Eski Ou Pe Tir Profi?
1 Plizyer milyon dimoun ozordi i anvi konnen ki mannyer zot kapab sirmont bann problenm e rezwir en lavi ere. Zot pran plezir dan bann liv ki annan pour bi ede ver devlopman personnel, oubyen zot tourn ver bann group ek lorganizasyon pour ganny konsey lo konman pour amelyor zot lavi. Petet serten i kapab montre bann pti benefis ki zot in gannyen. Pourtan, si nou ziz par sa kalite lavi ozordi, eski dimoun an zeneral in aprann rezwir en lavi anpe e vreman satisfezan atraver sa bann progranm lenstriksyon imen? Sertennman, non!—1 Kor. 3:18-20.
2 Parkont, nou Kreater i gratwitman fourni lenstriksyon pli itil pour tou bann ki oule ekoute. Zeova i anvi ki tou dimoun i benefisye avek son lansennyman. Avek zenerozite, i fourni son Parol enspire pour gid limanite dan ladrwatir e i’n fer ki bon nouvel lo son Rwayonm i ganny deklare partou lo later. (Ps. 19:7, 8; Mat. 24:14; 2 Tim. 3:16) En lavi ki vreman ere i lye direkteman avek latansyon ki nou port lo bann komannman Zeova.—Iza. 48:17, 18.
3 Gidans Zeova i bokou pli siperyer ki gidans fourni par bann liv led oubyen bann propozisyon ki lemonn i ofer pour amelyor lavi. Nou kapab resevwar vre led ek bann benefis dirab si nou profit plennman bann provizyon ki Zeova in donn nou atraver son Parol ek son lorganizasyon.—1 Pyer 3:10-12.
4 Profit bann Renyon Kongregasyon: Denozour, Zeova i montre son lentere senser pour ansenny nou lo son semen e nou benefisye an portan latansyon lo son lenstriksyon. Nou senk renyon lasemenn i levidans ki i kontan nou, i annan nou lentere aker. Kan nou asiste bann renyon kongregasyon, nou konnesans lo Bondye i ogmante. Nou aprann konman pour protez nou kont sa ki mal anmezir ki nou rapros avek Zeova. Alor nou determinasyon i ganny fortifye.
5 I annan plis ankor. Dan bann renyon kongregasyon nou kapab ‘ouver nou leker pour tou.’ (2 Kor. 6:13) Sa i enkli aprann konn lezot dan kongregasyon. Nou benefisye avek en lesanz lankourazman, parey lapot Pol ti ekrir dan son let pour bann Romen. (Rom. 1:11, 12) Kan i ti ekrir bann Ebre, i ti konsey severman bann ki ti’n devlop en labitid pour abandonn lasosyasyon Kretyen.—Ebre 10:24, 25.
6 En lavi satisfezan e ranpli avek lazwa, i lye direkteman avek lentere ki nou annan dan byennet lezot. Nou ganny ankouraze pour rod bann mwayen pour kontribye anver boner lezot. Alor, sertennman nou bann renyon Kretyen, i pour nou profi personnel e pour benefis bann avek ki nou kiltiv lasosyasyon senn. Sa ki esansyel lo nou par, se nou partisipasyon senser.
7 Dan son konsey ki i ti donn Timote, Lapot Pol ti fer resorti en pwen parey kan i ti ekrir: “Antrenn ou pour en lavi sen avek Bondye.” (1 Tim. 4:7) Nou kapab demann nou lekor: ‘Eski mon pe antrenn mwan? Eski mon pe aprann tir profi dan sa ki mon pe tande dan bann renyon kongregasyon?’ Nou larepons pou vin wi si nou port latansyon lo sa ki nou tande dan renyon e sey aplik sa ki nou aprann. Avek lizye lafwa, nou pa zis vwar sa bann frer ki pe ansennyen me nou bezwen kapab vwar Zeova konman Gran Enstrikter son pep.—Iza. 30:20.
8 Lekol Minister Teokratik ek Renyon Servis: Sa de renyon in ganny dezinyen pour ed nou vin efektif dan minister Kretyen. Lekol Minister Teokratik i egzakteman pour sa bi—i en lekol avek bann etidyan ki resevwar lenstriksyon ek konsey lo en baz regilye. Ou ganny loportinite pour demontre ou progre konman en orater piblik ek en ansennyan Parol Bondye. Me pour retir maksimonm profi dan lekol, ou bezwen met ou non, asiste, partisip regilyerman e pran ou ekspoze aker. Aksepte e aplik konsey ki ganny donnen, pou ed ou progrese.
9 Renyon Servis i ansenny nou lenportans minister Kretyen e i montre nou konman nou kapab fer nou par dan sa travay pour fer disip. Eski ou ek ou fanmiy pe profit plennman bann prezantasyon dan sa de renyon? En koup Kretyen i fer sa obzervasyon swivan: “Dan en Renyon Servis, nou ti tande ki nou devret egzamin teks kotidyen an fanmiy. Nou pa ti pe fer sa, me aprezan nou pe fer li.” Ki mannyer zot in benefisye? Zot admet: “Nou vwar ki nou bann konversasyon lo latab manze i pli agreab. I nepli annan dispit dan letan dinen.” Eski menm zot bann zanfan i benefisye avek bann renyon? Wi. Sa manman i azoute: “I kler ki nou bann zanfan i ganny bokou enfliyanse par bann renyon. En fwa nou ti pri nou pti garson sis an pe koz manti. Me sa semenn dan renyon, diskour lenstriksyon ti pe koz lo mansonz. Nou garson ti get son papa avek lekspresyon pli koupab lo son figir e i ti kokiy li dan son sit. I ti’n aprann son leson, e nou pa ti ganny problenm apre sa.”
