Ed lezot pour vin Zanmi Bondye
1 Ozordi dimoun sorti dan tou bann nasyon pe ganny ansennyen ki mannyer pour mars dan semen Zeova. (Iza. 2:2, 3) Pour ki zot ‘prodwi bokou fri avek perseverans,’ zot bezwen kontan Zeova. (Lik 8:15; Mark 12:30) San sa lanmour, zot pou napa ase lafors pour rezet bann move lenfliyans e zot pou napa kouraz pour fer sa ki byen. En fason ki nou kapab ed lezot devlop en bon relasyon avek Zeova se ler nou batir dan zot en lapresyasyon pour son bann kalite. Ankouraz zot pour pran an konsiderasyon e reflesir lo bann lenformasyon dan liv Apros avek Zeova.
2 Ou Legzanp: Ou prop aksyon i kapab annan en gran lefe lo leker bann etidyan Labib. Kan zot pou vwar ki ou pran aker ou lanmitye avek Zeova e vwar ki bon lefe sa i annan lo ou lavi, sa pou motiv zot pour kiltiv sa menm relasyon avek li. (Lik 6:40) Anfet nou legzanp i annan en pli gran lenfliyans lo lezot ki sa ki nou dir.
3 En pli bon fason bann paran i kapab ansenny zot zanfan pour kontan Zeova se par zot legzanp. (Det. 6:4-9) En koup ki ti oule elve zot zanfan dan laverite ti demann konsey bann paran ki’n reisi. Sa msye ti dir: “En keksoz an komen ki zot tou zot ti dir se ki legzanp paran i enportan.” Alor par fason ki bann paran i viv zot lavi, zot kapab kit en legzanp vivan avek zot zanfan pour montre ki i vedir vin “zanmi Bondye.”—Zak 2:23.
4 Lapriyer senser: Ou kapab ou osi ed lezot pour kiltiv en lanmitye avek Zeova par ansenny zot konman pour fer lapriyer senser. Ou kapab diriz zot latansyon lo lapriyer model ki Zezi ti kite ensi ki lezot siplikasyon ki trouve dan Labib. (Mat. 6:9, 10) Ou kapab ansenny ou zanfan ek ou bann etidyan labib ki mannyer pour priye par ou prop lapriyer. Ler zot tann ou eksprim sa ki sorti dan ou leker, zot santi sa ki ou resanti pour Zeova. Ankouraz zot pour “priye tou letan” ler zot fer fas avek bann leprev. (Rom. 12:12) Ler zot eksperyans led Zeova ler zot bezwen li, zot pou aprann pour fer li konfyans e kontan li konman en vre zanmi.—Ps. 34:8; Fili. 4:6, 7.