Eski ou kapab fer ou disponib?
1 En levennman ekstraordiner ti arive lannen 778 A.N.L. Dan en vizyon, profet Izai ti vwar “Zeova, pe asize lo en tronn o e eleve.” Izai ti apre antann bann serafen pe atir latansyon lo laglwar Zeova, an dizan: “Sen, sen, sen i Zeova bann larme.” Sa ti’n bezwen vreman enpresyonan! Dan sa moman, Zeova ti poz en kestyon pertinan: “Lekel ki mon pou anvoye, e lekel ki pou al pour nou?” Napa okenn leksplikasyon ki ganny fourni konsernan ki sa devwar ti enplike oubyen si sa dimoun ki pe volonter ti pou benefisye avek li. Toudmenm, san ezite, Izai ti reponn: “La mon la! Anvoy mwan.”—Iza. 6:1, 3, 8.
2 Sa lespri volonter pour fer nenport kwa ki Zeova i demande i karakteriz son pep. (Ps. 110:3) E ozordi en lenvitasyon spesyal pe ganny lanse avek sa bann ki kapab fer zot lekor disponib. Eski ou pare pour reazir avek en lespri volonter, parey Izai?
3 I annan en bezwen kontinyel pour bann frer ek ser servi dan Betel. Pour arive fer li i demann en dezir profon pour met bann lentere Rwayonm premye e pour pare pour fer nenport kwa ki ganny demande pour siport travay predikasyon dan lemonn antye. (Mat. 6:33) Annefe, servi konman en manm lafanmiy Betel i donn en dimoun sa loportinite inik pour servi Zeova avek tou son nanm. Konman sa?
4 Travay ki pe ganny fer dan Betel: Mazin tou sa ki ganny akonpli regilyerman dan sa trwa konpleks Betel an Brooklyn, Patterson, ek Wallkill, New York an Letazini. Sa 5,730 frer ek ser ki form lafanmiy Betel dan sa trwa landrwa i annan sa privilez pour etrwatman siport lesklav fidel e pridan ek son Konsey Direkter dan prodiksyon Labib ek piblikasyon baze lo Labib pour servi dan predikasyon ek letid personnel. (Mat. 24:45) Par egzanp, lannen pase, 24,364,670 liv, 39,813,464 pti liv ek brosir, 270,528,000 magazin, e 1,271,041 kaset odyo ti ganny prodwir e anvoye par bato an rezilta zefor ini lafanmiy Betel Letazini. En tre gran zefor i ganny fer pour resers e swazir “bann parol delisye e konman pour ekrir bann parol laverite ki egzakt” pour sa bann piblikasyon. (Ekle. 12:9, 10) Gidans i osi ganny donnen avek sa 1,900 tradikter atraver lemonn ki ede pour prodwir bann piblikasyon dan plis ki 300 langaz. Bokou pe ganny fer pour kordin travay ki ganny akonpli dan sa 111 brans atraver lemonn, enkli sa 11,500 kongregasyon dan Letazini. Lasistans i osi ganny donnen avek bann brans ki enplike dan travay enzenyer ek konstriksyon bann Betel ek bann Lasal Lasanble, ek sa 15,248 Lasal Rwayonm ki pour lemoman i bezwen dan bann landrwa ki napa bokou resours. I bezwen en santenn volonter pour travay dan domenn lenprimri ek lekspedisyon bann piblikasyon, dan netwayaz, antretyen, preparasyon repa, fer konmisyon, swen medikal, e bokou lezot fonksyon dan Betel. Byensir, tou bann Betel dan lemonn i diferan, me anmenmtan zot ganny organize dan menm fason. Anba direksyon biro Brans Moris, lafanmiy Betel Sesel i osi okip ennde sa bann responsabilite.
5 Pour akonpli tou sa bann travay i en gran latas, me toudmenm i spirityelman satisfezan. Nou rezwir letan nou konnen ki tou nou lafors ek lenerzi pe ganny servi pour siport aktivite predikasyon ek lansennyman. Servis Betel i ed nou pour konn lorganizasyon Zeova pli an detay. Nou ganny rapel ki en psalmis ti ankouraz bann Izraelit pour konn pli byen sa sant teokratik ki ti diriz zot sa letan lo later.—Ps. 48:12, 13.
