Devlop en Relasyon entim avek Zeova
1. Ki en ser ti realize konsernan son bann progranm aktivite spirityel regilye?
1 En ser Kretyen i admet: “Depi sa ventenn lannen ki mon dan laverite, mon’n zis al renyon e partisip dan predikasyon.” Me i azoute: “Mon’n tonm lo en konklizyon ki menm si sa bann aktivite i enportan, zot pa sifi pour soutenir mwan dan bann sitiasyon difisil. . . . Mon’n realize aprezan ki mon bezwen koriz mon fason panse e konmans en progranm letid oprofon ki pou permet mwan aprann konn e kontan Zeova, e pour apresye sa ki son Garson in donn nou.”
2. Akoz i enportan pour devlop en relasyon entim avek Zeova?
2 I demann zefor pour batir en relasyon personnel avek Zeova. I demann plis ki zis swiv en progranm routin bann aktivite Kretyen. Si nou pa koz avek Zeova dan lapriyer regilyerman, pour nou Zeova i kapab vin parey en zanmi ki nou’n deza annan me ki nou’n perdi kontak avek. (Rev. 2:4) Annou egzaminen konman letid Labib personnel ek lapriyer i kapab ed nou pour devlop en relasyon entim avek Zeova.—Ps. 25:14.
3. Ki mannyer nou devret fer nou letid personnel pour ki i ed nou apros avek Bondye?
3 Lapriyer ek Refleksyon i esansyel: Letid personnel ki nouri leker i enplik plis ki zis souliny bann pwen enportan dan lenformasyon ki nou pe etidye e get bann verse Labib ki’n ganny mansyonnen. Letid personnel i vedir reflesir lo ki sa lenformasyon i revele lo fason fer Zeova, son bann standar, ek son personnalite. (Egz. 33:13) Ler nou konpran bann keksoz spirityel, sa i fer lefe lo nou santiman e i pous nou pour mazin lo nou prop lavi. (Ps. 119:35, 111) Letid personnel i devret ganny fer avek bi pour apros avek Zeova. (Zak 4:8) Letid serye i demann letan osi byen ki en landrwa apropriye, e i demann disiplin pour fer letid regilyerman. (Dan. 6:10) Menm si ou en dimoun tre okipe, eski ou pe met letan dekote sak zour pour reflesir lo bann kalite merveye Zeova?—Ps. 119:147, 148; 143:5.
4. Konman ki fer lapriyer avan nou konmans letid personnel i ed nou pour devlop en relasyon entim avek Zeova?
4 Lapriyer senser i en par esansyel dan letid personnel oprofon. Pour ki bann laverite Labib i tous nou leker e pous nou pour “ofer Bondye en servis sakre avek lakrent ek respe,” nou bezwen lespri sen Bondye. (Ebr. 12:28, NW ) Alors, nou devret konmans sak letid par sipliy Zeova pour son lespri sen. (Mat. 5:3) Ler nou reflesir lo bann verse Labib e servi bann piblikasyon ki lorganizasyon in fourni, nou ouver nou leker avek Zeova. (Ps. 62:8) Fer letid dan sa fason i en akt ladorasyon kot nou eksprim nou devouman pour Zeova e fortifye nou latasman avek li.—Zid 20, 21.
5. Akoz i enportan pour nou reflesir lo Parol Bondye sak zour?
5 Parey tou relasyon, nou devret kontinyelman pran swen avek nou relasyon avek Zeova, pour ki i kontinyen grandi toudilon nou lavi. Alors, annou rod letan sak zour pour apros avek Bondye, vi ki nou konnen ki li, an retour, i pou apros avek nou.—Ps. 1:2, 3; Efe. 5:15, 16.