Eski ou pe pran swen avek ou “gran boukliye lafwa”?

1-2. (a) Dapre Efezyen 6:16, akoz nou bezwen en “gran boukliye lafwa”? (b) Ki bann kestyon nou pou reponn?

ESKI ou annan en “gran boukliye lafwa”? (Lir Efezyen 6:16.) San dout ou annan. Zis parey en gran boukliye i protez lekor antye, ou lafwa i protez ou kont imoralite seksyel, vyolans e tou lezot keksoz ki kont bann standar Bondye.

² Par kont, nou pe viv dan “bann dernyen zour” e nou lafwa pou kontinyen ganny teste. (2 Tim. 3:1) Ki mannyer ou kapab egzamin ou boukliye lafwa pour fer sir ki i for? Osi, ki ou kapab fer pour gard ou lafwa for? Annou vwar larepons sa bann kestyon.

EGZAMIN BYEN OU BOUKLIYE

3. Ki bann solda ti fer avek zot boukliye e akoz?

³ Dan letan Labib, souvan bann solda ti annan bann boukliye ki ti’n ganny kouver avek lapo. Bann solda ti pas delwil lo zot boukliye pour ki i reste dan en bon leta e pour anpes bann bout metal rouye. Si en solda ti remarke ki son boukliye ti’n andomaze, i ti fer sir ki son boukliye i ganny repare, pour li pare pour sa prosen lager. Ki sa legzanp i annan pour fer avek nou lafwa?

4. Akoz ou bezwen egzamin ou boukliye lafwa e ki mannyer ou devret fer sa?

⁴ Parey bann solda dan letan lontan, ou bezwen regilyerman egzamin e pran swen avek ou boukliye lafwa pour ou kapab toultan pare pour lager. Konman bann Kretyen, nou dan en lager spirityel e nou pe lager avek bann demon. (Efe. 6:10-12) Zis ou ki kapab pran swen avek ou boukliye lafwa. Me, ki mannyer ou kapab ranforsi ou lafwa depi la konmela pour ou pare ler ou ganny teste? Premyerman, ou bezwen demann Bondye son led. Apre, ou bezwen servi Parol Bondye pour egzamin ou lekor e konpran lafason ki Bondye i vwar ou. (Ebr. 4:12) Labib i dir: “Met ou konfyans dan [Zeova] avek tou ou leker; pa kont lo ou prop rezonnman.” (Prov. 3:5, 6) Avek sa antet, akoz ou pa revwar serten desizyon ki ou’n fer resaman? Par egzanp, eski ou’n fer fas avek en gro problenm larzan? Ler ou ti pe rod en solisyon pour sa problenm, eski ou ti mazin sa promes ki Zeova in fer dan Ebre 13:5, ki dir: “Mon pa pou zanmen kit ou e mon pa pou zanmen abandonn ou”? Eski sa promes ti fer ou annan konfyans ki Zeova pou ed ou? Si wi, sa i montre ki ou pe gard ou boukliye lafwa dan en bon leta.

5. Ler ou egzamin ou lafwa, ki ou kapab dekouver?

⁵ Ler ou egzamin ou lafwa byen, ou kapab sirprann avek sa ki ou dekouver. I kapab ki ou pou vwar serten febles ki ou pa ti’n remarke avan. Par egzanp, petet ou remarke ki ou lafwa in afebli akoz dekourazman, bann mansonz e akoz ou’n trakas tro bokou. Si sa in arive, ki mannyer ou kapab anpes ou lafwa afebli plis ankor?

PROTEZ OU LEKOR KONT BANN KEKSOZ KI AFEBLI LAFWA

6. Ki serten keksoz ki i normal pour en dimoun enkyet lo la?

⁶ I normal pour enkyet konsernan serten keksoz. Par egzanp, i normal pour nou enkyet lo si nou pe fer plezir Zeova ek Zezi. (1 Kor. 7:32) Si nou’n fer en pese grav, nou vreman enkyet akoz nou anvi reganny nou lanmitye avek Bondye. (Ps. 38:18) Nou osi enkyet lo si nou pe fer plezir nou konzwen e lo lafason ki nou pran swen avek nou fanmir e avek nou bann frer ek ser.​—1 Kor. 7:33; 2 Kor. 11:28.

