Pa ezite!
1 Ler nou prepar nou pour al pres port-an-port, pli gran lobstak ki nou kapab rankontre se pour nou sorti pour al prese. Bann santiman enkonpetan i kapab fer nou ezite pour sorti pour al koz laverite avek “tou dimoun.” (1 Tim. 2:4) Me nou pa devret ezite pour pres bon nouvel. Pour ki rezon?
2 I Mesaz Zeova: Zeova in kominik son parol atraver Labib. Ler nou anmenn sa mesaz anver lezot, nou pe transmet son panse, non pa sa ki pour nou. (Rom. 10:13-15) Ler bann dimoun i rezet sa mesaz Rwayonm, an realite zot pe rezet Zeova. Toudmenm, nou pa devret dekouraze. Nou konfidan ki sa mesaz pou ensit en reaksyon favorab dan leker sa bann ki dezir en sanzman dan bann kondisyon sa monn e ki konsyan zot bezwen spirityel.—Ezek. 9:4; Mat. 5:3, 6.
3 Zeova i atir Dimoun: En dimoun ki’n refize ekout nou dan lepase i kapab aprezan pare pour aksepte akoz son sitiasyon in sanze e kondisyon son leker in vin sansib. Aprezan Zeova i kapab eksprim son bonn volonte ver sa dimoun e ‘atir li.’ (Zan 6:44, 65) Ler sa i arive, nou anvi les nou ganny servi par Zeova e soumet avek direksyon son bann lanz pour trouv sa bann dimoun.—Rev. 14:6.
4 Bondye i donn nou son Lespri: Lespri sen i ed nou pour koz “avek lasirans, e ranpli avek konfyans dan Senyer.” (Akt 14:1-3) Ler nou mazinen ki nou pe ganny soutenir dan en fason pwisan dan nou minister, nou pa pou ezite pour koz laverite avek nou vwazen, kanmarad travay, kanmarad lekol, fanmiy, bann dimoun byen edike, oubyen bann dimoun ris.
5 Zezi ti montre nou konman: Zezi ti servi bann kestyon ki fer reflesir, bann ilistrasyon pratik, ek bann rezonnman Biblik. I ti eksplik laverite sorti dan son leker dan en fason senp e atiran. Ozordi sa bann metod i ankor bann metod pli bon. (1 Kor. 4:17) Bann sirkonstans dan ki nou prese i kapab varye, me sa mesaz pwisan lo Rwayonm i reste parey.
6 Nou privilezye pour ganny servi par Zeova pour ed bann dimoun dan en fason inik e esansyel. Annou pa ezite! Annou montre kouraz e les Zeova “ouver en laport favorab pour nou” afen ki nou kapab koz sa bon nouvel avek lezot.—Kol. 4:2-4.