Zenn—Batir en bon e solid Trezor pour Lavenir
1. Akoz bann zenn Kretyen i bezwen devlop lafwa solid?
1 Kwa ki premye dan ou lespri? Ki ou pans lo la? Eski ou preokipasyon prensipal i konsantre lo bann keksoz aktyel, ouswa zot konsantre lo lavenir e lo sa ki Bondye in promet? (Mat. 6:24, 31-33; Lik 8:14) I neseser pour annan lafwa solid pour azir an akor avek bann promes Bondye, parey ou kapab vwar atraver legzanp Abraam ek Moiz. (Ebr. 11:8-10, 24-26) Ki mannyer ou kapab devlop en tel lafwa e batir “en bon e solid trezor pour lavenir”?—1 Tim. 6:19.
2. Ki nou aprann atraver legzanp Lerwa Yosiya?
2 Resers Zeova: Si ou annan en progranm aktivite spirityel avek ou fanmiy, sa i en bon keksoz. Me pa prezimen ki en tel progranm pou otomatikman fer ou ganny en lafwa solid. Pour trouv “konnesans Bondye,” ou devret personnelman resers Zeova. (Prov. 2:3-5; 1 Kron. 28:9) Zenn Lerwa Yosiya ti fer sa. Menm si i ti grandi dan en lanvironnman ki pa ti ed li pour grandi spirityelman, “i ti konmans resers Bondye son zanset David” ler i ti annan 15 an.—2 Kron. 34:3.
3. Ki mannyer bann zenn ozordi i kapab resers Zeova?
3 Ki mannyer ou kapab resers Zeova? Par egzamin atantivman sa ki ou krwar e ‘vwar pour ou menm’ ki i vreman laverite. (Rom. 12:2, NW ) Par egzanp, eski ou kapab eksplike ki Labib i dir konsernan disan oubyen prouve ki Rwayonm Bondye ti konmans dominen dan lesyel an 1914? Ganny ‘en konnesans egzakt laverite’ i en par enportan pour batir en bon e solid trezor pour lavenir.—1 Tim. 2:3, 4.
4. Ki mannyer bann proklanmater ki pa ankor batize i kapab demontre zot progre?
4 Resers Zeova ti prodwir bon rezilta pour Yosiya. Avan ki i ti ariv laz 20 an, i ti azir avek kouraz pour retir tou fo ladorasyon dan sa pei. (2 Kron. 34:3-7) Pareyman, ou progre spirityel pou ganny demontre par ou aksyon. (1 Tim. 4:15) Si ou en proklanmater ki pa ankor batize, esey amelyor kalite ou predikasyon. Pa kontant ou zis pour ofer piblikasyon. Fer li ou lobzektif pour servi Labib, pour rezonn avek dimoun, e pour kiltiv lentere ki ou trouve. (Rom. 12:7) Sa pou ed ou pour progrese spirityelman.
5. Ki loportinite bann Kretyen batize i annan pour amelyor zot predikasyon?
5 Fer ou mye pour Zeova: Ler ou dedye ou lavi avek Zeova par batenm, ou vin en minis apwente par Bondye. (2 Kor. 3:5, 6) Sa i donn ou bann loportinite pour servi Zeova aplentan. Zot enkli fer pionye ensi ki servis Betel, misyonner, ek servis enternasyonal. Lezot fason ankor kot ou kapab amelyor ou predikasyon se par aprann en lot langaz ouswa al reste dan en landrwa kot i annan en gran bezwen.
6. Ki mannyer nou tou nou kapab batir en bon e solid trezor pour lavenir?
6 Byensir, pa tou dimoun ki kapab fer zot disponib pour sa bann privilez, me sakenn ant nou i kapab fer nou mye pour Zeova. (Mat. 22:37) Nenport ki sitiasyon ki ou ladan, servi Zeova i devret vin ou priyorite. (Ps. 16:5) Par fer sa, ou pou pe batir en bon e solid trezor pour lavenir.