Progranm Lafanmiy—Renyon Kongregasyon
1 Si ou en paran Kretyen, ou anvi ki ou zanfan i grandi pour kontan e servi Zeova, e finalman ganny lavi eternel dan sa nouvo lemonn ki Bondye in promet. Ki mannyer ou kapab ed zot met ladorasyon Zeova premye dan zot lavi? En fason pli enportan i par ou legzanp. (Prov. 20:7) En ser ki rapel legzanp son manman ki Temwen, ti dir: “Nou pa ti zanmen demann nou lekor si nou ti pe al renyon oubyen non.” Sa ti fer en lefe dirab lo li.
2 Eski ou fanmiy i konpran bi bann renyon kongregasyon? Lenstriksyon ki nou gannyen dan sa bann rasanbleman i fortifye nou pour kontinyen fer lavolonte Bondye, e sa lasosyasyon ki nou gannyen avek nou bann frer ek ser i en gran sours lankourazman. (Iza. 54:13; Rom. 1:11, 12) Me bi prensipal sa bann renyon i pour loue Zeova “parmi bann lafoul ki’n rasanble.” (Ps. 26:12) Bann renyon Kretyen i donn nou loportinite pour demontre nou lanmour pour Zeova e pour ador li.
3 “Fer byen atansyon”: Lapresyasyon pour bi sakre nou bann renyon pou pous nou pour “fer byen atansyon” ki nou pa ptit-a-pti devlop sa labitid pour les bann keksoz ki mwen enportan fer nou mank bann renyon. (Efe. 5:15, 16; Ebr. 10:24, 25) Ler ou pe fer ou progranm lafanmiy, ou kapab konmans par ekrir letan pour bann renyon. Apre fer sir ki ou pa les lezot keksoz enterfer avek sa letan pour bann renyon. Fer sir ki asiste renyon i en priyorite dan ou fanmiy.
4 Pa nou santi nou touse ler nou lir lo nou bann frer ek ser ki’n sirmont bann lobstak pour asiste bann renyon ek lasanble? Menm si ou sitiasyon pa parey avek zot, petet ou osi ou fer fas avek difikilte. Satan pe fer li deplizanpli difisil pour pep Bondye ador Zeova. Me asire ki ou zanfan pou sirman remark determinasyon ki ou fanmiy i fer pour asiste bann renyon. Vreman ler ou fer sa, ou kapab donn zot en kado spirityel ki zot pa pou zanmen oubliye.