En Temwannyaz san okenn Parol
1 San dir en mo, bann kreasyon fizik Zeova i dir en kantite lo son bann kalite envizib. (Ps. 19:1-3; Rom. 1:20) Pareyman nou bon kondwit, personnalite Kretyen, ek laparans modes i donn en temwannyaz san okenn parol. (1 Pyer 2:12; 3:1-4) Nou tou nou devret anvi “fer loner lansennyman lo Bondye, nou Sover” dan tou sa ki nou fer par lafason ki nou konport nou.—Tit 2:10.
2 Ki mannyer i posib pour bann imen enparfe fer bann lansennyman Labib pli atiran? Sa i posib zis atraver gidans Parol Bondye ek pouvwar lespri sen. (Ps. 119:105; 143:10) Parol Bondye “i vivan e i annan pisans. I pli koupe ki en lepe ki koup de kote.” (Ebr. 4:12) I penetre profon dan nou e i ed nou pour met sa nouvo personnalite. (Kol. 3:9, 10) Lespri sen i prodwir bann kalite atiran dan nou, tel parey labonte, ladouser, ek kontrol lo nou lekor. (Gal. 5:22, 23) Eski sakenn antre nou, nou pe les parol Bondye ek son lespri sen enfliyans nou lavi?—Efe. 4:30; 1 Tesa. 2:13.
3 Lezot i remarke: Ler nou viv dapre standar Zeova e nou fer zefor pour reflekte son bann kalite, lezot i remarke. Pran par egzanp, en zonm ki son bann koleg travay ti sikann li akoz i ti pti pti. En ser ki ti travay dan menm lofis ti toultan tret li avek respe ek dinite. Sa ti pous li pour demann sa ser akoz i ti sitan diferan. Sa ser ti eksplike ki son bon kondwit i akoz i aplik bann prensip Labib dan son lavi. I ti osi partaz lespwar merveye lo Rwayonm avek li. Sa zonm ti konmans etidye Labib e finalman i ti progrese e batize. Kan i ti retourn dan son pei, son bann fanmiy ti enpresyonnen par son bon kondwit, e detrwa zot ti aksepte laverite.
4 Dan travay, kot lekol, oubyen dan nou fason azir avek manm fanmiy ek vwazen, nou kapab par nou bon kondwit ansanm avek nou temwannyaz, fer lezot donn Bondye laglwar.—Mat. 5:16.