Demontre Fidelite ler en Manm Fanmiy i ganny ekskli
1. Ki sitiasyon ki kapab teste fidelite en Kretyen?
1 Sa relasyon antre bann manm fanmiy i kapab vreman for. Sa i anmenn en tes lo en Kretyen ler son mari oubyen madanm, zanfan, paran, oubyen lezot fanmiy pros i ganny ekskli oubyen i dezasosye son lekor avek kongregasyon. (Mat. 10:37) Ki mannyer bann Kretyen fidel i devret tret sa manm fanmiy? Eski i fer en diferans si sa dimoun i viv ansanm avek ou? Premyerman, annou revwar sa ki Labib i dir konsernan sa size. Bann prensip i aplik pour tou le de, bann ki’n ganny ekskli osi byen ki bann ki’n dezasosye zot lekor.
2. Dapre Labib, konman ki bann Kretyen i tret bann ki’n ganny ekskli dan kongregasyon?
2 Konman pour tret bann ki’n ganny ekskli: Parol Bondye i demann bann Kretyen pour pa asosye oubyen frekant en dimoun ki’n ganny ekskli dan kongregasyon: “Zot pa devre asosye zot avek personn ki annan non frer, si i annan en lavi imoral, ki anvye, ki en ladorater zidol, ki kalomni son prosen, ki en soular ou en voler; pa ni menm manz avek en tel dimoun. . . . Sas bann dimoun ki komet sa ki mal parmi zot.” (1 Kor. 5:11, 13, nou ki’n met an italik.) Parol Zezi ki ganny rikorde dan Matye 18:17 i osi koz lo sa: “Konsider [sa enn ekskli] konman en payen oubyen en kolekter taks.” Bann ki ti ekout Zezi ti konn byen ki bann Zwif dan sa letan pa ti frekant bann dimoun lezot nasyon e ki zot ti rezet bann kolekter taks. Zezi ti alor pe enstri son bann disip pour pa asosye avek bann ki’n ganny ekskli.—Vwar Latour Veyer le 15 Septanm, 1981, paz 18-20 an Angle oubyen Latour Veyer le 15 Desanm, 1981, paz 17-19 an Franse.
3, 4. Ki kalite lasosyasyon avek en dimoun ekskli oubyen dezasosye ki defann?
3 I vedir ki bann Kretyen fidel pa koz keksoz spirityel avek nenport dimoun ki’n ganny ekskli dan kongregasyon. Me i enplik plis ki sa. Parol Bondye i deklare ki fodre “pa ni menm manz avek en tel dimoun.” (1 Kor. 5:11, nou ki’n met an italik.) Alor, nou osi evite asosye avek en dimoun ekskli dan bann rankont sosyal. Savedir nou pa pou asosye avek li dan en piknik, sport, oubyen al laboutik ansanm, al get teat, manz avek li swa dan lakaz oubyen dan en restoran.
4 Eski nou kapab koz avek en dimoun ki’n ganny ekskli? I vre ki Labib pa mansyonn tou sitiasyon, me 2 Zan 10 i ed nou pour ganny pwennvi Zeova lo sa size: “Si en dimoun i vin kot ou, e i pa anmenn sa lansennyman pa resevwar li se ou, e refize menm dir li bonzour.” Latour Veyer le 15 Septanm, 1981, paz 25, ti fer sa komanter lo sa verse: “En senp ‘bonzour’ avek en dimoun i kapab premye pa ki devlop dan en konversasyon e petet menm en lanmitye. Eski nou pou anvi fer sa premye pa avek en dimoun ki’n ganny ekskli?”
5. Ler en dimoun i ganny ekskli, ki i perdi?
5 I menm parey avek sa ki sa menm Latour Veyer i dir lo paz 31: “Kan en Kretyen i les pese domin li e bezwen ganny ekskli, i perdi bokou: laprouvasyon Bondye; . . . lasosyasyon agreab avek bann frer ek ser, enkli preski tou lasosyasyon ki i ti annan avek bann fanmiy Kretyen.”
