En Latak ki enplik ou
1, 2. Ki mannyer bann serviter Bondye ozordi i enplike dan lakonplisman sa vizyon profetik ki ganny rikorde dan Revelasyon 9:13-19?
1 “Sizyenm lanz ti soufle son tronpet.” Apre sa, “de san milyon solda” lo seval i fer en tapaz parey loraz. Sa pa en lafors militer ordiner. “Latet bann seval [i] konman latet lyon.” Dife, lafimen, ek souf i sorti dan zot labous, e zot “lake i parey bann serpan.” Rezilta sa latak senbolik se destriksyon. (Rev. 9:13-19) Eski ou konnen konman ou enplike dan lakonplisman sa vizyon profetik remarkab?
2 Larestan Kretyen swazir ansanm avek zot bann konpanyon, lezot mouton, pe fer konnen zizman Bondye. Sa aktivite i ekspoz konpletman kondisyon spirityel Kretyente, ki mor spirityelman. Annou egzamin de laspe sa vizyon profetik ki fer resorti rezon akoz predikasyon bann serviter Bondye i tre efikas.
3. Ki formasyon ou’n gannyen pour anons mesaz Bondye avek lefikasite?
3 Formen e ekipe pour anmenn Mesaz Bondye: Par mwayen Lekol Minister Teokratik ek lezot renyon, bann minis Bondye in ganny formen pour anons mesaz Bondye avek lotorite. Parey Zezi ek son bann disip, zot al rod bann ki diny, par pres partou kot zot kapab trouv dimoun. (Mat. 10:11; Mark 1:16; Lik 4:15; Akt 20:18-20) Vreman sa metod pour prese ki sorti dan Labib i efikas!
4. Ki lekipman ki disponib pour bokou proklanmater kapab akonpli zot travay?
4 Plizyer bilyon Labib, liv, brosir, ek magazin in ganny distribye par bann minis Kretyen pour akonpli zot travay predikasyon. Sa bann piblikasyon in ganny fourni dan preske 400 langaz. Zot kouver en gran varyete size e zot servi bann lapros ki atir plizyer kalite dimoun. Eski ou pe byen servi sa bann zouti?
5, 6. Kwa ki montre ki pep Zeova i ganny sipor Bondye?
5 Gidans ek Sipor sorti kot Bondye: Sa vizyon profetik i osi montre klerman ki sa aktivite ki ganny reprezante par sa latak senbolik i ganny sipor sorti kot Bondye. (Rev. 9:13-15) Travay mondyal predikasyon i ganny akonpli, non pa par lasazes ouswa pouvwar imen, me par mwayen lespri sen Bondye. (Zeka. 4:6) Zeova pe servi bann lanz pour diriz sa travay. (Rev. 14:6) Alors, ansanm avek zefor ki son bann Temwen lo later i fer, Zeova i fourni son sipor pour atir bann dimoun ki annan limilite anver li.—Zan 6:45, 65.
6 Vi ki zot in ganny formen, byen ekipe pour anmenn mesaz Bondye, e pe travay anba direksyon bann lanz, pep Zeova i en lafors ki pa kapab ganny arete. Annou kontinyen akonpli nou rol dan lakonplisman sa vizyon profetik tre eksitan.