Eski ou kapab servi kot i annan en gran Bezwen?
1 Eski zanmen ou’n deza mazin pour al reste dan en landrwa kot i annan plis bezwen pour proklanmater Rwayonm? Si ou ganny envite pour “vin” ede, eski ou pou reazir parey lapot Pol ti fer? (Akt 16:9, 10) Dan bokou kongregasyon, i annan en bezwen pour bann fanmiy ki matir spirityelman, bann pionye pour ede kouver bann teritwar, bann ansyen ek bann serviter ministeryel kalifye pour ede diriz travay. I kapab ki teritwar i konpoze avek bann pti lavil izole ki disperse partou dan bann gran landrwa dan lakanpanny oubyen lo bann zil kot napa bokou zabitan. Lasal Rwayonm pli pre i kapab byen lwen. Travay profann i kapab limite. Letan i kapab pa toultan ideal. Eski ou pou pare pour aksepte en tel defi? Konman ou pou kapab reisi?
2 Lafwa ek Konfyans i neseser: Par swiv konsey Bondye, Abram ti kit Our, son lavil natal e i ti vwayaz 1,000 kilomet pour al Arann ansanm avek son madanm, son neve, ek son papa aze, Tera. (Zen. 11:31, 32; Nee. 9:7) Apre ki Tera ti’n mor, Zeova ti demann Abram, ki ti aprezan 75 an, pour kit Arann ansanm avek son fanmiy e al dan en pei ki Bondye ti pou montre li. Abram, Sarai, ek Lot ti “pran zot semen.” (Zen. 12:1, 4, 5) Byensir, Abram pa ti deplase pour li al servi dan en landrwa kot ti annan en gran bezwen pour bann minis. Me son deplasman ti demann serten keksoz. Ki sa keksoz?
3 Ti demann lafwa ek konfyans pour Abram antreprann en tel langazman. Son fason panse ek son fason viv ti bezwen sanze. I ti bezwen perdi proteksyon son bann fanmiy. Me i ti met konfyans dan Zeova pour pran swen avek li e osi son fanmiy. Bokou dimoun ozordi in manifeste zot konfyans dan Zeova dan en fason parey Abram.
4 Servi tanporerman dan en lot Teritwar: Eski ou’n deza rezwir benediksyon par travay dan en teritwar ki pa ganny kouver par en kongregasyon spesifik? Lannen pase dan 48 leta Letazini, 5,699 proklanmater ti kouver 163 dan sa 174 teritwar ki pa ganny travay par en kongregasyon spesifik. E 5,676 proklanmater ti ed 380 kongregasyon pour kouver bann teritwar ki rarman ganny travay. Pour serten, sa ti enplik vwayaz bann gran zistans. Eski sa zefor ti vo lapenn?
5 En frer sorti Kaliforni ki ti al Utah ti ekrir: “Premye kou letan mon ti ganny aprose avek sa lide pour anmenn en group dan en teritwar ki ti rarman ganny travay, mon ti ezite. Me mon ti deside aksepte pour fer li. Mon pa’n zanmen regrete fer sa, me sa leksperyans in osi sanz mon lavi. Toulezour mon remersye Zeova pour ki mon’n privilezye pour form parti sa vwayaz.” En frer sorti Florid ki ti al Tennessee ti dir ki sa ti en leksperyans pli memorab pour sa 20 an ki i dan laverite! En adolesan sorti Connecticut ki ti al West Virginia ti dir: “Sa ti pli bon leksperyans dan mon lavi!” Laplipar proklanmater i dakor ki servi pour menm en pti gin letan kot i annan en gran bezwen in ogmant zot lapresyasyon pour minister. Koz avek sa bann ki’n deza fer li. Ou pou vwar ki spirityelman zot in vin pli for e ki i tre probab ki zot pou anvi fer ankor si zot ganny sa loportinite.
6 Aksepte pour servi tanporerman dan en lot teritwar—parey bann zil elwannyen—kot i annan en gran bezwen i kapab servi dan en lot bi. Sa bann ki fer li i kapab ganny lenformasyon itil pour ed zot “estimen konbyen i pou koute” pour al etablir dan en lot landrwa.—Lik 14:28.
7 Zeova i determinen pour ki sa bon nouvel i ganny deklare “partou dan lemonn” avan ki lafen i arive. (Mat. 24:14) Si ou rekonnet sa, eski ou pou pare pour deplas kot i annan en gran bezwen, si ou kapab? I annan bezwen dan bokou landrwa.
8 Deplas kot i annan en gran Bezwen: Eski ou’n pran retret? Eski ou annan en reveni ki stab? Si non, eski ou kapab aranze pour travay pour ou menm? Eski ou kapab demann en transfer oubyen ganny ou lavi par mwayen telefonn oubyen konpiter dan nenport landrwa? Si ou pa kapab al dan en lot landrwa, eski ou kapab asiste en manm fanmiy pour servi dan en lot landrwa?
9 Si apre ki ou’n reflesir lo la dan lapriyer ou santi ki ou kapab al kot i annan en gran bezwen, diskit sa avek ou fanmiy ek bann ansyen dan ou kongregasyon. Apre, ekrir en let e donn bann ansyen pour ki zot kapab enkli zot obzervasyon ek rekomandasyon avan ki i ganny anvoye kot biro brans Lasosyete.
10 Ki ou pou met dan ou let? Ou laz, dat batenm, responsabilite dan kongregasyon, marye oubyen non, e si ou annan zanfan miner. Nonm sa landrwa kot ou ti a kontan servi, dapre ou bezwen personnel. Par egzanp, eski ou kapab viv dan en landrwa so e imid? Eski ou kapab tenir lafreser pandan liver? Eski ou kapab viv dan bann landrwa en pe anler lo montanny? Eski ou kapab koz lezot langaz?
11 Eski ou annan zel ek linisyativ? Eski ou sitiasyon i permet ou pour servi kot i annan en gran bezwen? Si wi, alor obzerv konman Zeova i kontinyelman devid bann benediksyon ris lo sa bann ki met konfyans dan li kan zot demontre lespri sakrifis!—Ps. 34:8; Mal. 3:10.