Kwen Kestyon

◼ Koman ki bann manm servis lakey i kapab asiste bann paran pour ed zot zanfan mentenir en bon konportman dan bann renyon?

Natirelman bann zanfan i ranpli avek lenerzi, e zot pa abitye asiz pour lontan. Apre en renyon, bann zanfan i annan en rezerv lenerzi ki pous zot pour zwe e tay deryer kanmarad dan Lasal Rwayonm oubyen dan bann lezot landrwa renyon, dan parking oubyen lo bor semen. Sepandan, mazin laverite sa proverb: ‘En zanfan lese lo li menm pou koz son paran laont.’—Prov. 29:15.

I tris pour dir ki serten nou bann frer ek ser aze in ganny seryezman blese akoz bann zanfan in tay lo zot e zet zot ater. Sa in koz soufrans ki pa ti merite e osi depans ki pa ti neseser pour bann paran ek kongregasyon. Pour zot prop sekirite ek proteksyon lezot, nou pa devret les bann zanfan taye e zwe anndan oubyen deor Lasal Rwayonm.

Bann paran i annan responsabilite Biblik pour edik zot zanfan koman pour tret nou landrwa ladorasyon avek respe. (Ekle. 5:1a) Dan bann renyon Kretyen, dan bann pti e gran lasanble, bann manm servis lakey i ganny dezinyen pour verifye ki “tou keksoz i deroul dan en fason desan” e ki i annan “lord.” (1 Kor. 14:40; Kol. 2:5) Zot devret reste alert anndan osi byen ki deor, avan, pandan e apre bann renyon. Si en zanfan pe taye oubyen pe trakase, sa manm servis lakey i kapab zantiman aret sa zanfan, e eksplik li akoz tel aksyon i pa akseptab. Paran sa zanfan i devret osi ganny enformen lo sa problenm zantiman, e lo nesesite pour sirvey sa zanfan. Sa paran i devret reazir korekteman.

I konpreansib ki parler bann pti baba oubyen zanfan i kapab plere e trakase pandan bann renyon. An arivan omwen 20 minit avan sesyon, bann manm servis lakey i kapab rezerv bann dernyen plas dan fon lasal pour bann ki ti a kontan asize avek zot zanfan. Lezot i devret korpere pour kit sa bann plas.

Si en zanfan pe enteronp renyon, paran i devret pran aksyon. Si paran pa pran aksyon avek sa dezord, i vin en distraksyon e en manm lakey i devret zantiman demann sa paran si i ti a kontan anmenn son zanfan andeor lasal. Ler nou envit bann nouvo avek zot zanfan renyon, nou devret asiz avek zot e ofer led si zot zanfan i kriye oubyen enteronp dan lezot fason.

I anmenn nou lazwa pour vwar bann zanfan diferan laz dan Lasal Rwayonm e pour vwar zot bon konportman parmi pep Bondye. (1 Tim. 3:15) Par zot respe pour laranzman ladorasyon Zeova, zot port li loner e zot ganny apresye par nou tou dan kongregasyon.