6. Eski en Kretyen i devret aret tou lasosyasyon avek en fanmiy ekskli ki reste dan menm lakour avek li? Eksplike.
6 Manm Fanmiy ki reste dan menm Lakour: Eski i vedir bann Kretyen ki pe viv dan menm lakour avek en manm fanmiy ekskli i bezwen evite koze, manze, e asosye avek li pandan ki zot fer zot aktivite toulezour? Latour Veyer le 15 Avril, 1991, an Angle oubyen an Franse, dan son not anba lo paz 22, i deklare: “Si dan lakour en Kretyen i annan en manm fanmiy ki’n ganny ekskli, sa dimoun pou kontinyen form parti bann aktivite normal toulezour sa lakour.” Alor, i pou depan lo lezot manm fanmiy pour deside ziska ki pwen zot pou enkli sa manm fanmiy ekskli ler zot pe manze oubyen pour partisip dan bann aktivite lakour. Me zot pa pou anvi donn bann frer ek ser ki zot asosye avek sa lenpresyon ki tou keksoz i menm parey avek avan ki sa dimoun ti ganny ekskli.
7. Ki mannyer relasyon spirityel dan en lakour i sanze ler en manm fanmiy i ganny ekskli?
7 Sepandan, Latour Veyer le 15 Septanm, 1981, paz 28, i fer resorti konsernan en dimoun ekskli oubyen dezasosye: “Bann relasyon spirityel ki zot ti annan oparavan i ganny konpletman kase. Sa i leka menm avek son bann fanmiy, enkli sa bann ki reste dan menm lakour avek li. . . . Alor sa pou vedir sanzman dan relasyon spirityel ki ti kapab egziste avan dan sa lakaz. Par egzanp, si sa mari ki en ekskli, son madanm ek zanfan pa pou santi zot alez si sa mari ki kondwir en letid Labib an fanmiy oubyen pe diriz lektir Labib e fer lapriyer. Si i anvi fer en lapriyer, par egzanp avan manze, i annan en drwa pour fer li dan son prop lakaz. Me zot kapab silansyezman ofer zot prop lapriyer avek Bondye. (Prov. 28:9; Ps. 119:145, 146) Ki pou fer si en dimoun ekskli dan en lakour i anvi prezan ler lafanmiy i lir Labib ansanm oubyen fer en letid Labib? Lezot i kapab les li asiste pour ekoute si i pa pou esey ansenny zot oubyen partaz son lide relizye.”
8. Ki responsabilite bann paran Kretyen i annan anver en zanfan miner ki’n ganny ekskli e ki pe reste avek zot?
8 Si en zanfan miner ki pe viv avek son paran i ganny ekskli, i ankor responsabilite bann paran Kretyen pour elve li. Latour Veyer le 15 Novanm, 1988, paz 20, i dir: “Zis parey zot pou kontinyen donn li manze, lenz, ek landrwa reste, zot bezwen enstri e disiplin li an armoni avek Parol Bondye. (Proverb 6:20-22; 29:17) Bann paran ki annan lanmour i kapab alor aranze pour fer en letid Labib avek li, menm si i’n ganny ekskli. Petet i pou benefisye plis e retir plis koreksyon si zot etidye li, li tousel. Oubyen zot kapab deside si i kapab kontinyen partisip dan letid an fanmiy.”—Vwar osi Latour Veyer le 1 Oktob, 2001, paz 27-28.
9. Ziska ki degre en Kretyen i devret annan kontak avek en manm fanmiy ekskli ki pa viv dan menm lakaz avek li?
9 Manm Fanmiy ki pa pe viv dan menm Lakaz: “Sitiasyon i diferan si sa dimoun ekskli oubyen dezasosye i en manm fanmiy ki pa reste dan menm lakaz avek ou,” Latour Veyer le 15 Avril, 1988, paz 28 i dir. “I kapab posib pour napa preski ditou kontak avek sa manm fanmiy. Menm si i annan serten zafer familyal ki fer annan kontak, sa kontak i devret sertennman limite,” an armoni avek konmannman Bondye ki zot “pa devre asosye zot avek personn” ki koupab pour fer pese san repantir. (1 Kor. 5:11, nou ki’n met an italik.) Bann Kretyen fidel i devret esey zot mye pour evite asosye san okenn rezon enportan avek en tel manm fanmiy, menm limit otan posib bann tranzaksyon biznes avek li.—Vwar osi Latour Veyer le 15 Septanm, 1981, paz 29-30, an Angle ek Latour Veyer le 15 Desanm 1981, paz 27-29, an Franse.
