Montre ou Rekonesans
1 Menm si nou pe viv dan “letan difisil,” nou annan bokou rezon pour rekonesan anver Zeova. (2 Tim. 3:1) Pli gran rezon pour nou rekonesan i kado presye son Garson ki Zeova in fourni dan nou faver. (Zan 3:16) Deplis, pandan ki bann dimoun dan fo larelizyon pe mor lafen spirityelman, nou nou annan en gran kantite manze spirityel. (Iza. 65:13) Nou form parti en lasosyasyon frer enternasyonal e nou annan sa privilez pour partisip dan lagrandisman vre ladorasyon, en travay vreman enteresan. (Iza. 2:3, 4; 60:4-10, 22) Ki mannyer nou kapab montre nou rekonesans pour Zeova pour sa kantite benediksyon ki i devid lo nou?—Kol. 3:15, 17.
2 Servi avek Lazwa e avek tou nou Leker: Ler i ti pe koz konsernan donn bann keksoz materyel, zapot Pol ti ekrir: “Bondye i kontan sa ki donn avek lazwa.” (2 Kor. 9:7) Sa prensip i osi aplik avek servis ki nou donn Bondye. Nou montre rekonesans par nou lantouzyasm pour laverite, nou lazwa dan bann renyon Kretyen, nou devouman dan predikasyon, e nou lakontantman pour akonpli lavolonte Bondye.—Ps. 107:21, 22; 119:14; 122:1; Rom. 12:8, 11.
3 Lalwa dan ansyen Izrael pa ti spesifye ki kantite en dimoun ti bezwen donnen an rapor avek serten sakrifis. Sak adorater ti pou kapab montre son rekonesans par donn “dapre benediksyon ki Zeova” ti’n donn li. (Det. 16:16, 17) Pareyman ozordi, en leker rekonesan pou pous nou pour fer dapre nou sirkonstans dan travay predikasyon e fer disip. Serten proklanmater i profit bann konze dan travay ouswa lekol oubyen pandan vizit sirveyan rezyonal pour ogmant letan ki zot pase dan predikasyon. Serten i menm fer pionye asistan. Eski ou kapab fer plis dan predikasyon sa lannen?
4 Ranpli avek Rekonesans: En fason tre enportan ki nou eksprim nou rekonesans anver Zeova se dan lapriyer. (1 Tesa. 5:17, 18) Parol Bondye i ankouraz nou pour “ranpli avek rekonnesans.” (Kol. 2:7) Menm ler nou tre okipe ouswa nou anba presyon, nou devret toultan eksprim nou rekonesans dan nou lapriyer toulezour. (Fili. 4:6) Par nou predikasyon osi byen ki nou lapriyer, annou ‘montre bokou rekonesans anver Bondye.’—2 Kor. 9:12.