Nouvo Progranm Lasanble rezyonal

Dan sa bann “letan difisil,” nou bezwen lasazes Bondye pour ganny e osi pa perdi laprouvasyon Zeova. (2 Tim. 3:1) Progranm lasanble rezyonal pour lannen servis 2005 pou donn nou bann konsey pratik ek lankourazman anmezir ki i devlop sa tenm “Gide par ‘Lasazes ki sorti dan Lesyel.’”—Zak 3:17.

Sa premye diskour an plizyer parti, “Demontre ‘Lasazes ki sorti dan Lesyel’ dan nou Lavi,” pou ed nou konpran ki i enplike dan vin pir, kontan lape, rezonnab, e pare pour obeir. Apre sa sirveyan rezyonal pou koz lo trwa lezot laspe lasazes ki sorti dan lesyel. Sirveyan distrik pou konklir premye zour par montre konman bann minis Kretyen i ekipe pour koz lo lasazes Bondye, menm si lezot i konsider zot “senp san gran ledikasyon.”—Akt 4:13.

Dezyenm zour, en diskour ki annan plizyer parti avek tit “Rod bann Keksoz ki batir nou,” pou ed nou rekonnet e evit bann keksoz ki kapab afeblir nou spirityelman. I pou osi montre nou ki mannyer nou kapab batir lezot dan bann renyon, predikasyon, e dan lafanmiy. Diskour piblik, “Konman Lasazes Bondye i benefisye nou,” pou ogmant nou lapresyasyon pour bann byenfe ki nou resevwar ler nou aplik bann prensip Bondye dan nou lavi. Diskour final, “Azir an armoni avek Lasazes Bondye i protez nou,” pou ranforsi nou determinasyon pour rod lasazes avek Zeova pandan sa bann dernyen zour.

En levennman enteresan dan tou lasanble i batenm bann nouvo disip. Lekol Minister Teokratik ek Letid Latour Veyer pou osi enkli lo progranm. Zeova i anvi ki nou tou nou benefisye avek sa lasazes ki i ofer. Nou pou vin pli ris spirityelman par sa bann konsey ek lankourazman ki pe esper nou dan nou lasanble rezyonal.—Prov. 3:13-18.