En leritaz spirityel byen ris in ed mwan reisi

An 1913 mon papa, John Mills ti batize dan lavil New York a laz 25 an. Frer Russell ki ti fer son diskour batenm. Pa tro bokou letan apre, Papa ti al Trinidad kot i ti marye avek Constance Farmer, en Etidyan Labib byen devoue. Papa ti ed son zanmi William Brown montre sa progranm “Photo-Drama of Creation.” Zot ti fer sa ziska ki fanmir Brown ti ganny demande pour al Was Lafrik an 1923. Papa ek Manman, ki tou le de ti annan lespwar pour al viv dan lesyel, ti kontiny zot servis Trinidad.

BANN PARAN KI TI KONTAN NOU

Mon paran ti annan nef zanfan. Zot ti apel zot premye zanfan Rutherford, parey prezidan Watch Tower Bible and Tract Society sa letan. Ler mon ti ne le 30 Desanm 1922, zot ti apel mwan Woodworth parey Frer Clayton Woodworth, editer The Golden Age (konmela Veye!). Nou paran ti donn nou tou en ledikasyon de baz, me zot ti met bokou lanfaz lo bann lobzektif spirityel. Manman ti annan en abilite ekstraordiner pour servi Labib pour rezonn avek nou e konvenk nou. Papa ti kontan rakont nou bann zistwar dan Labib. I ti servi son lekor antye pour fer bann zes pour ki sa zistwar i vin vivan.

Zot zefor ti anmenn bann bon rezilta. Trwa dan senk garson ti asiste Lekol Gilead. Trwa parmi mon bann ser ti fer pionye pour plizyer lannen Trinidad ek Tobago. Atraver zot lansennyman ek bon legzanp, i konmsi nou paran ti plant nou “dan tanp” Zeova. Avek zot lankourazman, nou’n kapab reste la e se konmsi nou’n fleri dan “lakour tanp nou Bondye.”​—Ps. 92:13.

Nou lakaz ti vin sa landrwa kot dimoun ti zwenn pour organiz predikasyon. Bann pionye ti kontan vin kot nou e souvan zot ti koz lo Frer George Young, en misyonner Kanadyen ki ti vizit Trinidad. Mon paran ti koz lo fanmir Brown, zot bann konpanyon servis ki aprezan ti pe servi dan Was Lafrik. Tousala ti ankouraz mwan pour konmans prese ler mon ti annan 10 an.

KONMANSMAN MON SERVIS

Sa letan, nou bann magazin ti koz fran lo fo larelizyon, lo sistenm komersyal ki zis pran larzan dimoun e lo bann move keksoz ki dimoun dan politik ti fer. Alor an 1936, bann sef legliz ti ankouraz gouverner Trinidad pour enterdi tou piblikasyon Watch Tower. Nou ti kasyet bann piblikasyon ki nou ti annan e kontinyen servi zot ziska ki tou ti fini. Lo bisiklet oubyen dan bann lamars, nou ti servi bann plakar e distribye bann trak. Ansanm avek en group frer ek ser sorti dan lavil Tunapuna ki ti pe servi en sound-car, nou’n pres dan bann landrwa pli elwannyen Trinidad. Sa ti vreman eksitan! Sa lanvironnman spirityel ti ed mwan batize a laz 16 an.

Tou sa bann leksperyans ek leritaz spirityel ki mon ti’n gannyen avek mon fanmir ti fer mwan anvi vin en misyonner. Mon ti ankor annan sa dezir ler mon ti al Aruba an 1944 kot mon ti zwenn Frer Edmund Cummings. Nou ti byen kontan pour annan dis dimoun ki ti’n vin asiste Memoryal an 1945. Son lannen apre, premye kongregasyon lo sa zil ti ganny formen.

Pa bokou letan apre, mon ti pres avek en madanm ki apel Oris Williams kot travay. Oris ti byen defann bann lansennyman relizye ki i ti’n aprann. Me atraver en letid Labib, i ti aprann sa ki Parol Bondye i dir e i ti batize le 5 Zanvye 1947. Avek letan nou ti tonm anmoure e nou ti marye. I ti konmans fer pionye an Novanm 1950. Avek Oris, mon ti konmans en nouvo lavi dan servis Zeova.

