Ofer bann Magazin dan Predikasyon
1, 2. Konman Latour Veyer ek Réveillez-vous! in fer lefe dan lavi dimoun?
1 “Enteresan, apropriye, e ankourazan.” “Zournal pli ankourazan ki mon’n deza lir.” Sa bann komanter i dekrir lafason ki bann lekter atraver lemonn i santi anver Latour Veyer ek Réveillez-vous! Anfet, nou bann magazin in vin bann zouti tre itil pour tous tou sort kalite dimoun avek sa bon nouvel.—1 Tim. 2:4.
2 En biznesmenn ti ganny en Latour Veyer ek en Réveillez-vous! ki koz lo en size ki ti enteres li. Plitar, i ti osi lir en Latour Veyer ki annan en lartik ki ti ankouraz li pour egzamin son krwayans lo Trinite. Sa ti devlop son lentere. I ti batize sis mwan plitar. En lot zonm ti resevwar bann magazin regilyerman me i pa ti zanmen lir zot. Son madanm li ti evit bann Temwen me i ti lir bann magazin ki son msye ti kite. Son leker ti touse par sa promes dan Labib kot pou annan en paradi lo later ki pou ranpli avek bann dimoun drwat. Avek letan, li, son garson, ek son ser ti vin bann serviter Zeova.
3. Ki lavantaz ofer tou le de magazin ansanm?
3 Ofer tou le de ansanm: Parey sa bann legzanp in montre, nou pa asire lekel ki pou lir nou bann magazin oubyen kwa ki kapab devlop zot lentere. (Ekle. 11:6) Alors, i itil pour ofer Latour Veyer ek Réveillez-vous! ansanm, menm si nou pou met lanfaz lo zis enn dan nou prezantasyon. Dan serten ka, i kapab byen pour ofer plizyer nimero lo en vizit.
4. Ki mannyer nou kapab fer en progranm pour distribye magazin?
4 I byen progranm en zour sak semenn pour partisip dan distribisyon magazin. Lo Kalandriye 2005 Temwen Zeova, sak Sanmdi in ganny konsakre konman “Zournen Magazin.” Byensir, vi ki sitiasyon sak dimoun i diferan, serten i kapab met en lot zour dekote pour konsantre lo ofer bann magazin. Eski distribisyon magazin i form parti ou progranm lasemenn?
5. Ki loportinite pour plas magazin nou devret veye, e kwa ki kapab ed nou fer sa?
5 Etablir en Lobzektif personnel: Ler nou etablir en lobzektif personnel tou le mwan pour plas bann magazin i kapab ed nou pour konsantre plis lo plas bann magazin. Eski ou anmenn magazin kot serten dimoun tou le mwan? Eski ou ofer magazin avek bann dimoun ki ou zwenn dan predikasyon? Eski ou ofer bann magazin dan semen, dan teritwar biznes, e dan bann landrwa piblik? Eski ou anmenn magazin avek ou ler ou pe vwayaze, fer konmisyon, e al ou bann apwentman? Servi tou loportinite pour ed lezot benefisye avek Latour Veyer ek Réveillez-vous!
6. Konman nou kapab byen servi bann ansyen magazin?
6 Nou kapab fer li nou lobzektif pour plas bann ansyen nimero ki nou annan. Menm si bann magazin pa ganny plase dan enn oubyen de mwan apre son dat, lenformasyon ladan i ankor annan valer. Plas zot avek bann dimoun ki enterese. Pour plizyer milyon dimoun, magazin Latour Veyer ek Réveillez-vous! in “en parol . . . dan son moman apropriye.” (Prov. 25:11) Annou servi zot pour ed plizyer milyon dimoun ankor pour konn Zeova e servi li.