6 Benediksyon Servis Betel: Konman bann ki pe servi dan Betel i santi konsernan zot privilez? Port latansyon lo sa bann komanter swivan ki’n ganny fer par bann zenn osi byen ki bann vye manm lafanmiy Betel. En manm lafanmiy Betel ki’n rezwir trwa an servis i dir: “Servi dan Betel in ranforsi mon relasyon avek Zeova. Pli lontan ki mon servi isi, e pli mon aprann konman ki Betel i fonksyonnen, pli i ansenny mwan lo personnalite Zeova. Servis Betel in osi permet mwan pour vwar ki Zeova i servi dimoun—tou kalite dimoun. E ou pa bezwen parfe pour li aksepte ou.”
7 En zenn frer i rapel: “Mon rapel reflesir dan mwan menm, ‘Konman i pou gou pour ariv dan nouvo monn e dir avek bann zonm fidel dan lepase ki’n resisite ki mon’n servi bokou lannen dan Betel, olye esey vin ris dan sa monn.’
8 En zenn frer i reflesir lo sa formasyon ki i’n resevwar: “Konn mon lekor e konnen kwa ki mon bezwen travay lo la e apre devlop sa bann kalite in vin en gran benediksyon. Aprezan mon santi mwan pli kapab servi Zeova. Mon vwar ki mon en pe pli pasyan, mon annan en pe plis kontrol lo mon prop lekor, e mon kapab montre plis lanmour.”
9 En ser i mazin konsernan bann benediksyon ki i’n resevwar ziska prezan: “Isi sa progranm spirityel in ansenny mwan plis lo Zeova e konman mon kapab imit li an panse, an santiman, e an aksyon. Vi ki formasyon i kontinyel, alor i en benediksyon kontinyel.”
10 En frer ki’n devoue 59 an dan minister aplentan, e plis ki 43 an dan Betel, ti deklare: “Betel i pa en kouvan, parey serten dimoun i kapab krwar. Lafason ki nou lavi i ganny organize i permet nou pour akonpli bokou keksoz. . . . Napa en zour ki mon’n travay e ki mon pa’n rezwir sa ki mon’n fer. Akoz? Akoz ler nou donn nou lekor antyerman pour Zeova, nou annan sa satisfaksyon pour konnen ki ‘nou’n fer sa ki nou’n ganny ordonnen pour fer.’ ”—Lik 17:10.
11 En lot frer, ki’n servi dan Betel pour 62 an, ti dir: “Mon solidman konvenki ki Betel i sa pli bon landrwa lo later pour viv avan ki Paradi i ganny etabli lo later. Mon pa’n zanmen regrete pour ni menm en segonn ki mon’n fer servis aplentan mon karyer pour lavi diran. Ki lazwa i annan pour temwanny e partisip dan gran lagrandisman lorganizasyon teres Zeova! I mon determinasyon, avek led Zeova, pour kontinyen fer Betel mon lakour e dedye mon lekor konpletman pour lavansman bann lentere Rwayonm.”
12 Sa bann manm lafanmiy Betel in mansyonn zis enpe parmi bokou benediksyon ki ou kapab rezwir si ou fer ou lekor disponib pour servis Betel. Me parey nenport ki privilez ki ou resevwar pour servi, ou bezwen premyerman ranpli bann kondisyon neseser. Ki serten kondisyon ki neseser pour servi konman en manm lafanmiy Betel?
13 Bann kondisyon pour Servis Betel: Bann kondisyon debaz pour sa bann ki fer demann pour servi dan Betel i ganny trouve dan sa bwat. Osi, i enportan ki zot pare pour travay dir, pa bann ki “kontan plezir.” (2 Tim. 3:4; 1 Kor. 13:11) Bann manm lafanmiy Betel i devret bann zonm ek fanm spirityel ki’n devlop bon labitid letid personnel e ki’n form zot fakilte persepsyon pour “konn fer diferans ant sa ki byen ek sa ki mal.” (Ebr. 5:14) Zot matirite Kretyen i devret deza pe ganny demontre dan tou laspe lavi, enkli zot fason sanze, pennyen, ek zot swa lanmizik ek divertisman. Bann manm lafanmiy Betel ki annan en leker volonter i servi nenport landrwa kot zot ganny demande. Bann manm pli zenn i normalman ganny bann devwar ki enplik travay fizik, tel parey enprimen, preparasyon ek lekspedisyon bann piblikasyon, antretyen, netwayaz, lav lenz, ek preparasyon repa. (Prov. 20:29) Kontrerman avek travay profann, sak devwar i anmenn gran satisfaksyon akoz i en servis sakre ki anmenn laglwar pour Zeova.—Kol. 3:23.
14 En dimoun ki’n ganny envite pour servi dan Betel i reste pour en minimonm enn an. Sa i permet li pour ganny formen pour vin en travayer prodiktif. Lespwar se ki i pou kapab fer Betel vin son lakour. Se lanmour pour Zeova ki pous bann manm lafanmiy Betel pour met travay Rwayonm avan zot prop lentere, ki fer plezir Zeova.—Mat. 16:24.