EN SERVIS EKSITAN NIZERYA

An 1955, nou ti ganny envite Lekol Gilead. Oris ek mwan ti kit nou travay, vann nou lakaz ek lezot keksoz pour ki nou kapab prepare pour sa nouvo privilez e nou ti dir orevwar Aruba. Le 29 Zilyet 1956, nou ti ganny nou diplonm dan 27 tyenm laklas Gilead e nou ti ganny anvoye Nizerya.

Konsernan sa letan, Oris ti dir: “Lespri sen Zeova i kapab ed en dimoun adapte avek bann keksoz pozitif e negatif dan lavi en misyonner. Kontrerman avek mon msye, mon pa ti anvi vin en misyonner. Mon ti pou’n pli kontan annan mon lakour e annan zanfan. Mon ti sanz mon fason panse ler mon ti realize ki i ti irzan pour pres sa bon nouvel. Apre ki nou ti’n fini al Lekol Gilead, mon ti determinen pour vin en misyonner. Letan nou ti pe al anbark lo bato Queen Mary, Frer Worth Thornton sorti dan lofis Frer Knorr ti vin dir nou ‘Bon vwayaz!’ I ti dir nou ki nou ti pe al servi dan Betel. Mon ti dir dan mwan menm, ‘Ar, wi!’ Me i pa ti pran bokou letan pour mwan adapte dan bann diferan travay ki mon ti ganny demande pour fer. Sa ki mon ti pli kontan fer ti resepsyonnis. Mon kontan dimoun e sa travay ti fer mwan koz avek bokou frer ek ser Nizeryen. Bokou ti ariv kot Betel ranpli avek lapousyer, fatige, swaf e lafen. I ti en plezir pour mwan pran swen avek zot par fer sir ki zot ti oke e donn zot sa ki zot bezwen. Tousala ti form parti en servis sakre pour Zeova e i ti donn mwan bokou lazwa ek satisfaksyon.” Wi, tou sa ki nou ti fer dan servis Zeova ti fer nou zwaye.

En zour, nou ti zwenn ansanm an fanmir Trinidad an 1961. Frer Brown ti la e i ti rakont serten leksperyans vreman enteresan ki i ti’n gannyen Lafrik. Mwan osi mon ti rakonte ki mannyer nou travay ti pe progrese Nizerya. Frer Brown ti may mwan e dir avek Papa: “Johnny, Ou pa’n zanmen ganny sans al servi Lafrik, me Woodworth in kapab!” Papa ti reponn: “Kontinyen lo sa menm semen Worth! Kontinyen!” Sa bann lankourazman sorti kot sa bann veteran spirityel ti vreman ogmant mon dezir pour mwan akonpli mon servis pli plennman.

An 1962, mon ti ganny sa privilez pour ganny en lot formasyon dan 37 tyenm laklas Gilead pour dis mwan. Frer Wilfred Gooch, sirveyan biro brans Nizerya ti asiste 38 tyenm laklas Gilead e i ti ganny anvoye Langleter. Mwan ki ti ganny sa responsabilite pour vin sirveyan biro brans Nizerya. Parey Frer Brown, mon ti vwayaz en kantite e aprann konn e kontan bann frer ek ser Nizeryen. Menm si zot ti napa bokou keksoz materyel ki laplipar dimoun i annan dan bann pei pli devlope, zot lazwa ek lakontantman ti montre ki pour annan en lavi satisfezan e ere, i pa depan lo larzan oubyen lo keksoz materyel. Malgre tousala, i ti gou pour vwar zot prop, annord e byen abiye pour bann renyon. Ler tou dimoun ti arive pour lasanble, bokou ti vin dan bann pikep ek bolekajasa (bann bis lokal). Souvan i ti annan bann slogan enteresan lo sa bann transpor. Lo enn, i ti’n ganny ekrir: “Bann pti gout delo i fer en gran losean.”

