Lekel Bondye?

Bokou dimoun i dir ki zot krwar dan Bondye. Me si ou demann zot lekel Bondye, ou pou ganny diferan larepons. Pour serten, Bondye i en ziz sever ki kontan zis pini dimoun ki fer pese. Pour lezot, Bondye i touzour pardonnen menm si zot fer nenport keksoz. I osi annan lezot ki krwar Bondye i lwen e i pa enterese avek nou. Avek tou sa diferan lopinyon, bokou dimoun i krwar ki i enposib pour konnen lekel Bondye.

Eski i enportan pour konn Bondye? Wi, i vreman enportan akoz ler ou konn Bondye pli byen, sa i kapab donn ou en lespwar ek en bi dan lavi. (Akt 17:26-28) Pli ou vin pros avek Bondye, pli i pou kontan ou e ed ou. (Zak 4:8) Enn fwa ou’n konn Bondye, ou pou kapab ganny lavi eternel.​—Zan 17:3.

Ki mannyer ou kapab aprann konn Bondye? Mazin en bon zanmi ki ou konn byen. Ki mannyer sa lanmitye ti konmanse? I tre probab ou ti konmans par konn non sa dimoun, son personnalite, sa ki i kontan e pa kontan, sa ki i’n fer, sa ki i anvi fer e lezot keksoz ankor. Ler ou’n aprann konn sa dimoun, sa in atir ou ver li.

Pareyman, nou kapab aprann konn Bondye ler nou konn sa bann keksoz swivan:

• KI MANNYER BONDYE I APELE?

• KI MANNYER I ETE?

• KI BONDYE IN FER?

• KI I POU FER?

• AKOZ I BON POUR APRANN KONN BONDYE?

Sa magazin pou donn larepons sa bann kestyon baze lo Labib. Sa bann lartik ki swiv pou ed ou konnen lekel Bondye e ki byenfe ou pou gannyen anmezir ki ou devlop en lanmitye pros avek li.