Ansenny lezot Langaz pir
1 Menm si zot sorti dan plizyer “nasyon, tribi, pep ek lalang,” bann Temwen Zeova i en pep ki ini. Zot en vre lasosyasyon frer enternasyonal. (Rev. 7:9) Dan sa lemonn divize ki nou pe viv ladan, sa i vreman remarkab. Konman ki sa i posib? Akoz nou’n ganny donnen “en langaz pir.”—Tse. 3:9.
2 Bann Lefe merveye: Kisisa sa langaz pir? Se konprenezon egzakt lo laverite ki trouve dan Parol Bondye konsernan Zeova ek son plan, sirtou laverite konsernan Rwayonm Bondye. Parey Zezi ti predir, sa laverite i disponib par mwayen en lorganizasyon vizib, ‘lesklav fidel e pridan.’ Son rezilta se ki aprezan dimoun “sorti dan tou langaz bann nasyon” pe aksepte laverite.—Mat. 24:45; Zeka. 8:23.
3 Anmezir ki dimoun i aprann langaz pir, zot santi zot pouse pour viv an akor avek bann standar Zeova. Zot aprann pour “reste byen ini ansanm dan en menm lespri e en menm lopinyon.” (1 Kor. 1:10) Lansennyman divin i osi fer zot annan en kondwit drwat e koz sa ki byen e vre, sirtou konsernan partaz sa bon nouvel avek lezot. (Tit 2:7, 8; Ebr. 13:15) Sa bann sanzman merveye i onor Zeova.
4 Par egzanp, en zonm ki ti antann sa bon nouvel ti annan en kantite kestyon. Labib ti reponn tou son kestyon. Pouse par sa ki i ti’n tande, i ti konmans etidye de fwa par semenn e asiste bann renyon. I ti sirprann par sa bon lakey ki i ti resevwar kot Lasal Rwayonm, vi ki bokou dimoun ki ti pe asiste ti sorti dan diferan ras. En pti pe letan apre, li avek son madanm ti fer bann sanzman dan zot lavi e batize. Depi sa, i’n ed apepre 40 dimoun pour servi Zeova, enkli plizyer manm son fanmiy. Kantmenm i pe soufer avek en dezabilite, resaman i’n konmans fer pionye.
5 Ansenny lezot: Bann levennman lemonn pe fer en kantite dimoun senser reegzamin zot fason panse ek zot lavi. Parey Zezi, nou devret anvi ed sa bann dimoun. Bann retourn vizit ek letid Labib efikas i en bon fason pour ed bann dimoun senser aprann sa langaz pir.
6 En lapros ki’n ganny vwar konman efikas avek bann dimoun ki tre okipe se pour kondwir en letid Labib bref lanmenm devan laport. (km 5/02 p.1) Eski ou’n deza eseye? Ler ou pe prepare pour fer en retourn vizit, swazir en prezantasyon ki adapte avek sa met lakour dan sipleman Nou Minister Rwayonm Zanvye 2002. Plizyer prezantasyon dan sa sipleman in ganny prepare pour anmenn direkteman ver en diskisyon lo brosir Ekspekte oubyen liv Konnesans. Egzers sa prezantasyon afen pour ou kapab fasilman anmenn ou lentrodiksyon ver en diskisyon lo enn bann paragraf. Swazir enn oubyen de verse dan paragraf pour lir e diskite, e prepar en kestyon pour konklir ou konversasyon. Sa pou anmenn ou ver sa paragraf ki ou’n plàn pour diskite lo prosenn vizit.
7 Pep Zeova pe eksperyans bokou benediksyon akoz zot in aprann sa langaz pir. Annou fer tou nou zefor pour ed lezot zwenn ansanm avek nou pour “envok non Zeova” e pour “servi li zepol kont zepol.”—Tse. 3:9.