7. Dapre Proverb 29:25, akoz nou pa devret enkyet lo sa ki lezot i panse lo nou?

⁷ De lot kote, ler nou trakas tro bokou, sa i kapab afebli nou lafwa. Par egzanp, nou kapab trakase konsernan si nou pou annan ase manze ek lenz. (Mat. 6:31, 32) Sa i kapab fer nou konsantre lo ganny plis keksoz materyel. Nou menm kapab konmans kontan larzan. Si nou les sa arive, nou lafwa dan Zeova pou afebli e nou pou gat nou lanmitye avek li. (Mark 4:19; 1 Tim. 6:10) Oubyen, nou kapab konmans enkyet lo sa ki lezot i panse lo nou. Akoz sa, petet nou pou konmans pli per ki nou ganny sikannen oubyen persekite dan plas per ki nou pa fer plezir Zeova. Pour nou pa trakas tro bokou, nou bezwen sipliy Zeova pour donn nou lafwa ek kouraz pour nou pa enkyet lo sa ki lezot i panse lo nou.​—Lir Proverb 29:25, NWT;b Lik 17:5.

8. Ki mannyer nou devret reazir anver bann mansonz?

⁸ Satan ki osi ganny apele “papa mansonz,” i servi bann ki anba son kontrol pour fann bann mansonz lo Zeova e lo nou bann frer ek ser. (Zan 8:44) Par egzanp, bann aposta i pibliy bann mansonz e detourn bann lenformasyon konsernan lorganizasyon Zeova lo Enternet, televizyon e lo lezot form medya. Sa bann mansonz i form parti bann “dart alimen” ki Satan i anvoye. (Efe. 6:16) Ki nou pou fer si en aposta i konmans koz avek nou lo sa bann mansonz koumsa? Nou pa ekout zot! Akoz? Parski nou annan lafwa dan Zeova e nou annan konfyans dan nou bann frer ek ser. Anfet, nou pa devret zanmen annan kontakt avek bann aposta. Menm si nou anvi konnen ki zot pe dir, nou pa pou zanmen diskit avek zot lo okenn keksoz oubyen pour okenn rezon.

9. Ki mannyer dekourazman i kapab afekte nou?

⁹ Dekourazman i kapab afebli nou lafwa. Parfwa, nou kapab dekouraze akoz nou annan problenm. Byensir, nou pa devret inyor nou bann problenm. Me nou pa devret mazin zis nou bann problenm. Si nou fer sa, i kapab ki nou pou oubliy tou bann zoli keksoz ki Zeova in promet nou. (Rev. 21:3, 4) Nou kapab sitan dekouraze ki nou santi nou napa lafors e nou aret servi Zeova. (Prov. 24:10) Me nou kapab anpes sa arive avek nou.

10. Ki ou aprann avek sa let ki en ser ti ekri?

¹⁰ Annou vwar ki mannyer en ser ki reste Leta-z-ini i gard son lafwa for anmezir ki i pe pran swen avek son msye ki vreman malad. I ti ekri en let biro prensipal Temwen Zeova e dir: “Parfwa, nou sityasyon ti fer nou vreman strese e dekouraze, me kantmenm sa nou lafwa ti for. Mon vreman rekonesan pour tou keksoz ki Zeova in donn nou pour ranforsi nou lafwa e ankouraz nou. Nou vreman bezwen sa bann konsey ek lankourazman. Zot ed nou kontinyen servi Zeova e ed nou fer fas avek bann problenm ki Satan i servi pour afebli nou lafwa.” Parey nou vwar avek legzanp sa ser, nou kapab sirmont nou dekourazman! Ki mannyer nou kapab fer sa? Gard antet ki ou bann problenm i en tes sorti kot Satan. Annan konfyans ki Zeova pou rekonfort ou e apresye bann manze spirityel ki i donnen.

11. Pour vwar si ou lafwa i for, ki kestyon ou devret demann ou lekor?

¹¹ Eski ou vwar ki ou lafwa i bezwen vin pli for? Pandan sa bann dernyen mwan, eski ou’n reisi evite pran bokou traka? Eski ou’n refize ekoute oubyen diskit avek bann aposta konsernan bann mansonz ki zot fannen? Eski ou’n reisi sirmont dekourazman? Si wi, alor ou lafwa i dan en bon leta. Me kantmenm sa, nou bezwen fer atansyon, parski Satan i annan lezot zarm ki i servi kont nou. Annou vwar enn sa bann zarm.

KI MANNYER NOU KAPAB EVITE KONTAN KEKSOZ MATERYEL?

12. Ki i kapab arive si nou enkyet tro bokou konsernan bann keksoz materyel?

¹² Si nou kontan keksoz materyel, nou lafwa pou afebli e nou pa pou fer bokou dan servis Zeova. Zapot Pol ti dir: “Napa en solda ki pou anbaras li avek okenn biznes dan lavi sivil, akoz i anvi ganny laprouvasyon sa enn ki’n angaz li.” (2 Tim. 2:4) Anfet, en solda Romen ti napa drwa fer okenn lezot louvraz. Ki ti pou arive si en solda pa ti swiv sa lenstriksyon?

