Fer konnen Non Bondye
1. Ki lefe aprann non Bondye i kapab fer lo dimoun?
1 Ki mannyer ou ti reazir ler ou ti konn non Bondye pour premye fwa? Reaksyon bokou dimoun i menm parey avek pour en madanm ki ti dir: “Ler mon ti vwar non Bondye pour premye fwa dan Labib, mon ti plere. Mon ti telman touse pour konnen ki mon ti kapab vreman konn e servi non personnel Bondye.” Pour sa madanm, aprann non Bondye ti en pa enportan pour konn Zeova konman en endividi e pour kapab batir en relasyon avek li.
2. Akoz i irzan pour nou ansenny lezot lo Zeova?
2 Akoz fer konn sa Non? Konn non Bondye i enkli aprann konn son bann kalite, son plan, ek keksoz ki i fer. Nou devret osi konn non Bondye pour nou kapab ganny sove. Zapot Pol ti ekri: “Tou sa ki envok non Senyer pou ganny sove.” Me Pol ti rezonnen, “ki mannyer zot pou envok li,” amwen ki zot premyerman aprann konn Zeova e egzers lafwa dan li? Alor, i irzan pour bann Kretyen fer lezot konn non Bondye ek tou sa ki sa non i reprezante. (Rom. 10:13, 14) Me i annan en rezon pli enportan akoz dimoun i devret konn non Bondye.
3. Ki nou rezon pli enportan pour prese?
3 Dan bann lannen 1920, pep Bondye ti rekonnet sa size iniversel dan Labib ki enplik zistifikasyon drwa Bondye pour dirize ek sangtifikasyon son non. Avan ki Zeova i detri bann mesan pour retir sa repros lo son non, laverite lo li i devret “ganny fer konnen dan tou later.” (Iza. 12:4, 5; Ezek. 38:23) Alor, nou rezon pli enportan pour prese se pour loue Zeova piblikman e pour sangtifye son non devan limanite. (Ebr. 13:15) Lanmour pour Bondye ek nou prosen pou pous nou pour partisip plennman dan sa travay ki Bondye in donn nou.
4. Ki mannyer Temwen Zeova in arive ganny idantifye avek non Bondye?
4 “En Pep pour son Non”: An 1931, nou ti adopte sa non Temwen Zeova. (Iza. 43:10) Depi sa, pep Bondye in telman fer konnen non Bondye, ki liv Prédicateurs, paz 124, i fer resorti: “Partou dan lemonn, nenport dimoun ki libreman servi non Zeova i osito ganny idantifye konman en Temwen Zeova.” Eski ou osi ou ganny idantifye dan sa fason? Rekonesans pour labonte Zeova i devret pous nou pour ‘beni son non,’ par koz lo li dan tou lokazyon apropriye.—Ps. 20:7; 145:1, 2, 7.
5. Ki rapor nou kondwit i annan avek port non Bondye?
5 Konman “en pep pour son non,” nou bezwen mentenir son standar. (Akt 15:14; 2 Tim. 2:19) Souvan sa ki dimoun i premyerman remarke lo Temwen Zeova se zot bon kondwit. (1 Pyer 2:12) Zanmen nou pou anvi sali son non par dezobei son bann prensip ouswa met son ladorasyon dan dezyenm plas dan nou lavi. (Lev. 22:31, 32; Mal. 1:6-8, 12-14) Plito, annou viv en fason ki nou montre ki nou seri sa privilez pour port non Bondye.
6. Ki privilez nou kapab rezwir la konmela e pour touzour?
6 Ozordi, nou vwar parol Zeova pe ganny akonpli: “Depi soley leve ziska soley kouse, mon non pou vin gran parmi bann nasyon.” (Mal. 1:11) Annou kontinyen fer konnen laverite lo Zeova e “beni son non sen pour letan endefini, wi pour touzour.”—Ps. 145:21.