Kwen Kestyon

◼ Ki prekosyon nou devret pran letan nou pe rann temwanny avek bann prizonnyen?

Dan lemonn antye i annan apepre wit milyon prizonnyen. Serten zot in montre lentere dan sa bon nouvel. (1 Tim. 2:4) En biro brans i resevwar apepre 1,400 let sak mwan sorti kot bann prizonnyen ek zot fanmiy ki pe demann bann piblikasyon oubyen en vizit. Menm si bokou prizonnyen i annan en lentere senser, leksperyans in montre ki serten i fer krwar zot enterese zis pour zot profit lo pep Bondye. Vi ki sa sitiasyon i egziste, tou proklanmater pe ganny demande pour swiv sa bann prekosyon ler zot pe rann temwannyaz avek bann prizonnyen.

Laplipar-di-tan bann prizonnyen i ganny temwannyaz par let. Nou rekomande ki bann ser pa zanmen ekrir bann zonm prizonnyen, menm si i avek bi pour donn led spirityel. Se zis bann frer kalifye ki devret okip sa sitiasyon. Bann ser kalifye i kapab ganny demande pour ekrir bann prizonnyen madanm ki eksprim lentere senser dan laverite Labib. Menm si zot demande, pa anvoy larzan ouswa kado pour bann prizonnyen.

Ler en prizonnyen i montre lentere, fodre ki ou donn son non ek ladres avek sa kongregasyon ki pre avek sa prizon. Normalman bann frer kalifye dan sa kongregasyon i konnen konman pour tret bann sitiasyon ki kapab leve. Si personn pa konn sa kongregasyon, sa lenformasyon i devret ganny anvoye kot biro brans.

I akseptab pour bann frer ki ganny dezinyen organiz renyon avek bann prizonnyen pour ki plizyer i kapab etidye anmenmtan. Me bann levennman spesyal kot bann proklanmater i asosye libreman avek bann prizonnyen pa devret ganny fer kot prizon. Deplis, i en pe danzere pour bann proklanmater vizit en prizon an bonnavini e devlop en relasyon pros avek bann prizonnyen.

Annou vin “pridan parey bann serpan e dou parey bann kolonm” letan nou pe partaz sa bon nouvel avek bann prizonnyen.—Mat. 10:16.