15 Bezwen pour lemoman: Akoz kalite travay ki ganny fer dan Betel, bezwen ki annan pour lemoman i prensipalman pour bann frer ek ser selibater. Kantmenm i pa en nesesite, preferans i pour bann pionye ordiner, vi ki zot deza pe travay aplentan. Parler i kapab annan loportinite pour bann koup aze depi 19 ziska 35 an ki kapab annan serten abilite ki bezwen dan Betel. Osi, serten frer ek ser ki’n fini depas 35 an me ki annan abilite ek formasyon spesyalize ki kapab ganny servi dan Betel i ganny ankouraze pour fer en demann. Sepandan, nou pa pe ankouraz bann endividi pour ganny en ledikasyon spesyalize oubyen formasyon avek lide ki sa pou ogmant zot sans pour ganny apele dan Betel. Sa bann ki’n deza resevwar en formasyon spesyalize, petet avan ki zot ti vin dan laverite, i kapab ekri en rezimen detaye lo formasyon ek abilite ki zot annan e atas li avek form laplikasyon Betel.
16 Si ou fer en demann e ou pa ganny envite pour servi dan Betel, pa dekouraze. Ou kapab konsider pour renouvle ou demann tou le zan. Serten frer ki annan formasyon ek abilite spesyal ki kapab itil dan Betel in volonterman fer zot disponib pour servi tanporer. Zot kapab fer demann pour servi tanporerman dan Betel pour enn, de, trwa, oubyen kat semenn oubyen ziska trwa mwan. Sekreter kongregasyon i kapab kontakte biro Lasosyete.
17 Servi Zeova dan en lasosyasyon pros avek bann frer Kris i en privilez inik pour sa bann ki travay dan Betel. Konsey Direkter i apresye lespri sakrifis tou sa bann ki fer zot disponib pour servi bezwen nou lasosyasyon frer enternasyonal.—Fil. 2:20-22; 2 Tim. 4:11.
18 Zenn—Prepar zot konmela menm pour Servis Betel: Preparasyon pour servis Betel i konmans en bon pe letan avan ariv laz 19 an. Ki bann zenn i kapab fer pour prepar zot pour servis Betel? Zezi ti dir: “Lekel parmi zot ki bezwen fer en gran batiman, ki pa asize premyerman e estimen konbyen i pou koute?” (Lik 14:28) Vi ki preparasyon ek plan i esansyel pour reisi dan nenport ki proze konstriksyon, konman i enportan alor ki bann zenn i fer atansyon lo konman ki zot pe konstri zot lavenir dan servis Zeova! En fondman solid i devret ganny mete tre boner pour zot kapab atenn bann lobzektif spirityel. Konman en zenn, eski ou pe byen etablir ou fondman? Si ou ti a kontan servi dan Betel, ou pou kapab benefisye par egzamin atantivman sa bann pwen swivan.
19 “Fer plas” pour sa privilez spesyal: Parey i ganny rikorde dan Matye 19:12, NW, Zezi ti ankouraz son bann disip pour “fer plas” pour reste tousel san marye. Akoz? Pa pour rezon personnel, me “akoz rwayonm lesyel.” Pareyman Pol ti ankouraz en tel leta lespri pour zot “atas avek Senyer san rezerv.” (1 Kor. 7:32-35) Malerezman, bokou i mank sa privilez pour servi konman bann zonm selibater dan Betel akoz zot marye tre zenn. Nou oule ankouraz nou bann zenn frer pour servi zot lenerzi pour pourswiv minister aplentan letan ki zot ankor lib avek bann responsabilite familyal. Alor, si apre en serten letan zot deside marye, zot pou vin bann pli bon mari akoz zot in ganny plis leksperyans dan lavi e osi dan minister Kretyen. Apre ki zot in servi pour en pe lannen dan Betel, serten in marye e pe kontinyen servi dan Betel konman en koup. Si plitar zot ganny lezot privilez, tel konman sirveyan oubyen servis misyonner, sertennman zot pa regret sa letan ki zot in met dekote pour servis Betel.
