En Travay ki soulaz nou
1 Mesaz Labib i soulaz tou bann ki aksepte li e ki aplik li dan zot lavi. (Ps. 19:7, 8) I ede liber zot avek bann fo lansennyman ek bann pratik danzere. I osi ofer en lespwar asire pour lavenir. Me pa zis bann ki resevwar sa bon nouvel ki benefisye. Bann ki partaz bann laverite Labib rekonfortan avek lezot i benefisye zot osi.—Prov. 11:25.
2 Predikasyon i fortifye nou: Zezi ti dir ki bann ki pare pour aksepte sa zoug senbolik konman en disip Kris, ki enkli predikasyon e fer disip, pou “ganny repo.” (Mat. 11:29) Pres avek lezot ti fortifye Zezi. I ti parey nouritir pour li. (Zan 4:34) Ler i ti anvoy sa 70 disip prese, zot ti rezwir ler zot ti vwar ki Zeova ti pe soutenir zot zefor.—Lik 10:17.
3 Pareyman, bokou Kretyen ozordi i ganny fortifye letan zot partisip dan predikasyon. En ser ti dir: “Predikasyon i soulaz mwan akoz i donn mon lavi en sans ek en bi. Bann problenm personnel ek bann difikilte toulezour i preski disparet ler mon partisip dan predikasyon.” En lot proklanmater devoue ti dir: “Predikasyon . . . i fer mwan rapel toulezour ki Zeova i reel e i anmenn lape ek boner enteryer ki en dimoun pa kapab gannyen dan okenn lot fason.” Pa i en privilez pour nou ‘travay ansanm avek Bondye’!—1 Kor. 3:9.
4 Zoug Kris i fasil: Menm si bann Kretyen i ganny ankouraze pour “fer bann zefor entans,” Zezi pa demann nou pour fer plis ki nou kapab fer. (Lik 13:24, NW ) Anfet, avek lanmour i envit nou pour vin anba son zoug ansanm avek li. (Mat. 11:29) Bann ki bezwen lalit avek bann sitiasyon difisil i kapab annan konfyans ki zot servis ki zot fer avek tou zot leker, menm si i pti gin, i fer Bondye plezir.—Mark 14:6-8; Kol. 3:23.
5 I vreman en soulazman pour servi en Bondye ki apresye tou sa ki nou fer pour son non! (Ebr. 6:10) Annou toultan esey fer nou mye pour li.