Avek Devouman bann “Don an Zonm” i pran Swen avek Troupo Bondye
1 Pa i en provizyon ranpli avek lanmour ki Zeova in fer atraver son Garson par fourni “bann don an zonm”! (Efe. 4:8, 11, 12, NW ) Zot annan en kantite responsabilite, enkli pran swen avek troupo Bondye aktivman e avek devouman. (1 Pyer 5:2, 3) Nou tou nou benefisye atraver sa provizyon ki sitan neseser. Sa bann zonm i annan en vre lentere personnel dan byennet spirityel tou dimoun ki swa zot pe rankontre serten difikilte, zot fek asosye avek kongregasyon, zot annan serten febles, oubyen zot in egare.—Fili. 2:4; 1 Tesa. 5:12-14.
2 Kan bann levennman troublan dan lemonn i koz lenkyetid, sa bann berze i azir konman “en landrwa kasyet kont divan e en labri kont tanpet lapli.” Kan nou fatige oubyen pe anmenn en fardo e nou santi sa bezwen pour ganny konsole, zot rekonfort nou, “parey delo ki pe koule dan en later sek” oubyen “parey lonbraz en gro ros dan en later epize.”—Iza. 32:2.
3 Ankouraz bann ki Inaktif: Bann ansyen i fer en zefor spesyal pour ankouraz bann frer ek ser ki’n vin iregilye oubyen inaktif, ed zot pour rekonmans partisip dan tou aktivite kongregasyon regilyerman. Vizit sa bann berze ki annan lanmour in ed en kantite dimoun pour asiste renyon kongregasyon regilyerman e vin for spirityelman ziska en pwen ki zot in rekonmans partisip dan predikasyon. Tou sa bann zefor delapar bann ansyen i reflekte swen Zeova ki ranpli avek lanmour ek gidans aktif Zezi Kri. I’n donn en legzanp par montre konsern pour nenport son bann mouton ki’n egare oubyen perdi.—Mat. 18:12-14; Zan 10:16, 27-29.
4 Bann berze i gete si napa okenn siny ki endike kan serten i kapab pe afeblir spirityelman. Nenport ki, ki montre en siny dekourazman, ki vin iregilye dan renyon, oubyen ki pe ralanti dan predikasyon i tre probab ki zot bezwen lasistans spirityel. Bann ansyen i pare pour ed okenn frer ek ser ki konmans demontre en tandans pour abiy parey bann dimoun dan lemonn oubyen ki devlop en latitid pour kritik kongregasyon. Avek lentere senser ek lafeksyon, bann sirveyan ki konsernen i volonterman ‘donn zot prop lavi’ avek zefor pour ed sa bann frer ek ser pour reganny zot lanmour pour Zeova.—1 Tesa. 2:8.
5 Dan lepase, serten Kretyen ki’n dedye zot lavi in perdi kontak avek kongregasyon, e zot in vin inaktif spirityelman akoz zot in ganny akable avek bann problenm lasante e ekonomik, oubyen presyon fanmiy. San ki zot kritike, bann ansyen i zantiman asir sa bann frer ek ser ki Zeova i enterese avek tou son mouton e i pou soutenir zot dan bann letan difisil. (Ps. 55:22; 1 Pyer 5:7) Bann berze ki alert i kapab ed troupo pour realize ki si zot ‘apros avek Bondye, i pou apros avek zot,’ e i pou rekonfort zot e fortifye zot.—Zak 4:8; Ps. 23:3, 4.
6 Apresye bann ki aze: Bann sou-berze ki annan lanmour i osi konsernen avek bann ki kapab ganny neglize. Parmi bann ki asosye avek tou kongregasyon i annan serten ki aze e malad, ki’n ganny konfye dan en kazern oubyen ganny met dekote konmkwa zot enkapab. Zot partisipasyon dan proklanm sa mesaz Rwayonm i limite akoz zot sirkonstans, e lezot i konpran sa. Petet zot ganny loportinite pour koz avek lezot dimoun selman kan dimoun i vizit zot, kan zot koz avek lezot pasyan oubyen bann ki pe pran swen avek zot. Toutfwa, nenport ki kantite ki zot kapab fer i ganny vwar konman en kontribisyon itil anver sa travay predikasyon. (Mat. 25:15) Menm si zot temwanny pour 15 minit, sa i devret ganny raporte, e zot pou kontinyen ganny konte konman bann proklanmater Rwayonm regilye.
7 Bann “don an zonm” i spesyalman okouran bann bezwen spirityel zot bann frer dan sa letan pandan lannen—peryod Memoryal. I en letan apropriye pour bann ansyen fer en zefor spesyal pour ed bann frer ek ser ki’n egare pour eksperyans ankor enn fwa sa lazwa ek lape lespri ki vin avek bon lasosyasyon dan kongregasyon. Nou rezwir kan nou vwar bann “frer dan lafwa” prezan dan bann renyon kongregasyon e dan predikasyon pe deklar ankor zot lafwa dan sakrifis ranson.—Gal. 6:10; Lik 15:4-7; Zan 10:11, 14.