Sa ti vre! Tou pti zefor ki en dimoun i fer i konte. Nou osi nou’n azout sa ki pour nou. An 1974, Nizerya ti’n vin sa premye pei apard ki Leta-z-Ini pour annan 100,000 proklanmater. I ti vreman annan en gran progre!

Pandan ki Nizerya ti pe progrese spirityelman, lager sivil ti pe ravaz sa pei depi 1967 ziska 1970. Pour plizyer mwan, nou bann frer ki ti Biafra lo lot kote Larivyer Nizer ti perdi tou kontak avek biro brans. Nou ti bezwen anmenn manze spirityel pour zot. Parey i’n ganny mansyonnen dan lentrodiksyon, nou ti met nou konfyans dan Zeova, fer bokou lapriyer e travers sa larivyer plizyer fwa.

Mon rapel tre byen sa bann vwayaz lo Larivyer Nizer konmsi i ti yer. Mon’n mank lanmor akoz maladi, bann solda ki ti kontan tir fizi e lezot danze. I ti efreyan pour pas devan en laliny solda gouvernman, me i ti pli fer per pour arive pas lot kote larivyer Biafra. En zour swar, mon ti al ankouraz bann sirveyan Enugu. Sorti Asaba pour al Onitsha, nou ti travers Larivyer Nizer dan en kannot menm si i ti annan en ta kouran. En lot fwa, mon ti al ankouraz bann ansyen Aba, en landrwa kot dimoun ti’n ganny demande pour pa alim lalimyer aswar akoz lager. I ti annan en fwa ler nou ti pe fer renyon Port Harcourt, nou ti bezwen zis arete e fer lapriyer final akoz bann solda gouvernman ti’n atak bann solda Biafra zis an deor lavil.

Sa bann renyon ti enportan pour rasir nou bann frer ki Zeova i kontan zot, pour rapel zot lenportans pour pa pran kote dan politik e pour reste ini. Bann frer Nizerya ti reisi fer fas avek sa sityasyon difisil pandan lager. Zot in demontre en lanmour ki bokou pli for ki sa laenn ki bann tribi ti annan antre zot e zot ti reste ini konman bann frer ek ser Kretyen. I ti en gran privilez pour avek zot pandan sa bann leprev!

An 1969, Frer Milton Henschel ti tyermenn Lasanble Enternasyonal “Peace on Earth” (Lape lo later) ki ti ganny fer dan stad Yankee, New York. Mon ti aprann bokou ler mon ti pe ed Frer Henschel. Sa formasyon ti’n vin dan en bon moman akoz an 1970, nou ti fer en Lasanble Enternasyonal Lagos, Nizerya avek tenm “Men of goodwill.” (Bann dimoun ki annan laprouvasyon Bondye.) Nou ti fer sa lasanble zis apre sa lager sivil e sa in posib zis atraver benediksyon Zeova. I ti premye lasanble dan sa letan ki ti’n ganny fer dan 17 diferan langaz e 121,128 dimoun ti asiste. Frer Knorr, Frer Henschel ek bann lezot viziter ki ti’n vini lo bann vol spesyal sorti Leta-z-Ini ek Langleter ti kapab vwar sa pli gran kantite dimoun ki ti’n deza batize menm zour depi zour Lapannkot: 3,775 nouvo disip! Mon krwar preparasyon pour sa lasanble ti sa letan kot mon ti pli bizi dan tou mon lavi. I’n annan bokou progre dan sa pei, i pa ti zis en ekspansyon me en leksplozyon!

Pandan sa trantenn lannen ki mon’n dan servis Nizerya, mon’n kontan pour servi konman en sirveyan rezyonal ek sirveyan zòn dan Was Lafrik. Bann misyonner ti vreman apresye sa latansyon personnel ek lankourazman ki zot ti gannyen! I ti vreman en plezir pour rasir zot ki zot pa’n ganny oubliye! Sa travay in fer mwan konpran ki demontre en lentere personnel dan sak dimoun i vreman enportan pour ed dimoun grandi spirityelman e pour gard linite e fortifye lorganizasyon Zeova.