20 Pa les ou ganny distrer par bann lentere materyel: I bon pour sak zenn demande: ‘Eski mon lobzektif apre ki mon’n fini lekol se pour rod en karyer profann oubyen pour servi Zeova aplentan?’ I vre, ki pour servi Zeova aplentan i demann sakrifis. Me i menm zafer osi pour rod en karyer profann! Alafen, ki semen ki pou vreman annan en rezilta dirab e anmenn benefis? Zezi ti donn en larepons tre kler. Dapre Matye 6:19-21, i ti dir: “Pa akimil zot larises lo later, kot i a ganny detri par lever ek larouy, kot voler a kas laport e vole. Plito akimil zot larises dan lesyel, kot i pa pou ganny detri ni par lever, ni par larouy, kot voler pa pou kapab kas laport e vole. Parski la kot ou larises i ete, ou leker pou lanmenm.” Fotespere ki nou leker pa zanmen fer nou rod en karyer dan sa monn oubyen keksoz materyel dan plas servi Zeova avek tou nou nanm. Nou tou nou merit rekonnet ki sel larises ki vo lapenn rode se en bon relasyon avek Zeova, pour ki nou fer son leker zwaye. (Prov. 27:11) Par met Zeova premye dan nou lavi letan nou ankor zenn, nou montre kwa ki annan valer pour nou e ki degre Rwayonm i enportan pour nou. Rapel byen ki, “benediksyon Zeova—se sa ki fer ris, e i pa azout okenn douler avek li.” (Prov. 10:22) Bann zenn i annan en loportinite ekselan pour montre kote zot leker i ete par donn Zeova en keksoz ki annan valer an retour pour tou sa ki i’n donn zot. Servis Betel i ofer en tel loportinite merveye pour sa bann ki ranpli sa bann kondisyon.
21 Sa bann ki servi dan Betel i merit moralman prop: Psalmis ti demande: “Konman en zennonm pou netway son santye?” I ti reponn: “Par reste vizilan dapre parol [Zeova].” (Psonm. 119:9) Sa i enkli evit okenn keksoz ki annan pou fer avek koripsyon moral sistenm Satan. Pornografi lo Internet, kondwit ki pa apropriye avek sèks opoze, lanmizik ek divertisman degradan, servi lalkol anba laz oubyen an ekse i zis serten pyez ki Satan i servi pour anpes nou bann zenn atenn bann lobzektif spirityel. I demann en gran determinasyon lo zot par pour reziste sa bann taktik. Konman en zenn, si ou trouv ou pe konmans enplike dan okenn sa bann keksoz, koz avek bann ansyen dan ou kongregasyon e rezourd sa bann problenm avan ki ou fer demann pour servis Betel. Annan en konsyans prop i esansyel pour servi Zeova plennman.—1 Tim. 1:5.
22 Aprann annan en bon Relasyon avek lezot: En nesesite enportan pour reisi dan servis Betel se pour aprann annan en bon relasyon avek lezot. Lafanmiy Betel i ganny konpoze par bann frer ek ser ki sorti dan diferan ran sosyal. Pandan ki sa varyete personnalite i azout labote spirityel dan Betel, parler i menm kapab osi prezant bann defi. Si ou pe mazin pour servi dan Betel, ou kapab demann ou lekor: ‘Eski mon ofans fasilman ler lezot pa partaz mon lopinyon? Eski lezot i trouv li fasil pour annan en bon relasyon avek mwan?’ Si ou bezwen amelyore dan sa bann tel laspe, konmans travay lo la konmela menm. An fezan sa i pou ed ou pour adapte pli fasilman pour kapab viv e travay avek bann manm lafanmiy Betel.
23 Travay dir pour vin en dimoun spirityel par kiltiv en relasyon pros avek Zeova. Devlop en bon progranm letid personnel, ki enkli lir Labib sak zour. Partisip aktivman dan partaz sa bon nouvel avek lezot. An fezan sa bann keksoz, ou pou fer ou progre spirityel ganny manifeste. (1 Tim. 4:15) Vreman en lesperans merveye pe esper sa bann ki prepar konmela pour en karyer dan servis aplentan!
24 Paran, form ou zanfan: Ki paran i kapab fer pour ankouraz bann zenn pour pourswiv minister aplentan? Zezi ti dir: “Sak zelev ki’n byen aprann i a vin parey son profeser.” (Lik 6:40) En zelev ki’n ganny en formasyon konplet pou natirelman montre bann bon kalite ki son ansennyan devoue i annan. Bann paran Kretyen i devret kit sa prensip antet pandan ki zot travay dir pour antrenn zot zanfan “[avek bi] pour en lavi sen avek Bondye.” (1 Tim. 4:7) Vi ki bann zanfan i annan sa tandans pour reflekte latitid zot paran anver bann keksoz spirityel, i byen pour bann paran demande: ‘Eski nou personnelman nou apresye valer sa travay ki pe ganny fer dan Betel pour promot bann lentere vre ladorasyon Zeova? Eski nou rekonnet benediksyon Zeova lo laranzman Betel? Eski nou krwar ki en lavi dan servis Zeova i pli bon karyer ki nou zanfan i kapab swazir?’ Nou prop lapresyasyon senser pour servis Betel e pour travay ki pe ganny fer dan Betel pou ed nou enkilke en menm lapresyasyon dan nou zanfan.
