Lekol Formasyon Ministeryel—En gran Laport in ouver pour fer en gran Travay
1 Atraver profet Zeremi, Zeova ti predir: “Mon pou anvoy bann berze pour [mon pep] ki pou vreman pran swen avek zot; e zot pou nepli per, ni okenn lafreyer pa pou pran zot, e napa enn ki pou manke.” (Zer. 23:4) Ozordi bann berze pe pran swen avek bann dimoun dan tou nasyon. Sa travay pe ganny fer par en dizenn milye ansyen dan bann kongregasyon. Deplis, en lafoul zennonm ki parey bann gout laroze in ofer zot lekor volonterman dan servis Zeova. (Ps. 110:3) Sa bann frer ki annan limilite i vreman en benediksyon pour bann kongregasyon pep Bondye! Pandan ki sa travay rasanbleman spirityel i kontinyen, i ankor annan bezwen pour bann zonm kalifye fer zot disponib pour servi zot bann frer ek ser.
2 Lekol Formasyon Ministeryel i en bon laranzman pour form bann ansyen ek asistan ministeryel selibater pour plis responsabilite. Plis ki 20,000 etidyan sorti dan anviron 140 pei in ganny formen dan sa 999 group ki’n ganny fer depi ki sa lekol ti konmanse an 1987. Pour sa bann frer, sa lekol in vin ‘en gran laport ki’n ouver pour fer en gran travay.’—1 Kor. 16:9.
3 Bi sa Lekol: Bi Lekol Formasyon Ministeryel se pour form e prepar bann zonm kalifye pour desarz bann responsabilite partou kot i kapab annan en bezwen dan lorganizasyon. Sa lekol i devlop plis zot abilite pour diriz travay predikasyon, partisip dan travay pour pran swen avek troupo, e ansennyen dan kongregasyon. Apre ki zot in fini sa lekol, serten etidyan i ganny anvoye konman pionye spesyal ouswa sirveyan rezyonal dan zot pei ouswa dan lezot pei. Lezot i ganny demande pour servi dan zot kongregasyon ouswa dan bann landrwa kot i annan en pli gran bezwen ki zot biro brans i okipe.
4 Pandan sa kour wit semenn, bann etidyan i fer en letid oprofon lo Labib. Zot egzamin avek latansyon en kantite lansennyman Labib, osi byen responsabilite bann berze ek bann fason pour tret bann problenm dan lavi Kretyen. Zot osi aprann ki Labib i ansennyen lo bann keksoz administrasyon, zidisyer, ek fason organize. Zot ganny formasyon spesyalize pour fer diskour piblik e zot ganny led personnel pour devlop pli vit spirityelman.
5 Kondisyon: Pour asiste sa lekol, bann aplikan i bezwen satisfer serten kondisyon ki tre onivo. Fodre ki zot in servi konman ansyen oubyen asistan ministeryel pour omwen de lannen konsekitif. Zot tou zot devret selibater e ant laz 23 a 50 an. Bann aplikan i devret kapab lir, ekrir, e koz byen sa langaz ki sa lekol pe ganny kondwir, zot devret an bonn sante, e pa bezwen swen oubyen manze spesyal. Priyorite i pour bann ki dan servis pionye ordiner.
6 Bann ki volonter i devret pare e kapab servi nenport landrwa ki bezwen zot. Sa i demann en leta lespri parey pour profet Izai, ki ti pare pour ofer son lekor pour fer en travay spesyal, an dizan: “La mon la! Anvoy mwan.” (Iza. 6:8) I ti osi demontre limilite toudilon son lavi. Bann ki fer zot disponib pour Lekol Formasyon Ministeryel i devret ganny pouse par lanmour pour zot bann frer ek ser e anvi servi zot, olye ki anvi ganny rekonnet. Apre ki zot in ganny sa bon formasyon, bann ki’n fini sa lekol i bezwen aplik sa ki zot in aprann pour benefisye lezot.—Lik 12:48.
7 Byenfe: Pandan sa wit semenn formasyon serye, bann ki’n fini sa lekol i ganny “byen nouri par bann parol lafwa ek vre lansennyman.” (1 Tim. 4:6) Sa i prepar zot pour ed e ankouraz lezot dan bann kongregasyon ek rezyon kot zot ganny anvoye. Dan plizyer landrwa kot bann ki’n asiste Lekol Formasyon Ministeryel in ganny anvoye, aktivite predikasyon in ogmante, servis pionye in ganny ankouraze, sirtou parmi bann zenn; e plis latansyon personnel in ganny donnen avek bokou nouvo ki pe asosye avek pep Bondye.
8 Eski ou en ansyen ouswa en asistan ministeryel selibater ant laz 23 a 50 an? Akoz ou pa mazin pour fer demann pour Lekol Formasyon Ministeryel? Eski ou en zenn frer ki pe pans lo ou bann lobzektif alonterm dan servis Zeova? Akoz ou pa gard ou lavi senp e san distraksyon pour ou kapab antre dan sa ‘gran laport ki’n ouver pour fer en gran travay’? I kapab anmenn ou bokou lazwa ek satisfaksyon. Anfet, Lekol Formasyon Ministeryel in vin en benediksyon pa zis pour bann ki’n asiste sa lekol me pour bann kongregasyon pep Bondye atraver lemonn.
[Bwat lo paz 3]
Ki mannyer zot in benefisye avek sa Formasyon
“Sa formasyon in vreman amelyor mon predikasyon ek mon abilite pour okip troupo avek lasazes, par servi Labib.”
“Sa lekol in donn mwan bokou plis konfyans pour desarz mon bann responsabilite dan kongregasyon.”
“I’n sanz preski tou laspe dan mon lavi, enkli lafason ki mon santi lo laranzman Bondye ek Son lorganizasyon.”
“Sa formasyon ki mon’n gannyen in ed mwan apresye sa nesesite pour fer mwan disponib pour servi kot i annan bezwen.”