Rod led pour konpran Labib

Mazin ou pe vizit en pei etranze pour en premye fwa. Ou zwenn dimoun avek diferan koutim, manze diferan e servi larzan ki ou pa abitye avek. I normal ki ou kapab santi ou fristre.

Ou kapab santi parey ler ou lir Labib pour premye fwa. Ou retrouv ou dan en lemonn ansyen ki sanble drol pour ou. La ou rankontre en pep ki apel bann Filisten, vwar bann koutim ki ou pa abitye avek kot dimoun i ‘desir zot lenz’ oubyen aprann lo zot manze ki apel lamann ek larzan ki apel drachma. (Egzod 16:31; Zozye 13:2; 2 Samyel 3:31; Lik 15:9) Tou sa la i kapab konfiz ou, me i parey kan ou pe vizit en pei etranze. Pa ou ti pou apresye ganny led en dimoun ki kapab eksplik ou bann keksoz?

LED DAN LEPASE

Depi ki lekritir sakre ti ganny ekrir pour premye fwa dan sezyenm syek A.N.L., bann dimoun in ganny led pour konpran son mesaz. Par egzanp, Moiz, premye dirizan nasyon Izrael, ti “eksplik” sa ki ti’n ganny ekrir.​—Deterononm 1:5.

Bann dimoun ki ti kalifye pour eksplik Lekritir ti ankor pe fer sa travay apepre dis syek pli tar. An 455 A.N.L., en gran group Zwif, enkli bokou zanfan, ti rasanble ansanm dan en landrwa piblik dan lavil Zerizalenm. Bann ansenyan ti pe ‘lir sa menm liv sakre aotvwa.’ Me zot ti fer plis ki sa. “Zot ti ed sa pep pour konpran sa ki ti pe ganny lir.”​—Neemya 8:1-8.

Senk syek pli tar, Zezi Kri ti fer sa menm travay edikasyonnel. Annefe, i ti renonmen parmi bann dimoun konman en ansenyan. (Zan 13:13) I ti ansenny bann lafoul e osi bann endividi. En fwa, i ti koz avek en gran lafoul kan i ti pe donn sa Sermon lo Montanny e sa “lafoul ti byen etonnen par mannyer ki i ti ansennyen.” (Matye 5:1, 2; 7:28) Pandan prentan lannen 33 N.L., Zezi ti koz avek de son bann disip ler zot ti pe marse lo semen pe al ver en vilaz pa tro lwen avek Zerizalenm, i ti klerman ‘eksplik zot Lekritir.’​—Lik 24:13-15, 27, 32.

Bann disip Zezi ti osi bann ansenyan Parol Bondye. En fwa en zofisye sorti Letyopi ti pe lir en pasaz dan Lekritir. En disip ki ti apel Filip ti apros li e demann li: “Eski ou konpran sa ki ou pe lir?” Sa Etyopyen ti reponn: “Ki mannyer mon kapab konpran si personn pa eksplik mwan.” Apre, Filip ti eksplik li sa pasaz.​—Akt 8:27-35.

LED KI DISPONIB OZORDI

Parey bann ansenyan ek enstrikter Labib dan lepase, Temwen Zeova ozordi pe fer en travay edikasyonel lo Labib dan 239 pei dan lemonn antye. (Matye 28:19, 20) Semenn apre semenn, zot ed apepre 9 milyon dimoun pour konpran Labib. En kantite parmi sa bann etidyan pa sorti dan en fanmir Kretyen. Sa bann letid Labib i gratwit e i kapab ganny fer kot lakour sa dimoun oubyen en lot landrwa ki apropriye. Serten dimoun i menm fer zot letid par telefonn oubyen Enternet par servi en konpiter oubyen mobayl.

Silvouple kontakte Temwen Zeova pour bann detay lo ki mannyer ou kapab benefisye avek sa laranzman. Ou pou dekouver ki Labib pa en liv ki enposib pour konpran, me “i itil pour ansennyen, pour koriz lerer, pour remet drwat, e pour formen” pour ki ou “byen prepare e byen ekipe pour fer tou aksyon ki bon.”​—2 Timote 3:16, 17.