“Fer Plas pour li”
1 En fwa, letan i ti pe koz avek son bann disip konsernan maryaz, Zezi ti refer avek lavi selibater konman en “don.” Apre i ti dir: “Les sa ki kapab fer plas pour li, fer li.” (Mat. 19:10-12, NW ) Detrwa lannen plitar, zapot Pol ti ekrir konsernan lavantaz ki lavi selibater i anmennen e i ti ankouraz lezot pour swiv son legzanp pour pa marye. (1 Kor. 7:7, 38) Bokou dimoun ozordi in “fer plas” pour reste selibater e zot pe rezwir son bann lavantaz. Lekel serten sa bann lavantaz?
2 Servi ‘san ganny distrer’: Pol ti konpran ki reste en selibater ti donn li loportinite pour servi Zeova ‘san ganny distrer.’ Pareyman ozordi, en frer selibater i kapab annan sa dezir pour swiv Lekol Formasyon Ministeryel. En selibater i pli lib pour antreprann servis pionye, aprann en lot langaz, al dan landrwa kot i annan en pli gran bezwen, servi dan Betel, oubyen disponib pour lezot privilez spesyal. I kapab annan plis letan ek loportinite pour fer letid personnel oprofon, meditasyon e osi senserman koz avek Zeova dan lapriyer. En dimoun ki pa’n marye i souvannfwa annan plis letan pour ofer son lekor pour asiste lezot. Tou sa bann aktivite i pour son “prop benefis.”—1 Kor. 7:32-35; Akt 20:35.
3 Servi Bondye san ganny distrer i anmenn en kantite rekonpans. Apre 27 an ki i’n reste Kenya, en ser selibater ti ekrir: “Mon ti annan sitan en kantite zanmi ek en kantite travay pour fer! Nou ti fer keksoz ansanm [e] vizit kanmarad. . . . Mon ti kapab servi sa liberte anplis ki reste tousel i anmennen pour fer bokou dan minister, e sa in donn mwan bokou lazwa.” I ti azoute: “Diran bann lannen ki’n pase, mon relasyon avek Zeova in agrandi.”
4 Servi byen sa Don: Lavi Selibater: Zezi ti dir ki rezon pour kiltiv sa don—lavi selibater—i devret “akoz Rwayonm Lesyel.” (Mat. 19:12) Parey avek nenport don, lavi selibater i devret ganny byen servi pour kapab anmenn lazwa ek byenfe. Par sezi bann loportinite ki selibater i anmennen e par depan lo Zeova pour lasazes ek lafors, bokou dimoun ki pa’n marye in aksepte sa don pour reste tousel.