Ed lezot pour “obei avek tou zot Leker”
1. Ki Zeova i ekspekte avek son bann adorater?
1 Lobeisans i enportan pour ador Zeova dan en fason ki akseptab. (Det. 12:28; 1 Pyer 1:14-16) Byento, Bondye pou anmenn zizman lo “bann ki pa konn Bondye ek bann ki pa obei levanzil.” (2 Tesa. 1:8) Ki mannyer nou kapab ed lezot pour “obei avek tou zot leker” bann lansennyman dan Parol Bondye?—Rom. 6:17.
2. Akoz i enportan pour ed lezot devlop lafwa for?
2 Ed lezot devlop Lafwa ek Lanmour: Dan Labib, lobeisans i relye tre pros avek lafwa. Zapot Pol ti koz lo “lord Bondye eternel, pour ki zot ariv dan lobeisans par lafwa.” (Rom. 16:26, nou ki’n met an italik.) Ebre sapit 11 i mansyonn en kantite legzanp lafwa, ki bokou parmi in azir an armoni avek lavolonte Zeova. (Ebr. 11:7, 8, 17) De lot kote, dezobeisans i relye avek mank lafwa. (Zan 3:36; Ebr. 3:18, 19) Nou bezwen vin efikas dan fason ki nou servi Parol Bondye pour kapab ed lezot devlop sa kalite lafwa ki prodwir lobeisans.—2 Tim. 2:15; Zak 2:14, 17.
3. (a) Ki mannyer lobeisans i relye avek lanmour? (b) Konman nou kapab ed bann etidyan Labib devlop lanmour pour Zeova?
3 Lobeisans i osi relye avek lanmour pour Bondye. (Det. 5:10; 11:1, 22; 30:16) 1 Zan 5:3 i dir: “La lanmour Bondye: ki nou obei son konmannman; e son bann konmannman i pa en fardo.” (Nou ki’n met an italik.) Ki mannyer nou kapab ed bann etidyan Labib devlop lanmour pour Zeova? Rod bann loportinite pandan letid pour ogmant zot lapresyasyon pour bann kalite Zeova. Eksprim ou prop santiman profon pour Bondye. Ed sa etidyan pour reflesir lo devlop en relasyon personnel avek Zeova. Pli enportan ki tou, lanmour pour Zeova pou motiv lezot, e nou osi, pour obeir li avek tou nou leker.—Mat. 22:37.
4. (a) Akoz nou legzanp i enportan? (b) Ki nou bezwen fer pour devlop “en leker obeisan”?
4 Par nou Legzanp: Nou legzanp i en bon fason ki nou kapab ankouraz lezot pour obeir sa bon nouvel. Me nou bezwen kontinyen fer zefor pour devlop “en leker obeisan.” (1 Rwa. 3:9; Prov. 4:23) Ki sa i enplike? Nouri ou leker atraver letid Labib regilye, e asiste renyon regilyerman. (Ps. 1:1, 2; Ebr. 10:24, 25) Asosye avek bann ki zot leker i ini dan vre ladorasyon. (Prov. 13:20) Partisip regilyerman dan predikasyon avek en dezir senser pour ed dimoun dan ou teritwar. Priy Zeova pour gid ou pour devlop en bon leker. (Ps. 86:11) Evit bann keksoz ki kapab sali nou leker, tel parey bann divertisman ki imoral oubyen vyolan. Rod bann keksoz ki anmenn ou pli pros avek Bondye e ki fortifye ou relasyon avek li.—Zak 4:7, 8.
5. Ki mannyer bann ki obeisan i ganny beni?
5 Zeova ti asir bann Izraelit ki zot ti pou ganny beni si zot ti obeir son lavwa. (Det. 28:1, 2) Ozordi osi, Zeova pe beni en kantite “bann ki obei li” konman sef. (Akt 5:32) Alors par nou lansennyman ek legzanp, annou ed lezot pour obeir avek tou zot leker.