‘Ouver gran nou Leker’
1. Ki responsabilite nou tou nou annan?
1 Dan nou lasosyasyon frer ek ser Kretyen, nou tou nou annan sa responsabilite pour kontribye pour fer lanmour ek lafeksyon egziste dan kongregasyon. (1 Pyer 1:22; 2:17) Sa i posib ler nou ‘ouver gran nou leker’ dan lafeksyon ki nou annan pour kanmarad. (2 Kor. 6:12, 13) Akoz i enportan pour byen konn nou bann frer ek ser?
2. Akoz i enportan pour devlop lanmitye avek nou bann konpanyon Kretyen?
2 Lanmitye i vin pli for: Ler nou konn pli byen nou bann konpanyon Kretyen, nou pli byen apresye zot lafwa, perseverans, ek lezot bon kalite ki zot annan. Zot defo i paret napa lenportans pour nou, e sa lanmitye i vin pli for. Ler nou konn kanmarad byen, nou dan en pli bon pozisyon pour ankouraz e fortifye kanmarad. (1 Tesa. 5:11) Nou vin “en led fortifyan” pour kanmarad pour kapab reziste bann move lenfliyans lemonn Satan. (Kol. 4:11, NW) Vi ki i annan en kantite presyon dan sa bann dernyen zour, nou vreman rekonesan ki nou annan bann bon zanmi parmi pep Zeova!—Prov. 18:24.
3. Ki mannyer nou kapab vin en led fortifyan pour lezot?
3 Bann zanmi pros i kapab en bon sours lafors ek rekonfor ler nou rankontre bann leprev dir. (Prov. 17:17) En ser Kretyen ki ti lalit avek bann santiman ki i pa vo nanryen i rapel: “Mon ti annan bann zanmi ki ti dir bann keksoz ankourazan lo mwan pour ed mwan sirmont bann panse negatif ki mon ti annan.” Bann tel zanmi i en benediksyon sorti kot Zeova.—Prov. 27:9.
4. Ki mannyer nou kapab konn lezot pli byen dan kongregasyon?
4 Demontre Lentere dan lezot: Ki mannyer nou kapab ouver gran nou leker dan lafeksyon ki nou annan pour nou bann konpanyon Kretyen? Apard ki zis dir bonzour lezot dan renyon, fer zefor pour fer en bon konversasyon. Montre lentere dan lezot san ki nou mel dan zot lavi prive. (Fili. 2:4; 1 Pyer 4:15) En lot fason ki nou kapab montre lentere dan lezot se ler nou envit zot pour en repa. (Lik 14:12-14) Ouswa ou kapab fer laranzman pour travay avek zot dan predikasyon. (Lik 10:1) Anmezir ki nou pran linisyativ pour konn pli byen nou bann frer ek ser, nou promot linite dan kongregasyon.—Kol. 3:14.
5. Nonm en fason ki nou kapab fer plis zanmi.
5 Eski nou annan sa tandans pour swazir nou bann zanmi parmi bann ki dan nou laz ouswa ki enterese avek menm keksoz parey nou? Nou pa devret les sa bann keksoz koumsa limit lanmitye ki nou devlope dan kongregasyon. David ek Yonatann osi byen ki Rit ek Naomi ti devlop lanmitye solid menm si zot laz ek lorizin ti diferan. (Rit 4:15; 1 Sam. 18:1) Eski ou kapab fer plis zanmi avek diferan dimoun? Sa i kapab anmenn bann benediksyon ki ou pa pe ekspekte.
6. Ki serten byenfe nou gannyen ler nou ouver gran nou leker pour demontre lafeksyon pour nou bann frer ek ser?
6 Ler nou ouver gran nou leker pour demontre nou lafeksyon pour lezot, nou fortifye kanmarad e promot lape dan kongregasyon. Deplis, Zeova i beni nou akoz lanmour ki nou demontre pour nou bann frer ek ser. (Ps. 41:1, 2; Ebr. 6:10) Akoz ou pa fer li ou lobzektif pour konn pli byen otan frer ek ser posib?