I ti gras a led Zeova ki nou ti kapab fer fas avek maladi e osi bann problenm ki lager sivil ti anmennen. I ti toultan evidan ki Zeova ti pe beni nou. Oris ti dir:

“Nou tou le de nou ti ganny malarya plizyer fwa. En fwa, Worth ti al rann lapel Lopital Lagos san konnesans. Mon ti ganny dir ki i posib ki i pou mor, me mon byen kontan ki i ti rekipere! Ler i ti reganny konnesans, i ti koz avek sa ners ki ti pe vey li lo Rwayonm Bondye. Pli tar mon ti al avek Worth pour vizit sa ners, Msye Nwambiwe, pour pourswiv son lentere dan Labib. I ti aksepte laverite e avek letan i ti vin en ansyen Aba. Mwan osi mon’n kapab ed plizyer dimoun pour vin dan laverite, enkli serten Mizilman. Me nou ti vreman apresye aprann konn e kontan bann Nizeryen, zot kiltir, koutim ek zot langaz.”

Sa ti en lot leson ki nou’n aprann: Pour trouv lazwa dan nou servis aletranze, nou ti bezwen aprann kontan nou bann frer ek ser menm si zot kiltir ti vreman diferan avek sa ki pour nou.

NOUVO SERVIS

Apre ki nou ti’n servi dan Betel Nizerya, an 1987 nou ti konmans en nouvo servis konman misyonner St Lucia, en zoli zil Karaib. Nou ti byen kontan sa nouvo servis, me nou ti rankontre bann nouvo difikilte. Kontrerman avek Lafrik kot bann zonm ti marye avek plizyer madanm, isi St. Lucia zot ti annan en diferan problenm, bann koup ti menaz. Me Parol Bondye ki vreman pwisan ti motiv plizyer nou bann etidyan Labib pour fer bann sanzman neseser.

Anmezir nou laz i monte, nou lafors i diminyen. Konsey Direkter ti demontre lanmour anver nou par transfer nou kot nou biro prensipal Brooklyn, New York, Leta-z-Ini an 2005. Mon ankor pe dir Zeova mersi tou le zour pour donn mwan Oris. Sa lennmi lanmor ti pran li an 2015 e sa i vreman fermal. I ti sa pli bon konpanyon ki mon ti kapab gannyen, en madanm ki ti kontan mwan e ki ti fasil pour kontan. Mon’n kontan li en kantite pandan sa 68 an ki nou’n viv ansanm. Nou’n aprann ki pour en dimoun ere, ki swa dan maryaz oubyen kongregasyon, dimoun i bezwen respekte lotorite, pardonn volonterman, toultan annan limilite e demontre bann diferan laspe fri lespri.

Ler nou ti fer fas avek dezapwentman oubyen dekourazman, nou ti rod led Zeova pour ki nanryen pa anpes nou kontinyen fer bann sakrifis pour li. Anmezir ki nou ti aziste nou fason panse, nou ti vwar ki keksoz i toultan amelyore e sa ki pli bon i dan lavenir!​—Iza. 60:17; 2 Kor. 13:11.

Zeova ti beni travay ki mon paran ek lezot ti pe fer Trinidad ek Tobago. Dapre bann dernyen rapor, 9,892 dimoun in zwenn dan vre ladorasyon. Plizyer dimoun in ede pour fer sa premye kongregasyon ki mon ti ladan Aruba vin pli for. Aprezan, i annan 14 kongregasyon ki pe fer byen spirityelman. Kant a Nizerya, lakantite proklanmater in vin en gran lafoul 381,398. Lo zil St. Lucia, i annan 783 ki pe siport Rwayonm Zeova.

Konmela, mon dan mon bann 90 an. Psonm 92:14 i dir sa lo bann dimoun ki’n ganny plante dan lakaz Zeova: “I kontinyen donn bann fri menm dan lavyeyes. I reste ver e ranpli avek lasev.” Mon vreman kontan sa lavi ki mon’n eksperyanse dan servis Zeova. Sa leritaz spirityel vreman ris ki mon ti gannyen in ankouraz mwan pour servi Zeova avek tou sa ki mon annan. Akoz son lanmour fidel, Zeova in permet mwan pour “fleri dan lakour tanp [mon] Bondye.”​—Ps. 92:13.