Ansenny bann ki annan Limilite pour mars dan Semen Bondye
1. Ki nou bezwen fer ler nou fer disip?
1 Dimoun ti konn bann disip Kris dan premye syek konman bann ki ti swiv “Semen Senyer.” (Akt 9:2) Vre larelizyon i enplik tou laspe lavi en dimoun. (Prov. 3:5, 6) Alors, kan nou pe kondwir bann letid i pa ase zis pour ansenny sa bann dimoun konnesans egzakt Labib. Nou bezwen osi ed zot pour mars dan semen Zeova.—Ps. 25:8, 9.
2. Kwa ki kapab pous en etidyan Labib pour obeir bann komannman Bondye?
2 Lanmour pour Zeova e pour Zezi: I vreman difisil pour bann imen enparfe reflesir, panse, koze e kondwir zot an akor avek lavolonte Bondye! (Rom. 7:21-23; Efe. 4:22-24) Me lanmour pour Bondye ek son Garson i pous bann ki annan limilite pour sirmont sa difikilte. (Zan 14:15; 1 Zan 5:3) Ki mannyer nou kapab ed nou bann etidyan devlop sa lanmour?
3. Konman nou kapab ed nou etidyan devlop lanmour pour Zeova e pour Zezi?
3 Ou kapab ed ou etidyan pour aprann konnen ki kalite Bondye Zeova i ete. En frer ti eksplike, “En dimoun pa kapab kontan en dimoun ki i pa konnen, alor depi okonmansman letid, mon ansenny mon bann etidyan non Bondye dan Labib, e mon rod bann loportinite pour met lanfaz lo bann kalite Zeova.” Fer resorti legzanp ki Zezi in kite i en bon fason pour fer sa. (Zan 1:14; 14:9) Deplis, ou kapab servi sa bwat revizyon alafen sak sapit dan liv Ki Labib i dir pour ed sa etidyan reflesir lo bann kalite merveye Bondye ek son Garson.
4. (a) Akoz bokou etidyan i vwar li difisil pour prese? (b) Ki mannyer nou kapab ed zot pour konmans partisip dan predikasyon?
4 Ansenny par ou Legzanp: Konman bann ansennyan ek gid, par nou aksyon nou montre lezot ki i vedir pour mars dan semen Bondye. (1 Kor. 11:1) Par egzanp, laplipar etidyan pa abitye apros bann enkoni pour partaz zot krwayans. Alors, i demann pasyans ek abilite pour ed zot devlop lanmour, lafwa, ek kouraz pour partisip dan travay predikasyon e pour fer disip. (2 Kor. 4:13; 1 Tesa. 2:2) Vi ki nou anvi ed nou bann etidyan, sa pou pous nou pour siport zot ler zot pe konmans partisip dan predikasyon.
5. Konman en bon legzanp i ed bann etidyan pour vwar ki i enplike ler nou obeir bann komannman Bondye?
5 Ou legzanp i kapab ed bann etidyan dan lezot laspe lavi Kretyen. Ler ou vizit en dimoun malad oubyen ou akey lezot dan bann renyon, zot vwar lanmour pe ganny demontre. (Zan 15:12) Letan ou partisip dan netwayaz lasal oubyen ou fer bann keksoz pour ed lezot, ou pe ansenny zot ki mannyer pour servi lezot. (Zan 13:12-15) Kan zot vwar ou pe viv en lavi senp, zot konpran ki savedir ‘kontinyen rod plito Rwayonm Bondye.’—Mat. 6:33.
6. Ki rezilta nou gannyen ler nou ed lezot servi Zeova?
6 Pour ansenny lezot Parol Bondye e osi pour fer disip i demann bokou zefor. Me i vreman en lazwa pour vwar bann ki annan limilite pe “swiv laverite”!—3 Zan 4.