Etablir bann Lobzektif spirityel
1 I vreman en gran privilez pour loue Zeova pour leternite! Pour ed nou akonpli sa lobzektif, nou kapab la konmela etablir bann lobzektif spirityel e travay dir pour zot. Sa i permet nou pour servi nou lenerzi avek sazes. (1 Kor. 9:26) Ki bann lobzektif ki ou pou kapab arive atenn?
2 Letid Labib: Eski ou prepare pour sak renyon kongregasyon? Si wi, eski ou gard enpe letan pour fer resers ek meditasyon kan ou pe etidye? Par egzanp, letan ou pe prepar letid Latour Veyer pour lasemenn ek Letid Liv Kongregasyon, eski zis ou souliny bann larepons oubyen eski ou regard bann verse ki’n ganny mansyonnen e osi reflesir lo bann rezon pour leksplikasyon ki’n ganny donnen? Eski ou kapab fer li ou lobzektif pour fer resers lo detrwa pwen sak semenn dan lektir Labib lasemenn ki’n ganny progranmen pour Lekol Minister Teokratik? Pour fer resers lo bann keksoz spirityel i demann letan ek zefor, me i anmenn bann rekonpans ris.—Prov. 2:4, 5.
3 Bann Renyon Kongregasyon: En lot lobzektif se pour asiste tou le senk renyon kongregasyon regilyerman. Ariv ase boner pour asosye avek lezot konpanyon Kretyen e pour partisip dan kantik ek lapriyer i ede pour fortifye leta lespri kongregasyon. Nou kapab osi fer zefor pour fer komanter dan sak renyon e esey amelyor nou bann komanter. Petet ou kapab montre konman en verse i relye avek sa diskisyon oubyen fer resorti konman sa lenformasyon i aplik dan lavi toulezour.—Ebr. 10:24, 25.
4 Predikasyon: Nou minister i amelyor en kantite kan nou fikse bann lobzektif. Eski ou annan en lobzektif personnel lo lakantite er-d-tan ki ou plàn pour depanse dan servis sak mwan? Serten i vwar sa itil. Oubyen eski ou kapab amelyore dan serten laspe ou minister, tel konman servi Labib dan aktivite port-an-port, prepar byen pour fer bann retourn vizit, fer zefor pour konmans en letid Labib, oubyen ansenny bann letid dan en fason pli efikas?
5 Paran, eski ou pe ankouraz ou zanfan pour fikse bann lobzektif dan servis Zeova? Ed zot pour vwar ki servi konman en pionye, en misyonner, oubyen en manm lafanmiy Betel i en fason ekselan pour montre profonder zot lapresyasyon pour Zeova.—Ekle. 12:1.
6 Kan nou egzamin nou bann aktivite, fikse bann lobzektif spirityel, e apre travay pour atenn zot, nou pou trouv plis lazwa dan nou servis e nou pou vin en sours lankourazman pour lezot.—Rom. 1:12.