Konman nou devret rann Temwannyaz avek nou Fanmiy?

1. Akoz disernman i neseser ler pe rann temwannyaz avek nou fanmiy?

¹ Napa pli gran lazwa ki antre dan nouvo lemonn avek nou fanmiy, ini avek zot dan ladorasyon Zeova! Ler nou rann temwannyaz avek nou fanmiy, sa lespwar merveye i kapab vin en realite. Me pour fer sa dan en fason ki motiv zot, i demann disernman. En sirveyan rezyonal ti fer sa remark: “Bann ki ganny pli bon rezilta i bann ki eksit kiryozite dan zot fanmiy par pres avek zot detanzaot.” Ki mannyer nou kapab fer sa?

2. Ki mannyer lentere senser dan nou fanmiy i kapab ed nou eksit zot kiryozite?

² Eksit zot Kiryozite: Reflesir avek bokou latansyon lo lafason ki ou kapab stimil lentere ou fanmiy. (Prov. 15:28) Kwa ki trakas zot? Ki bann problenm zot pe rankontre? Petet ou kapab montre zot en lartik oubyen mansyonn en verse Labib enteresan lo en size ki vreman enteres zot. Si ou fanmiy pa reste pre avek ou, petet ou kapab fer sa dan en let ouswa par telefonn. San dir zot tro bokou, senm lagrenn laverite, e rod led Zeova pour fer sa bann lagrenn pouse.—1 Kor. 3:6.

3. Ki mannyer lentere ki nou fanmiy i annan dan nou i kapab donn nou loportinite pour donn en temwannyaz?

³ Zezi ti dir avek en zonm ki i ti’n tir en kantite demon dan li: “Retourn se ou kot ou fanmir e rakont zot tou sa ki Senyer in fer pour ou, e konman i’n pran pitye pour ou.” (Mark 5:19) Mazin lefe ki sa ti’n bezwen fer lo fanmiy sa zonm! Menm si ou pa eksperyans okenn keksoz remarkab koumsa, petet ou fanmiy i enterese avek bann keksoz ki ou fer oubyen sa ki ou zanfan i fer. Par mansyonn en ekspoze ki ou’n donnen dan Lekol Minister Teokratik, en lasanble ki ou’n asiste, en vizit kot Betel, ouswa en keksoz enportan ki’n ariv ou, i kapab donn ou loportinite pour koz avek zot en pe plis lo Zeova ek son lorganizasyon.

4. Ki pyez nou devret evite ler nou pe rann temwannyaz avek nou fanmiy?

⁴ Montre Disernman: Ler pe rann temwannyaz avek nou fanmiy, evite dir zot tro bokou en sel kou. En frer ki rapel ler i ti konmans etidye Labib ti admet: “Pandan plizyer er-d-tan mon ti noy mon manman avek bann leksplikasyon lo preski tou sa ki mon ti’n aprann dan Labib. Souvannfwa sa ti fer lev dispit, sirtou avek mon papa.” Menm ler en manm fanmiy i montre lentere dan mesaz Labib, reponn dan en fason ki fer sa dimoun anvi konn plis. (Prov. 25:7) Toultan demontre respe, labonte, ek pasyans, zis parey ou ti pou demontre ler ou pe koz avek bann dimoun ki ou pa konnen dan predikasyon.—Kol. 4:6.

5. Ki nou devret fer si nou fanmiy pa reazir byen ler nou rann temwannyaz avek zot?

⁵ En serten moman dan son lavi, bann fanmiy Zezi ti panse ki i’n perdi latet. (Mark 3:21) Me plitar, serten zot ti vin krwayan. (Akt 1:14) Si zefor ki ou’n fer premye kou pour partaz laverite avek ou fanmiy pa’n marse, pa perdi kouraz. Sitiasyon ek latitid ou fanmiy i kapab sanze. Kontinyen rod en lot loportinite pour partaz en pwen ki kapab eksit zot kiryozite. Ou kapab trouv sa lazwa pour ed zot konmans mars lo semen ki anmenn ver lavi eternel.—Mat. 7:13, 14.