13. Akoz en solda pa ti pou konmans en biznes?

¹³ Mazin sa senn. En zour bomaten, en group solda pe antrennen pour lager me enn parmi zot pa la. Sa solda ki pa la, pe vann manze dan bazar. Son aswar, bann solda i pran letan pour egzamin zot lekipman batay e fit zot lepe. Tandis ki sa enn ki vann manze, i pas son letan pe prepar manze pour li vann lannmen. Son lannmen bomaten, lennmi i atake san ki zot ekspekte. Lekel parmi sa bann solda ki pou’n pare pour lager e lekel ki pou fer son komandan kontan? Si ou ti en solda dan sa lager, lekel ki ou ti pou anvi i lager ansanm avek ou? Sa bann solda ki’n byen prepare oubyen sa enn ki ti’n ganny distrer?

14. Konman bann solda Kris, kwa ki pli enportan pour nou?

¹⁴ Nou parey sa bann bon solda. Sa ki pli enportan pour nou i fer Zeova ek Zezi plezir, parski zot nou Komandan. Sa i pli enportan pour nou ki okenn keksoz ki nou kapab gannyen dan lemonn Satan. Nou fer sir ki nou annan letan ek lenerzi pour servi Zeova. Nou osi gard nou boukliye lafwa ek lezot lekipman batay ki Zeova in donn nou, dan en bon leta.

15. Ki Pol ti averti nou e akoz?

¹⁵ Nou bezwen reste toultan alert! Akoz? Zapot Pol ti averti ki “sa bann ki determinen pour vin ris” pou “perdi zot lafwa.” (1 Tim. 6:9, 10) Sa mo “perdi” i montre ki nou kapab ganny distrer si nou kontinyen esey rod bann keksoz materyel ki nou pa bezwen. Apre, nou kapab konmans devlop “bann dezir bet e danzere.” Dan plas les sa bann dezir devlope dan nou leker, nou devret gard antet ki Satan i servi sa bann dezir konman bann zarm pour afebli nou lafwa.

16. Ki kestyon sa resi dan Mark 10:17-22 i devret motiv nou pour reflesir lo la?

¹⁶ Meton nou annan ase larzan pour aste bokou keksoz materyel. Eski nou pe fer en keksoz mal si nou aste bann keksoz ki nou anvi me ki nou pa vreman bezwen? Pa neseserman. Me reflesir lo sa bann kestyon: Menm si nou kapab aste en keksoz, eski nou annan ase letan ek lenerzi pour servi sa keksoz? Osi, eski i posib ki nou konmans kontan nou bann keksoz materyel en kantite? Eski nou lanmour pour nou bann keksoz materyel i kapab fer nou reazir parey sa zenn onm ki pa ti aksepte lenvitasyon Zezi pour fer plis pour Bondye? (Lir Mark 10:17-22.) Pa i pli byen pour nou viv en lavi senp e servi nou letan ek lenerzi pour fer lavolonte Zeova!

KONTINYEN TENIR FOR OU BOUKLIYE LAFWA

17. Ki nou pa devret zanmen oubliye?

¹⁷ Nou pa devret zanmen oubliye ki nou dan en lager e toulezour nou devret pare pour lager. (Rev. 12:17) Nou bann frer ek ser pa kapab anmenn nou boukliye lafwa pour nou. Nou ki bezwen fer sir ki nou lafwa i for.

18. Akoz bann solda dan letan lontan ti tenir for zot boukliye?

¹⁸ Dan letan lontan, en solda ti ganny onore ler i ti demontre kouraz dan lager. Me i ti en laont pour li retourn kot li san son boukliye. En istoryen Romen ki apel Tacitus ti ekri: “I ti en gran dezoner si en solda ti kit son boukliye deryer.” Sa i en rezon akoz bann solda ti fer sir ki zot ti kontinyen tenir for zot boukliye.

19. Ki mannyer nou kapab kontinyen tenir for nou boukliye lafwa?

¹⁹ Nou kontinyen tenir for nou boukliye lafwa, ler nou asiste renyon regilyerman e ler nou koz avek lezot lo non Zeova ek son Rwayonm. (Ebr. 10:23-25) Osi, nou lir Parol Bondye toulezour e nou demann Zeova pour ed nou aplik sa ki Labib i dir. (2 Tim. 3:16, 17) Ler nou fer tousala, i pou napa okenn zarm ki Satan i servi ki pou anpes Zeova donn nou lavi eternel. (Iza. 54:17) Nou “gran boukliye lafwa” pou protez nou. Avek kouraz, nou pou travay ansanm avek nou bann frer ek ser. Nou pou reisi gard nou lafwa for toulezour. Pli enportan ankor, nou pou annan sa loner pour nou lo kote Zezi ler i ranport laviktwar lo Satan ek son bann demon.​—Rev. 17:14; 20:10.