Eski ou ti konnen?

Ki responsabilite bann administrater ti annan dan letan Labib?

DAN letan Labib, en administrater ti responsab pour okip lakour oubyen propriyete en dimoun. Parfwa, sa mo Ebre ek Grek ki ganny tradwir “administrater” i refer avek en sirveyan ouswa responsab en lakour.

Ler Zozef, garson Zakob, ti en lesklav Lezip, i ti administrater lakaz son met. Anfet, son met ki ti Ezipsyen “ti konfye tou son byen dan lanmen Zozef.” (Zen. 39:2-6) Pli tar, ler Zozef ti vin en dirizan pwisan Lezip, i ti apwent en administrater pour ansarz son prop lakaz.​—Zen. 44:4, NWT.

Dan letan Zezi, souvandfwa bann propriyeter ti reste dan lavil olye lo zot laferm. Alor, sa bann propriyeter ti apwent bann administrater pour sirvey travay ki bann labourer ti pe fer lo zot laferm.

Lekel ki ti kalifye pour vin administrater? En ekriven Romen dan premye syek ki apel Columella ti dir ki en lesklav ki ti ganny apwente konman sirveyan ouswa administrater, ti devret en dimoun “ki’n aprann fer byen sa travay.” I ti devret en dimoun ki ti pou “fer sir ki bann travayer i fer zot travay me san fer brit avek zot.” Columella ti osi dir ki sa keksoz pli enportan pour en administrater i ki i pa devret krwar ki i konn tou keksoz e ki i devret toultan anvi aprann nouvo keksoz.

Parol Bondye i servi legzanp en administrater ek son travay pour montre serten aktivite ki ganny fer dan kongregasyon Kretyen. Par egzanp, zapot Pyer i ankouraz bann Kretyen konman bann “bon administrater labonte ekstraordiner Bondye” pour servi zot abilite ki Bondye i donn zot “pour servi lezot.”​—1 Pyer 4:10.

Zezi osi ti servi legzanp en administrater dan Lik 16:1-8. An plis, ler Zezi ti pe koz lo siny ki pou montre ki i Lerwa, i ti reasir son bann disip ki i pou apwent en “lesklav fidel e pridan” oubyen “administrater fidel.” Travay prensipal sa administrater i pou kontinyen donn bann disip Kris sa manze spirityel ki zot bezwen pandan letan lafen. (Mat. 24:45-47; Lik 12:42) Nou rekonesan ki nou kapab ganny bann piblikasyon ki sa administrater fidel i prepare e ki disponib dan lemonn antye.