Byen rasanble ansanm
1 Ki kantite fwa ou’n enpresyonnen par kreasyon ekstraordiner lekor imen? (Ps. 139:14) Sak manm nou lekor i travay byen ansanm avek kanmarad. Parol Bondye i konpar kongregasyon Kretyen avek en lekor byen kordinen. Anba Sef, Kris, tou manm kongregasyon i “byen rasanble ansanm, e lekor antye i tenir ansanm par bann zwentir ki i posede.” (Efe. 4:16) Alor, Zeova i kapab servi son pep ini pour akonpli bann keksoz merveye.
2 Bann manm dan kongregasyon premye syek ti travay “ansanm” pour pran swen avek zot bezwen spirityel e materyel. (Akt 2:44-47) Avek sipor Zeova, ansanm dan linite zot ti fer fas e sirmont bann lopozisyon vyolan. (Akt 4:24-31) Zot ti deklar mesaz Rwayonm partou kot zot ti ale, e kouver sa morso later ki zot ti konnen sa letan avek sa bon nouvel. (Kol. 1:23) Dan letan modern, kongregasyon Kretyen ansanm dan linite in akonpli menm keksoz lo en pli gran lesel. Ki bann fakter ki kontribye pour anmenn sa linite?
3 Ganny atire ansanm par Lansennyman Bondye: Partou lo later, nou ini par nou ladorasyon. Konman sa i posib? Nou rekonnet sa sours vizib Zeova ki fourni nou nouritir spirityel “kan i ler.” (Mat. 24:45) Nou osi apresye bann “don an zonm” ki i’n donn konman ansennyan dan kongregasyon. Ler nou aksepte avek limilite bann provizyon Zeova pour nouri nou spirityelman, nou konnesans lo Parol Bondye i agrandi e stimil dan nou en dezir pour imit Zezi konman son bann disip. Nou bezwen kontinyen etidye Parol Bondye, seryezman fer tou nou posib pour “ansanm ariv dan linite nou lafwa.” (Efe. 4:8, 11-13) Eski ou pe kontribye pour nou linite spirityel an lizan Labib toulezour?
4 Ini par Lasosyasyon Kretyen: Dan bann renyon Kretyen nou ganny atire ansanm dan en lasosyasyon etrwat par lanmour. Dan sa bann renyon, nou “rode konman pous kanmarad.” (Ebr. 10:24, 25) Sa i enplik regard pli lwen ki zis laparans eksteryer e vreman aprann konn nou bann frer ek ser, vwar zot parey Zeova i vwar zot, konman presye. (Aga. 2:7, not anba lo paz.) Anmezir ki nou ekout zot eksprim zot lafwa, nou lanmour pour zot i aprofondi e nou linite i ganny ranforsi. Eski ou ganny rekonnet konman en dimoun ki regilyerman asiste bann renyon kongregasyon?
5 Konpanyon Travay dan Predikasyon: Pres sa bon nouvel avek nou bann konpanyon Kretyen i ini nou pour fer lavolonte Bondye. Zapot Pol ti apresye bann ki ti ‘travay avek li pour Rwayonm Bondye.’ (Kol. 4:11) Partaz bann leksperyans e asiste enn a lot kan nou dan minister i ed nou pour akonpli nou travay konman Kretyen e ranforsi nou lyen linite.—Kol. 3:14.
6 Lenfliyans Lespri Sen i fer nou ini: Ler nou fer tou nou zefor pour fer son lavolonte, Zeova i beni nou avek son lespri. Sa i ed nou pour redwir bann dezakor e viv ansanm dan linite. (Ps. 133:1) I motiv nou ‘pour prezerv linite ki Sent-Espri i donnen par lape ki ini nou ansanm avek kanmarad.’ (Efe. 4:3) Sakenn ant nou i kapab kontribye pour sa larmoni ki egziste parmi pep Bondye par manifeste fri lespri dan nou mannyer azir avek lezot.—Gal. 5:22, 23.
7 Servi ansanm dan linite anba lotorite Kris i fer ‘lekor antye grandi e devlope par lanmour.’ (Efe. 4:16) Deplis, i glorifye Zeova, “Bondye ki donn lape.”—Rom. 16:20.