10 En ser pionye i dir ki i kontan ki dan Renyon Servis i donn bann sizesyon pour amelyor nou minister. Akoz? I eksplike: “Mon adopte en routin. Parfwa mon panse ki sizesyon ki Nou Minister Rwayonm i donnen pa pou marse. Me dan Renyon Servis, kan mon ti antann ki nou devret esey zot, mon ti antouzyasme pour aplik bann sizesyon. I fer minister vin eksitan!” Apre plizyer semenn ki i ti’n aplik sa sizesyon pour konmans letid Labib premye zour ki i koz avek en dimoun, i ti konmans en letid premye fwa ki i ti rankontre en fiy ki ti’n priye pour ganny led.
11 Kan ou tann en diskour ki enkli konsey Labib lo bann swa personnel ki ou fer, eski ou santi ki se Zeova ki pe koz avek ou direkteman? En asistan ministeryel ti santi koumsa. I ti dir: “Resaman dan en renyon, ti annan en diskour dan ki en frer ti diskit bann diferan form divertisman ki konvenab e bann ki pa konvenab pour bann Kretyen. Mon ti abitye get bokse lo televizyon. Me apre sa renyon, mon ti deside ki sa sport i tonm dan sa kategori divertisman ki pa ti a konvenab pour bann Kretyen. Alor mon nepli gete.” Wi, menm si sa frer ti’n devlop en pasyon pour en keksoz vyolan, i ti swiv avek limilite direksyon Zeova.—Ps. 11:5.
12 Renyon Piblik, Letid La Tour de Garde, ek Letid Liv Kongregasyon: Diskour piblik ki nou tande sak semenn, i kouver en varyete size Biblik. Ki ou pe retire dan sa bann diskour? En mari Kretyen ti dir bann benefis ki i ti gannyen: “En diskour piblik ti met laksan lo bann fri lespri. Sa orater ti mansyonnen, an rapor avek li menm, ki pour arive kiltiv sa bann fri, i ti swazir en serten kalite e travay lo la pour en semenn. Alafen lasemenn, i ti reflesir lo konman i’n demontre sa fri dan son bann aktivite toulezour. Apre, son semenn answit, i ti travay lo en lot kalite. Mon ti kontan sa lide e mon ti esey fer sa mwan osi.” Pa sa i en bon laplikasyon lo sa ki nou aprann!
13 Letid La Tour de Garde i osi ed nou pour aplik bann prensip Labib dan diferan sitiasyon lavi. Sa i ed nou pour mentenir lespri ek leker kalm malgre bann lenkyetid lavi. Letid La Tour de Garde i osi kit nou azour avek laverite anmezir ki i ganny revele. Par egzanp, pa nou ti benefisye avek letid La Tour de Garde le 1 Me, 1999, dan ki ti annan lartik entitile: “Sa bann Keksoz i Bezwen Arive,” “Ki Lekter i Servi Disernman,” ek “Vin Vizilan e Vin Aktif!” Ki mannyer sa bann letid i afekte ou personnelman? Eski ou montre par ou aksyon ki ou pran aker lavertisman Zezi konsernan lavenir? Eski ou pe prepar ou lekor pour bann leprev ki pe vini kan nou pou vwar ‘sa keksoz abominab . . . debout dan landrwa Sen’? Eski ou bann lobzektif ek ou fason viv i manifeste ki, pa akimil bann byen materyel ki pli enportan pour ou, me sangtifikasyon non Bondye? (Mat. 24:15-22) Pa nou pe aprann benefisye nou la konmela atraver letid La Tour de Garde?
14 Reflesir ki kantite nou aprann dan Letid Liv Kongregasyon sak semenn. Konmela nou pe etidye liv Labib Danyel. Dan sa kat mwan ki nou’n etidye sa liv Labib, eski nou pa’n vwar nou lafwa grandi sak semenn? Parey profet byenneme Zeova, Danyel, nou fortifye nou lafwa afen ki nou a kapab andire.
15 Zeova i Ansenny Nou pour Viv avek Lazwa: Nou evit bokou lapenn kan nou port atansyon lo bann komannman Bondye. Deplis, nou eksperyanse ki savedir en lavi ki zwaye. An swivan gid Zeova, nou vin bann partisipan dan son travay, non pa zis bann obzervater. E bann ki pe fer travay Bondye i bann dimoun ere.—1 Kor. 3:9; Zak 1:25.
16 Dan bann renyon kongregasyon, mazin seryezman konman ou pou aplik bann keksoz ki ou tande. (Zan 13:17) Servi Bondye avek lantouzyasm, avek tou ou leker. Ou lazwa pou deborde. Ou lavi pou vin pli ris, i pou annan plis sans. Wi, ou pou tir profi.