25 Elkana ek Ana ti annan en profon lapresyasyon pour vre ladorasyon. Zot in donn en bon legzanp pour bann paran Kretyen ozordi. Dan ansyen Izrael, selman bann zonm Izraelit ki ti ganny demande pour “al devan lafas vre Senyer, Zeova” trwa fwa par an kot tabernak. Kantmenm sa, Elkana ti vwayaz apepre 30 kilomet, tre probab apye, avek son fanmiy antye “lannen apre lannen” pour al dan sa landrwa pour ador Zeova. (Eg. 23:17; 1 Sam. 1:3, 4, 9, 19; 2:19) Aparaman sa sef fanmiy ti oule ki son fanmiy antye i partaz son lentere personnel pour bann keksoz spirityel.
26 Ana ti partaz menm lentere avek son msye dan vre ladorasyon. Avek devouman i ti santi son lobligasyon pour kontribye pour siport vre ladorasyon dan tabernak. Ana ti fer en ve ki si Zeova i donn li en garson, i ti pou fer li disponib pour servis tabernak. (1 Sam. 1:11) Lalwa Mozaik ti otoriz en msye pour kennsel en ve ki son madanm in fer si i vwar ki i pa apropriye. (Nom. 30:6-8) Sepandan, i paret ki Elkana ti aprouv ve Ana, ki montre ki li osi i ti siport sa pwen konsernan vre ladorasyon!—1 Sam. 1:22, 23.
27 Eski Samyel, zot garson, ti ganny afekte dan en fason pozitif par lapresyasyon ek bon latitid ki son paran ti’n demontre? Sertennman, wi. Alor kantmenm i ti ankor en zenn garson, Samyel ti fidelman e volonterman okip byen son latas ki i ti’n gannyen e i ti ganny formen pour plis privilez dan servis Bondye. Lentere ki Elkana ek Ana ti montre dan servis Samyel dan tabernak pa ti arete apre ki i ti’n pran son responsabilite laba. Zot ti kontinyen vizit li regilyerman pour donn li lankourazman ek sipor anmezir ki i ti pourswiv servis aplentan.—1 Sam. 2:18, 19.
28 Ki legzanp remarkab Elkana ek Ana in etablir pour bann paran Kretyen ozordi! Ler nou zanfan i antann nou eksprim avek senserite lapresyasyon pour privilez servis Betel e vwar lespri sakrifis ki nou demontre dan lavansman bann lentere Rwayonm, zot osi zot pou devlop en leker dispoze pour servi lezot. Avek sikse bokou paran pe enplant sa bon dezir dan zot zanfan. En fiy set an ti ekrir: “Ler mon gran, mon anvi al dan Betel, e mon annan detrwa keksoz ki mon pou kontan fer laba. (1) Tip bann magazin Latour Veyer ek Reveillez-vous!, (2) travay dan seksyon lar, (3) ploy bann lenz dan landrwa lave. Nenport travay ki disponib. I pa en problenm.” Konman i ankourazan pour vwar en tel leta lespri volonter devlope dan leker nou bann zanfan!
29 Bann zenn, rapel ki “lemonn pou disparet ek tou son bann dezir; me sa ki fer lavolonte Bondye [pou] reste eternelman.” (1 Zan 2:17) Kontinyen pourswiv bann lobzektif spirityel, enkli privilez spesyal pour servi dan Betel. Paran, imit legzanp bann serviter fidel dan lepase ki’n ankouraz zot zanfan pour kiltiv latasman avek Bondye. (2 Pyer 3:11) E ki nou tou nou fer nou par pour ed nou bann zenn frer ek ser pour servi nou Gran Kreater otan posib, parski sa “promes lavi dan letan prezan, ek dan lavenir.”—1 Tim. 4:8; Ekle. 12:1.
[Bwat lo paz 4]
Bann Kondisyon debaz pour Servis Betel
● Batize pour omwen enn an
● En dimoun spirityel ki annan en profon lanmour pour Zeova ek son lorganizasyon
● En bon lasante fizik, spirityel, mantal e emosyonnel
● Sitwayen oubyen rezidan permanan Sesel
● Kapab byen lir e ekrir
● Laz 19-35 an