesir e ki kapab tous nou leker. Diran bann lannen, eski nou bann piblikasyon osi in eksplik bann parabol Zezi dan en fason pli kler e senp? San dout, larepons i wi! Eski pa nou ti kontan kan nou ti ganny bann leklersisman lo bann parabol Zezi konsernan lelven, lagrenn moutard ek lasenn dan Latour Veyer le 15 Zilyet 2008? Aprezan nou konpran ki sa bann parabol i aplik avek Rwayonm Bondye ki’n ed bokou dimoun rezet sa move lemonn pour vin disip Kris.

14. (a) Ki mannyer nou ti eksplik sa parabol bon Samariten dan lepase? (b) Ki mannyer nou konpran parabol Zezi ozordi?

¹⁴ Ki mannyer nou kapab konpran bann zistwar detaye oubyen parabol ki Zezi ti rakonte? Byensir, serten i senbolik e profetik, tandis ki lezot i met lanfaz lo bann leson pratik. Ki mannyer nou pou konnen si en zistwar i senbolik oubyen non? Diran bann lannen, larepons in vin deplizanpli kler. Par egzanp, annou vwar lafason ki nou ti eksplik parabol Zezi lo sa bon Samariten. (Lik 10:30-37) An 1924, Latour Veyer ti dir ki sa Samariten ti reprezant Zezi, sa semen sorti Zerizalenm pour al Zeriko, ki ti anpant, ti reprezant fason ki imen in degrade depi rebelyon dan zarden Edenn, bann bandi lo semen ti reprezant bann gran lorganizasyon ek bann biznesmenn voras e sa pret ek sa Levit ti reprezant bann swadizan Kretyen. Ozordi, nou bann piblikasyon i servi sa parabol pour fer tou Kretyen rapel ki nou pa devret fer lapliferans kan nou pe ed bann ki dan bezwen, espesyalman par ed zot pour aprann laverite lo Bondye. Eski pa nou kontan ki Zeova i fer son bann lansennyman kler pour nou konpran?

15. Ki nou pou egzaminen dan lot lartik?

¹⁵ Dan sa lot lartik nou pou vwar en lot parabol Zezi, sa i parabol konsernan dis zenn fiy. (Mat. 25:1-13) Ki mannyer Zezi ti oule son bann disip i konpran sa parabol dan bann dernyen zour? Eski sak dimoun, lobze ek levennman dan sa parabol i annan en pli gran sinifikasyon a lavenir? Oubyen eski i ti anvi ki nou aprann en leson pratik pour gid nou dan sa bann dernyen zour? Annou vwar.