Zeova i Donn Pwisans
1 Ki ou lenpresyon lo lapot Pol? Anmezir ki nou lir liv Akt-De-Zapot, nou apresye konman ki i ti travay dir dan servis Zeova. Konman ki Pol ti akonpli tou sa ki i ti fer? I ti dir: “Pour tou keksoz mon annan lafors par lagras sa enn ki donn mwan pwisans.” (Fili. 4:13, NW ) Nou osi nou kapab benefisye avek pwisans ki Zeova i donnen. Konman? Par retir maksimonm benefis dan sa sis provizyon ki i donnen pour nou ganny revitalize e ranforsi spirityelman.
2 Parol Bondye: Zis parey nou bezwen manze pour mentenir nou lafors fizik, nou bezwen nouri nou avek Parol Bondye pour kapab reste vivan spirityelman. (Mat. 4:4) Labib i fourni pwisans pour soutenir nou. Pour mentenir nou zel ek lantouzyasm pour laverite, nou bezwen angaz nou dan letid personnel ki efikas ek meditasyon toulezour, si i posib.—Ps. 1:2, 3.
3 Lapriyer: I enportan pour apros Zeova, sirtou pandan bann moman kot i annan en bezwen spesyal. Par mwayen son lespri, i fourni pwisans ki donn lafors sa bann ki demann li par lapriyer. (Lik 11:13; Efe. 3:16) Labib i ankouraz nou pour “priye tou letan.” (Rom. 12:12) Eski ou fer sa?
4 Kongregasyon: Nou osi retir lafors ek lankourazman atraver bann renyon kongregasyon ek sa bon lasosyasyon ki nou rezwir avek nou bann frer ek ser. (Ebr. 10:24, 25) Ler i annan keksoz ki trouble nou, zot ede pour soulaz nou e asiste nou avek lanmour.—Prov. 17:17; Ekl. 4:10.
5 Predikasyon: Partisipasyon regilye dan minister i ed nou pour kontinyen reste fikse lo Rwayonm ek son bann benediksyon. Nou ganny pli motive ankor ler nou ed lezot aprann konsernan Zeova. (Akt 20:35) Pa nou tou ki kapab deplase pour servi kot i annan en pli gran bezwen oubyen partisip dan servis aplentan, me nou kapab atraver lezot mwayen annan en par enportan dan minister.—Ebr. 6:10-12.
6 Bann Sirveyan Kretyen: Nou benefisye avek lankourazman ek lasistans ki bann ansyen i fourni. Zeova in etablir zot pour pran swen troupo Bondye ki’n ganny konfye avek zot. (1 Pyer 5:2) Bann sirveyan rezyonal i batir bann kongregasyon ki zot servi, parey Pol ti fer dan son letan.—Rom. 1:11, 12.
7 Legzanp Bann Fidel: I stimilan pour konsider bann legzanp ankourazan bann konpanyon travay fidel, swa dan letan ansyen ou modern. (Ebr. 12:1) Ler ou anvi reganny en viger, akoz ou pa lir enn bann leksperyans ankourazan dan nou bann magazin, en rapor ankourazan dan l’Annuaire, oubyen serten fe eksitan lo listwar modern bann Temwen Zeova dan liv Prédicateurs?
8 En frer, ki ozordi i dan son 90 an, ti aksepte laverite kan i ti en marmay. Pandan ki i ti ankor en zennonm, son lafwa ti ganny met a leprev. Premyerman, serten ki ti pe asosye avek kongregasyon ti abandonn lorganizasyon Zeova. Ti annan osi predikasyon travay port-an-port, ki i ti trouv difisil pour fer. Toudmenm, i ti toultan depan lo Zeova. Apre sa i ti trouv lazwa dan son minister. E ozordi? Kantmenm son lasante pa bon, i ankor en manm lafanmiy Betel Brooklyn, pe servi lo Konsey Direkter. I napa okenn regre pour reste atase avek lorganizasyon Zeova.
9 En ser ki en manm lafanmiy Betel Langleter ti batize ler i ti annan 13 an. I ti konmans fer pionye avek son frer son lannen answit, e son lannen swivan, son papa ti ganny met dan prizon akoz i pa ti siport okenn kote pandan dezyenm Lager Mondyal. I ti kontinyen depan lo Zeova pour ganny pwisans, e i ti kontinyen servi sa vre Bondye. Avek letan, i ti marye avek en frer fidel, e ansanm zot ti kontinyen fer lavolonte Zeova. Apre 35 an maryaz, son mari ti mor sibit. Ankor i ti retir lafors avek Zeova, e i’n kontinyen servi Zeova ziska ozordi, enpasyan pour servi pour touzour konman en manm fanmiy teres Zeova.
10 Zeova i asiste e stimil son bann serviter fidel. “I pe donn sa enn ki fatige; e sa enn ki napa lenerzi viv i pe ranpli li avek pwisans.” Nou kapab obtenir pwisans dan sa sours ki napa limit par pran lavantaz tou sa sis provizyon mansyonnen pli boner. Mazinen: “Sa bann ki pe esper dan Zeova pou reganny pwisans. . . . Zot pou taye e pa pou abandonnen; zot pou marse e pa pou epize.” (Iza. 40:29-31) Pol ti depan bokou lo Zeova pour ganny lafors, e nou osi nou devret fer parey.