Imit Labonte Zeova
1 Apre ki nou’n apresye en zoli soley kouse ouswa en bon lasyet manze, eski nou pa santi nou pouse pour remersye Zeova, Sours tou labonte? Son labonte i pous nou pour anvi imit li. (Ps. 119:66, 68; Efe. 5:1) Ki mannyer nou kapab demontre labonte?
2 Anver bann ki pa Temwen: En fason ki nou kapab imit labonte Zeova se par demontre lentere senser pour bann ki pa partaz menm krwayans avek nou. (Gal. 6:10) Par demontre labonte dan bann fason pratik, i kapab annan en lefe pozitif lo konman zot vwar bann Temwen Zeova ek sa mesaz ki nou anmennen.
3 Par egzanp, ler i ti pe espere pour vwar dokter kot en klinik, en zenn frer pionye ti asiz obor en madanm aze ki ti paret pli malad ki laplipar dimoun ki ti la. Ler ti’n ariv son tour pour vwar dokter, i ti les sa madanm al dan son plas. Plitar i ti zwenn sa madanm ankor, safwasi dan bazar. Sa madanm ti byen kontan pour vwar li. Menm si avan i pa ti enterese pour ekout sa bon nouvel, i ti dir ki aprezan i konnen ki Temwen Zeova i vreman kontan zot prosen. I ti konmans etidye Labib regilyerman.
4 Anver nou bann Frer ek Ser: Nou osi imit labonte Zeova ler nou fer bokou zefor pour ed bann konpanyon Kretyen. Dan bann letan dezas, nou parmi bann premye pour vin ed nou bann frer ek ser. Nou demontre menm leta lespri ler nou ed bann ki bezwen transpor pour vin renyon, vizit bann ki malad, e pour demontre plis lafeksyon anver bann ki nou pa tro konnen dan kongregasyon.—2 Kor. 6:11-13; Ebr. 13:16.
5 En lot fason ki Zeova i demontre labonte se kan i “pare pour pardonnen.” (Ps. 86:5) Parey li, nou kapab demontre labonte par fer zefor pour pardonn lezot. (Efe. 4:32) Sa i ede pour fer nou lasosyasyon avek bann konpanyon Kretyen vin ‘byen e agreab.’—Ps. 133:1-3.
6 Fotespere ki gran labonte Zeova i fer nou deborde avek louanz pour li e pour vin zwaye e osi pous nou pour esey imit son labonte dan tou sa ki nou fer.—Ps. 145:7; Zer. 31:12.