10, 11. Ki en Kretyen pou pran an konsiderasyon avan ki i les en manm fanmiy ekskli retourn viv kot li?
10 Sa menm Latour Veyer i fer resorti en lot sitiasyon ki kapab arive: “Si en manm fanmiy pros, par egzanp en garson oubyen en papa ki pa reste dan menm lakaz avek ou, i ganny ekskli e plitar i anvi retournen pour reste avek ou? Sa fanmiy pou deside ki pour fer depandan lo sitiasyon sa dimoun. Par egzanp, en paran ekskli i kapab malad oubyen nepli kapab pran swen avek son lekor lo plan finansyel oubyen fizik. Bann zanfan Kretyen i annan en lobligasyon biblik e moral pour ed li. (1 Tim. 5:8) . . . Sa ki zot pou fer i depan lo bann fakter tel parey vre bezwen sa paran, son latitid, ek konsern ki sa sef lakour i annan pour byennet spirityel son fanmiy.”—Latour Veyer le 15 Septanm, 1981, paz 28-9.
11 An sa ki konsern en zanfan, sa menm lartik i kontinyen: “Parler bann paran Kretyen in aksepte pour en serten letan en zanfan ekskli ki pa byen fizikman oubyen emosyonnelman pour reste avek zot. Me dan sak ka sa bann paran i kapab evalye sitiasyon sa zanfan. Eski en garson ekskli ti viv li tousel, e la aprezan i nepli kapab fer li? Oubyen i anvi retournen zis akoz sa pou fer son lavi pli konfortab? Ki son latitid ek moralite? Eski i pou anmenn ‘lelven’ dan lakour?—Gal. 5:9.”
12. Nonm serten benefis ki laranzman konsernan dimoun ekskli i anmennen?
12 Benefis Fidelite avek Zeova: Korpere avek laranzman Labib pour bann dimoun ekskli e evit bann ki fer sa ki mal san repantir i anmenn benefis. I prezerv lapirte kongregasyon e disteng nou konman bann ki mentenir standar moral onivo Labib. (1 Pyer 1:14-16) I protez nou kont bann lenfliyans koronpi. (Gal. 5:7-9) I osi donn sa enn ki’n fer pese en loportinite pour benefisye plennman avek sa disiplin ki i’n gannyen, ki kapab ed li pour prodwir “fri lape ek lazistis.”—Ebr. 12:11.
13. Ki sanzman ki en fanmiy ti fer e ki rezilta sa ti anmennen?
13 Apre ki zot ti’n antann en diskour dan en lasanble rezyonal, en frer ek son ser ti realize ki zot bezwen fer en sanzman dan fason ki zot ti tret zot manman, ki ti’n ganny ekskli pour sis an e ti pe reste en lot landrwa. Deswit apre sa lasanble, sa frer ti apel son manman, e apre ki i ti’n reasir li ki zot kontan li, i ti eksplike ki zot pou nepli kapab koz avek li ankor amwen bann sitiasyon enportan ki konsern fanmiy ki ti pou obliz zot annan kontak. En pe letan apre sa, son manman ti konmans asiste bann renyon e finalman i ti ganny reentegre. Osi, son mari non krwayan ti konmans etidye e avek letan i ti batize.
14. Akoz nou devret fidelman siport laranzman konsernan dimoun ekskli?
14 Fidelman soutenir laranzman konsernan dimoun ekskli, ki mansyonnen dan Labib i demontre nou lanmour pour Zeova e fourni en larepons pour sa enn ki pe provok Li. (Prov. 27:11) An retour, nou kapab asire ki Zeova pou beni nou. Lerwa David ti ekrir konsernan Zeova: “Konsernan son bann lalwa, mon pa pou elwanny mwan avek zot. Avek en dimoun fidel ou pou azir avek fidelite.”—2 Sam. 22:23, 26.